Mateo 4 - NandevaBiblia

Ãña pyahããshu Jesús

¹ Haivi Espiritu Santo raha Jesús yvy ikoambaipi, haipe Ãña pyahããshu verã.

² Hasa 40 ara mbaimba houva, haivi ñandu ñymbahykue.

³ Haipe Ãña ñymbojahe Jesús pyahãã verãrã heishu: Nde hai Tũpa tayrã, ereshu kova ita tikoshi pãhã.

⁴ Tẽvã Jesús heishu: Mbyparahavape hei: “Ha'ẽã pãhãrei iko verã kuareta; koñeĩ opaite ñee õhẽva Tũpa juruivi”.

⁵ Haivi Ãña rahashu tenta Tũpa ña'ãpova tenta kyamba'ẽvãpe, hupishu tũpao japytere,

⁶ hãrã heishu: Ãñete nde hai Tũpa tayrã, epo yvype; shara mbyparahavape hei: “Tũpa mboupo jokuevare ñyngareko ndyrehe verã. Ndypysypo reta potaã ita ndepy ryrokuaherã”.

⁷ Jesús heishu: Mbyparaha rãnga jyve: “Avy pyahããshu Ñandeja, nu Tũpa”.

⁸ Koñemahea Ãña rahashu yvyturusu japytere, haipe mbyheshaka opaite tenta yvy ĩãrẽ'õre, hareka haire hĩmbipekue.

⁹ Hãma heishu: Opaitevapo ameẽndekui kovare, rĩñesu shynonde hareka shemombairã.

¹⁰ Jesús heijyshu: Satanás, ekuashe koivi, Mbyparahavape rãnga hei: “Ñandeja nu Tũpa hỹnondepo rĩñesu, hareka ha'ẽĩpo rẽmombai vasu”.

¹¹ Hãrã Ãña syryshi Jesús, haipe Tũpa jokuevare jyveru ñyngarekohe verãre.

Jesús õñepỹrõ mbeu Tũpa ĩñee kavi

¹² Jesús henduma Juan mbyperesoarã, ohojy Galileape.

¹³ Tynonde oho tenta Nazaretpe, haivi oho pyta Capernaumpe, pente tenta ẽvã yyvasu hỹmbeype, Zabulón hareka Neftalí ñymoña hãndi vekuare iko jyreaipi.

¹⁴ Hokava jehu iko verã hekope kavi Tũpa ĩñee mbeu'ia Isaías jykuatiape mbypararã vekua:

¹⁵ “Tenta Zabulón, hareka Neftalí jy yvype, pytava yyvasu kyty yysyryva Jordán hyvache, tenta Galilea haimba Judiovare ikovape.

¹⁶ Kuaretare ikova pỹntuape, hesha tivisha sapeva; hendyva sapeshu manova rãĩmi ikovare”.

¹⁷ Haivivaĩ Jesús õñepỹrõ ñimiñeerã, hei: “Peijy Tũpa jykoty, shara huvisha vasu vate arapy'õ ryheva kõõĩma'ẽ”.

Jesús hẽno urũndy pira nohẽ'iare

¹⁸ Jesús vata oho yyvasu Galilea hỹmbeipirã, hesha Simón, Pedro he'iashua hareka tyvy Andrés. Hai reta rãnga pira nohẽ'iare, yype mombo ñynoĩ jypysare.

¹⁹ Jesús heishu reta: “Pei shimi'ĩrũ, ajapopo pyndyhevi kuaretare nohẽ'i verã”.

²⁰ Haipevãĩ opa heja jypysare, hareka oho hãndi.

²¹ Jesús oho poshyjyrã heshajy pente'ovare Jacobo hareka Juan, Zebedeo tayre. Haire tuu hãndi jakatu ñynoĩ jypysare kanoape. Jesús hẽnoshu reta,

²² hãrã haipevãi heja reta kanoa hareka tuu, haivi jyraha hãndi.

Jesús mynguera hetavape

²³ Jesús opa vatahupi Galileape, Judiore ñymbatyseape pyrỹmboihe Ñee kaviva mbeu Mburuvisha vasurã vate araivi ouva ryheva, kuareta ñymbairasy vekuare opa mynguera.

²⁴ Jesús kuaaha opa Siriaipi. Hãrã veruashu opaite marãrãgãtu ñymbairasy vekuare, mbaiposhy ĩmereare, kuakuamba'ia hareka vatamba vekuare. Jesús opaite mynguerashu reta.

²⁵ Heta'ẽ kuaretare Galileaivi, Decápolis, Jerusalén, Judea hareka Jordán juri'õre ohova Jesús haykue.