Mateo 27 - NandevaBiblia

Jesús rahaha Pilato ẽvãpe

¹ Kõĩmajyrã pai ruvisha hareka kuakuavare pente ñeepe ñynoĩ jukaka verã Jesús.

² Haivi ipo pokuaha ryheve rahashu retarã meẽ reta Poncio Pilatope, huvishavasu mbory'õre ipope.

Judas manorã vekua

³ Hãma Judas pyrypysyka vekua, heshama Jesús pysy retarã, mbyvya ãĩterã 30 kavi kyrypoti meẽjyshu pai ruvisha hareka kuakuava retape,

⁴ hãrã heishu reta: Mbai porãmba rãnga ajapo, ko kuimbai heko kaviva ameẽ jukaha verã. Tẽvã Haire heishu: Tẽvãra mbaivẽãma hai ore hokava! Ndyreheima'ẽ hokava!

⁵ Haipe Judas mombo kyrypoti tũpaoperã oho ijuvy.

⁶ Pai juhuvishare mbatyjy nikererã hei: Katuã rãnga kova ñañono Tũpape me'ẽãva hyrupe, shara kova hai tuvy mbyhepyapy vekua.

⁷ Hãrã pente ñeepeĩ ñynoĩ reta ova verã hokava kyrypoti yvy “Ñu tujure mba'apova rẽnda”, haipe ñoty verã opaite israelitambare.

⁸ Hãma hoka yvy mbyheeha ã'ẽpeve, “Ñũũ tuvy”.

⁹ Kyrã iko Tũpa ĩñee mbeu'ia Jeremias hei vekua rãĩmi: “Hekymba reta hoka 30 ia nikere, hoka pymbyhepy ñonohẽ reta israelitavare,

¹⁰ hãrã ovambapy reta hokava Ñũ tujure mba'apova, Ñandeja heisheva rãĩmi”.

Jesús Pilato hỹnonde

¹¹ Raha reta Jesús huvisha vasu mbory'õre ẽvaperã hai pyrãndushu: Ndera hai Judiore juhuvisha? Jesús heishu: Nde rãnga rere.

¹² Hãma pai ruvisha hareka kuakuavare ñono vai ñynoishu, tẽvã Jesús mba'ẽãmba hei.

¹³ Haivi Pilato heishu: Rỹhenduãra mbai porãmba hei ñynoĩ ndyreva reta?

¹⁴ Tẽvã Jesús mba'ẽãmba hei, hãrã Pilato mbyryvasu maĩ.

Jesús ñonõashu hai juka verã

¹⁵ Aretemarã huvisha vasu mbory'õre poimbashikuei mbyperesoarea, kuaretare pyhỹrõva.

¹⁶ Ĩmemba'ẽ pente mbyperesoava oparupi kuaahava, Barrabas he'iashua.

¹⁷ Haire ñymbaty ñynoĩrã Pilato pyrãndushu reta: Mbavara pipota apoijyshi: Barrabas maĩrã Jesús, Cristo he'iashuara?

¹⁸ Shara Pilato kuaa haire heshatãã reheĩ meẽshu reta.

¹⁹ Pilato vapyteri'ẽ tribunalperã, hyreko heishu: “Avy mãĩ'ẽhe, ndeave ko kuimbai heko kaviva, pyhare porãã apaihu, hai rehe”.

²⁰ Tẽvã pai ruvishare hareka kuakuavare hei jyvyĩ kuimbai retape jurure verã Barrabas typoihashi hareka Jesús tijukaha hai verã.

²¹ Huvisha ijeta hareka pyrãndujyshu reta: Mbavara kova mokue'iaivi pipota apoishivi? Haire hei: Barrabas.

²² Pilato pyrãndushu reta: Mbaivara ajapo pohe Jesús, Cristo he'iashuva? Opaiteva hei reta: Mbysavava kurusure!

