Mateo 26 - NandevaBiblia

Pai juhuvishare pota juka jyre Jesús

¹ Jesús opa ijeta kova mbairerã, heishu mboireare:

² Pee rãnga pikuaa, mokue ara paskua arete verãpe. Hãrã kuareta Tay me'ẽãpo kurusure mbysavavaha verã.

³ Pai juhuvishare, Moisés mbypara vekua pyrỹmboi'iheare, hareka kuakuavare opa jaty pai Caifas hoo vasupe.

⁴ Hãrã haipe ijeta ñynoĩ marãrapo japu rupii Jesús pysyka reta hareka jukaka verã.

⁵ Tẽvã hei reta: Avypo aretepe jajapokui, mãhẽ kuaretare poshy hareka ñanderã pũã ñandyrehekui.

Pente taupe mbipishe Jesús mbai pisheka kavipy

⁶ Jesús ĩme'ẽ Betaniape, Simón he'iashuva kuru porãmba'i vekua hentape,

⁷ vãhẽ ou hai ẽvãpe pente taupe, mbai pisheka kavi hareka hepyva ryheva verurã ñohẽ Jesús ñakare, karu'ẽrã;

⁸ hãrã mboireare hokava hesha hareka poshy jyrerã hei jyre: Marã'ĩrãra jyvarereihe?

⁹ Hokava mbai pisheka kavi haikavitẽpo hepyre mẽ'ẽharã, hepykue pavetevare mẽ'ẽhashu.

¹⁰ Jesús hendu hokavarã heishu reta: Marã'ĩrãra kyrãĩ pijetahe ko taupe? Kova mbai japo shyreheva rãnga, haikavi.

¹¹ Pavetevare ĩmeñoĩpo pynymbyteipi, tẽvã she ha'ẽã ãĩmeñoĩ verã pyndyvache.

¹² Kova taupe japova ñohe shyretere mbai pisheka kavi, shiñono kavi shõtỹharã verã.

¹³ Ãñete hai pee, mãĩpi mbe'uhavaipi ko Ñee Kaviva ryheva yvy'ĩãrẽ; mbe'uhapo jyve ko taupe japova, mãndu'ahahe verã.

Judas ityshu Jesús

¹⁴ Hãrã penteva 12 mboireare, Judas Iscariote he'iashuva, oho pai juhuvishare ẽvãpe,

¹⁵ haipe heishu: Mbovyrapo pymbyhepyshekui Jesús ameẽperã? Hãrã haire meẽshu 30 nikere kyrypoti.

¹⁶ Haivi Judas hekama marãrapo hareka mbai orapera meẽposhu reta Jesús.

Cena Jesús japova mãndu'ahahe verã

¹⁷ Ara õñepyrõhea arete pãhã jylevaduramba ryheva, Jesús mboireare ou hai ẽvãperã pyrãndushu: Mãpera ripota mỹhẽvãha ndekui rykaru verã Pascuape?

¹⁸ Jesús heishu reta: Pekua tenta kyty pente kuimbai hentape pereshu: Pyrỹmboi'ia he'ika nde; shy'ara vãhẽmapo, hãrã nyrẽntape amboi'areare hãndi pota amby'arete paskua.

¹⁹ Mboireare japo Jesús heiva rãĩmi hareka myhẽvãshu reta paskuape ocena verãre.

²⁰ Haipe pyntumãrã, Jesús vapy mesape 12 mboireare hãndi.

²¹ Hãrã ocena ñynõĩrã Jesús heishu reta: Ãñete hai pee, pente peeva shymeẽpokui.

²² Hãrã haire mbyvy'ãã retarã, õñepyrõ pepenteĩ pyrãndushu: Sheja, sheẽãrapokui?

²³ Hãrã Jesús heishu reta: Pãhã mãkỹ shendieva hareka mbypy'ẽvã peratupy, hai kova shymeẽ verã.

²⁴ Kuareta Tay iko ñoĩpohe kuatia mbyparahahea rãĩmi, tẽvã tengapokui kuimbai Kuareta Tay meẽva! Haikavivetẽshu verãmba ko kuimbai o'ãrã.

²⁵ Haipe Judas, Jesús meẽ verã pyrãndu jyveshu: Pyrỹmboi'ia, sheẽãrapokui? Jesús heishu: Nde rãnga.

²⁶ Karumapo ñynoĩ retarã, Jesús heky pãhã, haivi ohovasa; pysẽãmarã meẽshu mboireare hãrã heishu: Peu, kova hai shyrete.

