Mateo 5 - NandevaBiblia

Jesús pyrỹmboi yvyturusu'õĩvi

¹ Jesús hesha heta kuareta jatyvarã, jupi yvyturusure haipe vapy. Mboireare opa ou hyvache.

² Haipe Jesús õñepyrõ mboishu retarã hei:

³ Vy'apo reta je'espiritupe pavete'ia, shara haire pevãrã hai huvisha vasu vate arapy'õ.

⁴ Vy'apo reta ã'ẽ vyamba'iare, shara Tũpa meẽposhu mbypya kavi verã.

⁵ Vy'apo reta jyrojamba ijehevare, me'ẽãposhu yvy Tũpa meẽ verã haire ña'ãporã.

⁶ Vy'apo opaite ñymbahy'iare hareka hekope ju'uheva, haipo meẽshu reta Tũpa potava.

⁷ Vy'apo reta hapisha parekova, Tũpa parekoposhu reta.

⁸ Vy'apo reta pyape kyambare, shara haire heshapo Tũpa.

⁹ Vy'apo reta õñehãã pirĩmbi'iko kaviva, haire he'iaposhu: “Tũpa tayre”.

¹⁰ Vy'apo reta hasa'asyva, mbai hekope kavi japo'irã, shara haire ña'ãpova huvisha vasu vate arapy'õ ryheva.

¹¹ Pyvy'apo kuaretare hehei'iperã, pyhasa'asyrã, hareka shyree rupii heta mbai ãñetembaa he'ia pyndyreherã.

¹² Pyvy'a, hareka pyndypya hory, shara vate arape ĩme'ẽ me'ẽãpe verã, kyrãmba hasa'asy jyve arykai Tũpa ĩñee mbeu'iare tynonde pyndyhevi vekuare.

Juky hareka mbai sapeva

¹³ Pee rãnga juky rãĩmi kuaretare pevarã yvy ĩãrẽ. Juky hymboshyveamarã, mbaivapera mymboshyhapojy? Porãveãma; hãma momboha katuape kuaretare pyrõ'ẽhe verã.

¹⁴ Pee rãnga hai mbai sapeva ko yvy'ĩãrẽ. Pente tenta yvyturusu ĩãrẽ'õ katuãpo heshahã.

¹⁵ Myhendyhã lampara ñonoã verã mbai hyrupe, vateñoĩ ñonohã, sapehe verã opaite o'ipe õre.

¹⁶ Kyrã jyve pee mbai sapeva rãĩmipo pysape opavare hỹnonde, haire hesha haikaviva pijaporã, õmombaivasupo jyve Teru vate arape'õ.

Jesús pyrỹmboihe Moisés mbypara vekua

¹⁷ Avy pimoã ai ambai verã Moisés mbypara vekua hareka Tũpa ĩñee mbeu'iare pyrỹmboihe vekua; she aiã ambai verã, koñeĩ hekope kavi ajapo verãi rãnga.

¹⁸ Ãñeteĩte hai pee, ĩmeĩteri'ẽ ara hareka yvyrã, mba'ẽãpo hekyhashi Moisés mbypara vekua, opa ikopeve ẽpyare.

¹⁹ Hãrã ĩme'ẽ mbijicheva ñee japoa verã hareka mishĩmba japova, kyrã pyrỹmboi'ihea, haipo mishĩveva huvisha vasu vate arapy'õ. Tẽvã Moisés mbypara vekua japo kaviva, hareka pyrỹmboihea, haipo vateve ñonohakui huvisha vasu vate arapy'õpe.

²⁰ She hai pee, pijapo kaviãã fariseore hareka Moisés mbypara vekua pyrỹmboi'ihea hekope kaviva ryhevarã, picheãpokui huvisha vasu vate arapy'õ ẽvãpe.

Jesús pyrỹmboihe poshyva ryheva

²¹ Pee pyhendu pynytynondevare he'iambashu aryka'e: “Avy puruka; shara purukava, jaheapohe”.

²² She hai pee, ĩme'ẽ hapisha poshyshuarã rahapo mbivacheha verãpe. Ĩme'ẽ heishua hapisha “Mba'ẽã rikuaa”, rahapo kuakuavare hỹnonde; hareka hapisha jypejuheva hokava mombohapo tatavasupe.

²³ Hãrã ryraha altarpe rỹmeẽ verãrã, haipe nymanduahe ndapisha poshynderã,

²⁴ heja altar hỹnonde rymeẽ verã, ekua ndapisha'õpe ẽĩjykavirãni hãndi. Haivi eijy altar õpe meẽ rymeẽshu verã Tũpa.

²⁵ Ĩme'ẽ mbava pota ndyraha Juezperã, pehupivaĩ ẽjykavi hãndi, mahẽ nymeẽshukui Juez. Ko Juez nymeẽshu syndarorã, hai nymbyperesopokui.