²³ Haipe Pilato heishu reta: Mbaivara porãmba hai japo? Hãma haire hỹnatuvemba sapuke reta: Tymbysavavaha kurusure!

²⁴ Pilato heshama mba'ẽãpo japoherã, hareka sapukevaĩ ñymbyheta verã, veruka yy hareka jypoi kuaretare hỹnonderã, hei: Shepo ky'ãpo ko kuimbai heko kaviva manoivi, pee pevarãma kova.

²⁵ Hãma kuimbaire opaite hei reta: Toa ỹrẽãrẽ hareka yryrayre ĩãrẽ hai ñymanokue!

²⁶ Haipe Pilato poishi Barrabasvi, haivi nũpãka Jesús hareka heja ipope reta mbysavava verã kurusure.

²⁷ Hãma huvisha syndarore rahashu Jesús huvisha hentape hareka mbatykashu ĩrũre ẽẽ hãndiare.

²⁸ Haivi mondeva hekyshi retarã mymondeka reta pente mondeava pyntava,

²⁹ ñakare ñono pente korona juu ñopẽãva hareka pente takuara ipo jakata kyty. Haivi ĩñesu hỹnonde reta ñymbyhory ñynoĩhe retarã hei: Tikopuku Judiore juhuvisha!

³⁰ Myndyvyhe reta hareka nũpa jyre takuarapy ñakaipi.

³¹ Kyrã hetama ñymbyhoryhe retarã, ñohẽjyshi reta mondeva pyntava, mymondekajy ha'ẽĩ mondeva, haivi raha reta Jesús mbysavava verã kurusure.

Jesús mano kurusure

³² Õhẽ jyjaha retarã, ñyvãiti hãndi reta pente kuimbai Cirenepe'ia Simón he'iashua; mbyrahaka reta Jesús jukurusu.

³³ Haivi vãhẽ jyraha Golgota he'iashuape, he'iseva tãkakãvẽ rẽnda.

³⁴ Haipe mbyho'uka reta vino irova mbihi'ava Jesúspe, tẽvã hããmarã ho'uãã.

³⁵ Mbysavavama kurusurerã, syndarore jyvare ñynoĩ Jesús mondeva mbijao ijupe verãre. Kyrã iko Tũpa ĩñee mbeu'ia hei vekua rãĩmi jykuatiape: “Mbijao reta mondeva jyvare ñynoihe mbavarapo raha”.

³⁶ Haivi haire vapy haipe ñyngareko ñynoĩhe verãre Jesús.

³⁷ Hãma ñaka'ĩãrẽ ñono reta pente yvyra ipeva mbyparahava heiva: “Kova hai Jesús Judiore juhuvisha”.

³⁸ Mbysavavaha jyve hãndi kurusure mõkue manarõ'iare, pente jakata kyty hareka ĩrũ jasu kyty.

³⁹ Hãma hasa ohovare haipi jahehe Jesús hareka ñaka mbyvavai jyrerã,

⁴⁰ hei: Nde rityndaporẽĩ tũpao hareka rũmũpũã ndapojy mbahapy aravape, ñymondojepe jyvy. Nde hai Tũpa tayrã vejy hoka kurusuivi.

⁴¹ Kyrã ñymbyhory jyvehe reta pai ruvisha hãndi Moisés mbypara vekua pyrỹmboi'iheare hareka fariseore, kuakuavare hãndirã hei jyre ijupe:

⁴² Ynga reta mondojepe'i, tẽvã hai katuã ñymondojepe. Israelitavare juhuvisha rãnga, tyvejy kurusuivi hãrãpo jyrojahahekui.

⁴³ Jyroja rãnga hai Tũpare, tymondojepeshu Tũpa ã'ẽvãĩ, ãñete haihushurã; hai hei ñandeva rãĩmi Tũpa Tayva.

⁴⁴ Hãma mãnarõ'iare mbysavava hãndia kurusure jyve, ijeta porããmba jyvehe reta.