²⁷ Haivi mỹnyhẽjy pente vaso vino, haivi ñymboi'ĩãrẽ, mbyhasashu mboireare hãrã hei: Jyvache pimbyupy kova vino.

²⁸ Kova hai shuruvy my'ãñeteva ñee me'ẽãva py'ahuva ryheva, ñohẽhava opava pevarãre, mbai porãmba japo vekua hejahareishi verã.

²⁹ Hãrã she haijy pee, koivive hauveamapo uva tyy, haujy verã arapeve penendie py'ahuva, Sheru mburuvisha vasurã.

³⁰ Opa pyrahe pente mbyraherã, ohojy reta Olivore yvuturusukyty.

Jesús mbeu Pedro ñomi verã

³¹ Hãrã Jesús heishu reta: Opaite pee shyrejareiipokui ko pỹntu. Shara Tũpa ĩñeepe hei: Ajukapo avishare ñyngareko'ihea haivi avisha opapo ñymomohẽ.

³² Tẽvã akuerajymarã ahapokui pynonderã Galilea kyty.

³³ Pedro heishu: Ajemaĩpo opa ndyreja reta tẽvã she aryrejããpokui.

³⁴ Jesús heishu: Ãñete hai nde, ko pỹntu ndeiteri uru ñeerã, mbahapyjypo rerekui shykuambaa.

³⁵ Pedro heishu: Ajemaĩpo ãmano jyve nendiekui, ãrĩñomiãpokui. Hãrã opaiteva mboireare kyrãpavẽi heijyre.

Jesús ñymboi Getsemanipe

³⁶ Haivi Jesús oho hãndi mboireare Getsemani he'iashuape. Hãrã heishu reta: Kopẽĩ pimekui, kutymipo aha airureshu Tũpa.

³⁷ Hãrã raha Pedro hareka mokue Sebedeo tayre. Haivi õñepyrõ ñãndu'ijehe vyamba.

³⁸ Heishu reta: Shyrykovepe ãĩñymbasy, ãñandu ãmano verã rãĩmi. Kopẽĩ pime hareka avy peche shyhevikui.

³⁹ Hãrã Jesús ohoposhy tynonderã, ĩñesu hova mbojapeve yvyre, hareka jurureshu Tũpa: Sheru, katuãra rỹmbyhasa shyhevi ko ñymbasykue. Tẽvã avy tiko she aipotava, koñeĩ tiko nde ripota.

⁴⁰ Haivi oujy mboireare'õpe hesha opa oche reta hãrã heishu Pedro: Katu'ãĩteira pysarekotẽ pẽĩve, pente ora?

⁴¹ Pysareko rãngapo avy peche hareka pirure, mahẽ peakui mbai porãmbape. Aikuaa pynykyrẽytẽ mbai haikaviva pijaporã, tẽvã pyndyroo kãngy.

⁴² Hãrã hykuãĩ mokueheare kyrãĩ oho jururejy: Sheru, katũã rymbyhasa shyhevi ko jepy'apyrã, japo nde ripotava rãĩmi.

⁴³ Haivi oujyrã, hykũãi hesha mboireare opa ochejy reta hypehyiterã.

⁴⁴ Haipema hejashu reta hãrã ohojy mbahapyhearema jurure verã, hykuaĩ hei vekua rãĩmi heijy.

⁴⁵ Haivi Jesús oujy mboireare'õperã heishu reta: Ã'ẽ katuma peche hareka puputu'u. Vãhẽma ora, kuareta Tay mẽ'ẽhã verã mbai porãmba japo'iare ipope.

⁴⁶ Pupũ'ã, jahajyvy, shara ouma shymeẽ verã.

Jesús pysyharã vekua

⁴⁷ Jesús ijetateri ẽvã, vãhẽ ou Judas 12 mboireare penteva, heta ou hãndi kuaretare jykyse puku'iare hareka yvyra ryheve. Pai juhuvisha hareka kuakuavare israelpe'õre mondoshuare.

⁴⁸ Judas, pyrypysykava mbeuvãĩshu reta pente hã'ãngavape japo verã: Hovape apytevapo haikui, pypysykui.

⁴⁹ Hãrã ñymboja Jesús ẽvãperã heishu: Pyrỹmboi'ia, nypỹntumara! Haipe hovape pyteshu.

⁵⁰ Jesús heishu: Shi'ĩrũ, mbaivara reru? Haipe kuaretare ou pysy Jesús, hãrã raha mbypereso.

⁵¹ Haipe Jesús ñi'ĩrũ penteva, jykyse pukuva hekyrã jasyjashi pai ruvisha jokuereirea nambi hyvaisho.

