Mateo 3 - NandevaBiblia

Juan Bautista ñimiñee

¹ Heta arama hasarã, Juan Bautista ñimiñee yvy ikoambaipi, Judeape.

² Hai hei: Peijy Tũpa jykoty, shara kõõĩma ẽẽ huvisha vasu vate arapy'õ ryheva

³ Juan, haimba arykai Tũpa ĩñee mbeu'ia Isaías ijetaherã kuatiape mbypararã vekua: Ñyhendu yvy ikoambaipi hỹnatu ijetava: “Pymyhẽvã Ñandeja haperã, pijaposhu pe symyĩ ohova”.

⁴ Juan mondeva hai kamello haakueivi japoava, ku'a jokuaka hai vakapi, tuku hareka ei ñanaipi'õvaĩ hou'i.

⁵ Opaĩ Jerusalén, hareka Judeape'õre jyraha jyve hai ẽvãpe hendu verã ĩñee, kyrã jyve yy Jordan hỹmbeype'iare.

⁶ Opama ñymbeu reta mbai porãmba japo vekuaivirã, Juan myngaraishu reta yy syryva Jordanpe.

⁷ Tẽvã Juan heshama fariseore hareka saduceore heta ou ẽvãpe myngarai verãrã, heishu reta: Pee mboi rãĩmipiva! Mbavara heipe katu piñemishi verã ñunũpa pohyva kõõĩma ouva?

⁸ Tijyhesha pyndyrehe pyhejama mbai porãmba pijapo vekua.

⁹ Avy pimoã Abraham ñymoshiaperã mba'ẽã jehupe, she hai pee Tũpa katu japoshi ko ita Abraham ra'yrã.

¹⁰ Shara hasha ẽma jasyja verã yvyra jypyre; opaite yvyra ia porãmbava jasyjahapo hareka momboha verã tatape.

¹¹ Añete yypeĩ apyrỹmyngarai pyhejama mbai porãmba pijapo vekuarã. Tẽvã shaykue ouva pynymyngaraipokui Espiritu Santo hareka tatape, hai mbai vasuve shyhevi, jypasaĩmba katu ajorashua.

¹² Ũrũpe ipopemare trigo mbova verã, hãrã yngaipo ñonoshi ky'akue, ñono kavipo oo'ipe trigo hãỹ, tẽvã ky'akue hapypo tata ovembape.

Jesús ñymyngarairã vekua

¹³ Jesús oho Galileaivi, ou Juan ẽvãpe yy syryva Jordánpe hai myngaraishu verã.

¹⁴ Juan potaã myngaraire Jesús, hãrã heishu: Nde rãngate shymyngarai verã! Hãmera nde rei ãĩvãpe?

¹⁵ Jesús heishu: Ã'ẽãra kyrãĩpo ryheja, haikavive rãnga jajapo hekope kavi Tũpa potava. Hãrã Juan japo Jesús heishuva rãĩmi.

¹⁶ Jesús ñymyngaraimarã, yyvi õhẽrã jypeashu ara vate'õ, haipe Jesús hesha Tũpa Espiritu, pykasu rãĩmi vejy ĩãrẽ.

¹⁷ Hãrã ñyhendu vate araivi pente ñee heiva: “Kova hai Shyray ahaihuva, hai reheĩ avyava”.