²⁶ Ãñeteĩte hai nde, rẽhẽjyvyãpo haivi, opa rỹmbyhepyjy peve Juez ñonondea.

Jesús pyrỹmboihe javasa ia ryheva

²⁷ Moisés heimbajy arykai: “Avy jyrekomateãre ĩmetyrejy javasa”.

²⁸ Tẽvã she hai pee: “Ĩme'ẽ kuimbai ynga taupe pota ryheve maĩ'iherã, ikoma'i hãndi pyapeĩ”.

²⁹ Ndyresa ndakata kyty'õ ndirity mbai porãmbaperã; nohẽ mombo mbyry, haikavivepo mishĩĩ õñehũndi ndyrete, mahẽ opaĩ ndyrete mombohakui tata vasupe.

³⁰ Ndepo ndakata kyty'õ ndirity mbai porãmbaperã; jasyja mombo mbyry, haikavivepo mishĩĩ õñehũndi ndyrete, mahẽ opaĩ ndyrete mombohakui tata vasupe.

Jesús pyrỹmboihe poi ijuhuviva ryheva

³¹ Pee pyhendu pynytynondevare he'iambashu aryka'e: “Ĩme'ẽ hyreko poishiarã, meẽposhu kuatia poishia ryheva”.

³² Tẽvã she hai pee: Ĩme'ẽ kuimbai hyreko poishia, yngavambate iko'i hãndiva, ñonomashu yngava pokojyhe verã; hãrã taupe poihashia rekojya, javasama'ijy.

Jesús pyrỹmboihe ñee ñameẽva ryheva

³³ Pee pyhendu pynytynondevare he'iambashu aryka'e: “Avy pỹrõhe niñee rỹmeẽva Ñandeja hỹnonde”.

³⁴ Tẽvã she hai pee: Avytei mbaimbape pymeẽ piniñee. Avy pymeẽ piniñee vate arare, shara Tũpa vapypya ẽvãpe hai hokava;

³⁵ yvypemba pymeẽ verã, shara kova hai ipy ẽvãpe; avy Jerusalenre pymeẽ, shara hokava hai mburuvisha vasu henta.

³⁶ Kyrãijy avy pymeẽ piniñee pãnkare, shara pente tãnkahambaa katu pimitĩĩ hareka pumũhũũjya.

³⁷ Koñei “Ẽẽ” pererã, katu pijapo; tẽvã “Mba'ety” pererã avy pijapo, shara ĩãrẽve pijapoheva, porãmbama hai hokava.

Jesús pyrỹmboihe mbai jajepyheva ryheva

³⁸ Pee pyhendu he'iambajy aryka'e: “Ĩme'ẽ hapisha hesa mombushivarã, mombuhaĩpo jyveshi; hapisha hãĩ ityshia, ityhãipo jyveshi”.

³⁹ Tẽvã she hai pee: Avy pymbyhekoviajyshu mbai porãmba japo pyndyreheva; ĩme'ẽ ndyrovaipi nupavarã, meẽjyshu ndyrova hyvaisho.

⁴⁰ Ĩme'ẽ pota primbivacheka'ia hỹnonde ndyrahava rỹmondeva heky ndyhevi verãrã, ma'ẽĩhe tyrahaseve ndysako.

⁴¹ Ĩme'ẽ rahakandea mbyry katu mbai pohyvarã, mbyryve rahashu.

⁴² Ĩme'ẽ maĩnunga jururendevarã, meẽshu, maĩnunga pota pory ndyheviva, porykashu.

Jyhaihukue ñandyvaisho retare

⁴³ Pee pyhendu he'iambajy aryka'e: “Ryhaihuposhu ndyraihuvare, hãma avy haihu ndyvaishore”.

⁴⁴ Tẽvã she hai pee: Pyhaihu pyndyreshatamba'iare, pimboihe piniñono porãmba'iare;

⁴⁵ kyrãrãpo iko pyndyhevi Peru tayre; hai rãnga mohẽ'ĩãrẽ kuarasy heko porãmba hareka heko kavivare. Hai rãnga mbyhaivihe heko kavivare hareka heko porãmbavare.

⁴⁶ Pee pyhaihupi pyndyraihu'ia retairãra, mbaivapepo mbyhekoviajype? Kyrypoti mbatyse'iare Roma pevarã retave rãnga kyrã japo.

⁴⁷ Hãma pini'ĩrũ retaĩ pymarãndupirã, marãva mbaikavira pijapo? Tũpa jyrojambahea retave rãnga kyrã japo jyve.

⁴⁸ Pee rãnga pyndyreko kavipo, Peru vate arapy'õ heko kaviva rãĩmi.