⁵² Jesús heishu: Ñonojy ndykyse pukuva hyrupe. Opaite kyse puku poryva, kyse pukupẽĩpo jukahajy.

⁵³ Rikuãra katuĩ airure jyveshu Sheru, aipotarã hai katupo mbou 12 õ ñymbatyva jokuevare?

⁵⁴ Akuarã, mãrãrapo opa iko Tũpa ĩñeepe heiva, kyrã ñõĩte iko verã?

⁵⁵ Hãrã Jesús heishu kuaretare: Marã'ĩrãra kyse puku hareka yvyra ryheve pei shypysy verã, manarõ'ia rãĩmi. Opa ara rãnga avapy pynymbyteipi tũpaope apyrỹmboirã, tẽvã mbairãmba shymby peresopiva.

⁵⁶ Tẽvã opava kova iko'ẽ hekope, Tũpa ĩñee mbeu'iare hei vekua Tũpa ĩñeepe. Haivi mboireare opa hejashu Jesús hã'ẽĩ.

Jesús rahaha Judio juhuvishare hỹnonde

⁵⁷ Hãrã Jesús mbyperesovare rahashu pai vasu Caifas hentape. Moisés mbypara vekua pyrỹmboi'iheare hareka kuakuavare ñymbatyse'õpe.

⁵⁸ Tẽvã Pedro mbyryivi oho haykue pai vasu hoo ipeve, hesha verã mãrãrapo japo reta Jesús.

⁵⁹ Hãrã pai juhuvishare hareka kuakuavare ñymbatyse'õpe, heka ñynõĩ mãrãrapo ñee ãñetemba poryhe reta, ñono vaishu verã Jesús hareka jukaka verã.

⁶⁰ Tẽvã, mba'ẽã heshahe reta hetate'ẽ japupe ou heihevare:

⁶¹ Kova kuimbai hei vekua, “Mbahapy arape opapo aity Tũpa hoo hãrã mbahapy arape amupũãpojy”.

⁶² Hãrã haipe pai juhuvisha vasu pũãrã heishu Jesús: Mba'ẽã rapo rere? Mbaivara hei ñynõĩ ndyreheva?

⁶³ Tẽvã Jesús jasakaĩ'i. Haipe pai juhuvisha hei jyshu: Tũpa hykove'ia heepe mbeu ore, ndera hai Cristo Tũpa tay?

⁶⁴ Hãrã Jesús heishu: Kyrã rãnga, nde rereva rãĩmi. Hãrã haijy pee, pyheshapokui kuareta Tay vapy, Tũpa ñymbaikatuveva jakata kyty hareka ouma vate araivi avãpyntupy.

⁶⁵ Haivi pai juhuvisha vasu myndoro mondevarã hei: Ko kuimbai ijeta porããhe Tũpa, mbai rehera jahekapojy mbeu kavi verã? Pee rãnga pyhenduma heihe vekua Tũpa.

⁶⁶ Mãrãra pere jyve? Hãrã haire hei: Ĩmere mbai porãmba japo vekua, hãrã manopo.

⁶⁷ Hãrã myndyvy jyre hovare hareka nũpa, ĩrũ reta katy hovaipi nũpashu.

⁶⁸ Hei jyreshu: Nde haiva Cristo? Mbeu, mbavara nunũpa'ẽ!

Pedro ñomire kuava Jesús

⁶⁹ Haipe Pedro vapy'ẽ katuape, hãrã pente taupe pai juhuvisha jokuerea oho hyvacherã heishu: Nde rãnga rikori jyve hãndi Jesús, Galileava.

⁷⁰ Tẽvã Pedro ñomire opavare hyvacherã hei: Aikuããny nde rereva.

⁷¹ Haivi Pedro ohojy õche kytyrã, taupe jokueharea ĩrũ hesharã heishu haipe'õre; ko kuimbai rãnga iko'i jyve hãndi Jesús Nasareno.

⁷² Pedro ñomijy hãrã ĩñee meẽvape hei: Tũpa heepe hai aikuambava ko kuimbai.

⁷³ Hãrã haipe'õre ou Pedro hyvacherã heishu: Añetẽĩte, nde hai jyve hai ryhevare, jykuaa ndyrehe niñee ryheve.

⁷⁴ Pedro õñepỹrõ jypejurã hareka meẽ ĩñeerã, hei: Aikuãã rãngashu ko kuimbai. Hãrã haipe uru ñyrãã.

⁷⁵ Haipe Pedro mãnduahe Jesús heishu vekua rãĩmi, “Ndei uru ñyrãrã mbahapyjypo shiñomikui”. Pedro õhẽ katuaperã jaheote'i, shara mbasyiterã.