⁴⁵ Haivi mondii opa pỹtu yvy jerekue kõĩ mbyteivive ka'aru mbahapy orapeve.

⁴⁶ Hãma mbahapy oraipi Jesús hỹnatu sapukerã hei: Eli, Eli, lama sabactani? Hokava he'ise: Shu Tũpa, shu Tũpa, Marã'irãra sheĩĩ shyreja?

⁴⁷ Haipe ĩme'õ reta hendumarã hei: Ko kuimbai hẽno'ẽ Tũpa ĩñee mbeu'ia Elías.

⁴⁸ Pente haivare ñani oho veru pente esponja hareka mãky vinagrepe, pente takuarare ñonorã mbyho'uka reta.

⁴⁹ Tẽvã ĩrũ reta hei: Mã'ẽĩheno, jaheshara Elías ou mondojepeshukui.

⁵⁰ Jesús hỹnatu sapukejyrã, haivi mano.

⁵¹ Hãrã mondii tũpaope'õ tarapo jochahapya mbyteipitei soro, vateivi yvykyty. Yvy opa ryry hareka ita opa jeka.

⁵² Haivi tã'õvere ẽvãpe opa jypea hareka heta heko kyambare mano vekuare, opa kuerajy.

⁵³ Hokavare õhẽjy ñotỹhã vekuaivi, haivi iche reta tenta kyamba'ẽvape, heta'ẽ heshavare.

⁵⁴ Syndaro ruvisha hareka opaite haipe'ẽ hãndiare Jesús ñyngareko'ẽheare heshama yvyryry hareka opaiteva mbai ikovarã, kyjeiterã hei: Kova rãnga ãñeteimba Tũpa Tay.

⁵⁵ Haipe heta'ẽ jyve taupere mbyryivi maĩ'iare, Jesús mi'ĩrũreare Galileaivive hareka mbory verã.

⁵⁶ Hokavare mbytepe'ẽ Maria Magdalena hãndi Maria Santiago hareka José ishy, Zebedeo tayre ishy.

Jesús ñotyha

⁵⁷ Ka'aruiterã pyntuma'ia, vãhẽ ou pente karai ikokatuva, José he'iashua. Tenta Arimateape'õ, hareka Jesús mboireare jyve.

⁵⁸ Hai oho Pilato ẽvãpe jurureshu Jesús hetekue, hãma Pilato me'ẽkashu.

⁵⁹ José tyretekue rahãrã ñomapy pente tarapo pyrẽrĩva kyambava,

⁶⁰ hãma ñono ita jo'oa vekuapy, manova ñotya verãpe ha'ei ña'ãpova, hãirã jo'okava. Mbotyma jo'oava juru pente ita marẽyvãpyrã, ohojy.

⁶¹ Maria Magdalena hareka ĩrũ Maria vapyjyre tã'õve rẽnda hỹnonde.

⁶² Hoka ara kuty jyape, putu'uava jy'aramarã, pai ruvisha hareka fariseore oho Pilato ẽvãpe.

⁶³ Heishu reta: Yreja, ỹrỹmandua rãngahe tykove japu hei vekua ĩmeteri'ĩrã vekua, mbahapy arape kuerajy verã manovare pãũvi.

⁶⁴ Hãrã pota riñono ñyngarekohe verã tã'õve rẽnda mbahapy arapeve, mahẽ mboireare ou ñomi rahakui pyhare hetekue, haivi heipo retakui, pũãjymava manoare pãuvi. Kyrã jehurã, ko japuva teitevemapojykui, tynonde ñahendu vekuaivi.

⁶⁵ Haipe Pilato heishu reta: Ameẽpopekui oho ñyngareko verãre tã'õve ñonoavape. Pijapo pee pikuava rãĩmi.

⁶⁶ Haivi jyraha mboty reta tã'õve ñonoavape hõche hesha verã ĩme'ẽ peavarã. Hãrã haipe heja reta syndarore ñyngareko'ẽhe verã.