Mateo 28 - NandevaBiblia

Jesús kuerajy

¹ Hasama putu'uava jy'ararã, pente ara semana õñepyrõhea kõ'ẽi, Maria Magdalena hareka ĩrũ Maria jyraha hesha verãre tã'õve rẽnda.

² Hãrã sapy'ãi hỹnatu yvyryry shara pente Ñandeja jokueva vejy mbysyry verã tã'õve rẽnda jochapya, hãma vapy'ẽ ĩãrẽ.

³ Tũpa jokueva ara verava rãĩmi himbipe hareka mondeva tĩĩ mandyju rãĩmi.

⁴ Hãrã hesha syndaro retarã opa ryry kyjeiterã, pyta manova rãĩmi.

⁵ Haipe Tũpa jokueva ijetashu taupe retarã hei: Avy pykyje. Aikuaa rãnga pyhekapeĩ Jesús, kurusure jukaha vekua.

⁶ Mba'ety kope, kuerajy hai heiva rãĩmi. Pei pymãihe ñonoa vekuape.

⁷ Ãrẽ'ãite pekua pymbeushu mboireare, kuerajymava manoare pãuvi hareka ohoma pynynonderã Galilea kyty, haipepo pyheshashukui. Kova rãnga haije haipe verã.

⁸ Haivi taupere ohojy tã'õvere kyje ryheve, ñaniavei jyraha mbeushu verãre mboireare.

⁹ Haipe Jesús õhẽ hỹvãiti retarã heishu: Hãmarate. Haire ñymboja Jesús ẽvape, ipyipi kũãva jyrerã haivi ĩñesu hỹnonde reta,

¹⁰ hãrã Jesús heishu reta: Avy pykyje. Pekua pymbeushu shyryvyre toho Galileape, haipepo shyresha retakui.

Syndarore mbeu vekua

¹¹ Taupere jyraha jyrerã, ĩme'ẽ syndarore ñyngareko'õre tentape ohova hãrã opa mbeushu pai juhuvishare jehuva.

¹² Pai ruvishare oho karai kuakuavare ẽvãpe, pente ñeepe iñiñono heta meẽshu verãre kyrypoti syndarore.

¹³ Hãrã heishu reta: Pee perepokui pynturã pechepẽĩrã, ou Jesús mboireare hareka manarõhe reta hetekue.

¹⁴ Hãrã huvisha kova kuaarã, orepo mbe'uha kavishu hãrã mba'ẽãpo jehupe.

¹⁵ Haipe syndarore raha kyrypotirã jyraha japo he'iashuva rãĩmi. Hãrã Judiore ã'ẽpeve kyrã hei reta.

Jesús mondoshu mboireare

¹⁶ Hãrã 11 mboireare jyraha Galileape, yvyturusu'õpe Jesús heishuvape.

¹⁷ Heshama retarã ĩñesu hỹnonde, ĩmetẽ'õ rojambavare.

¹⁸ Haipe Jesús ñymbojahe retarã heishu: Opa me'ẽã she mbaikatu vate arapy'õ hareka yvy'ĩãrẽ'õre.

¹⁹ Pekua opaite tentaipi pijaposhi reta shimimbo'ẽrã, pymyngaraishu reta Tuu, Tay hareka Espiritu Santo heepe.

²⁰ Hãrã pymboishu opaite tijapo reta she hai pee vekua. Pikuaapo she ãĩmẽpo penendie opa arape ko yvy opapeve. Amén.