Mateo 25 - NandevaBiblia

Jesús ijeta he 10 kuñatãire

¹ Hãrã ko huvisha vasu vate arapy'õ, ovapokui 10 kuñatãi hekyva ñymbai sapekare ñandype hareka oho verã omendavape, mi'ĩrũ verã temerã.

² Ko kuñatãi mbytepe 5 ẽẽ kuamba ijupeare hãma 5 ĩrũre kua'ihaivare.

³ Ko kuamba'ijupeare raha tẽvã ñymbai rẽndyka, rahããhipi ñandy ãmoikui opashirã,

⁴ tẽvã kuaa ijupehaivare, raha ñymbai rẽndyka hareka ñandy hyru ryheve.

⁵ Hoka temerã ỹrẽ'ã vãhẽrã, kuñatãire opa hypehy reta hareka opa oche.

⁶ Pyharembyteipimarã, sapy'ãĩ ñyhendu pente sapukerã heiva: “Ouma temerã. Pei pymãihe”.

⁷ Haipe sareko 10 kuñatãi myhendy tivisha verã ñymbai rẽndykare.

⁸ Ko 5 kuamba'ijupevare hei 5 kua'ihaiva retape: “Pimbijao jyve ore piniñandy, shara yrỹmbai rẽndyka rãnga oveserima”.

⁹ Kua ijupe haivare heishu reta: “Mba'ety, kyrãrã opaitevapo mbaimbape japytakui. Pekua peva pã'ãporã”.

¹⁰ Hãma 5 kuñatãi kuamba ijupevare oho heka ñandy ova verã, vãhẽ ou temerã, ĩrũ kuñatãire kua ijupe haivare iche hãndi temerã, hãrã haivi õche ñymboty.

¹¹ Haivi, oujyma reta kuñatãi jyraha mba'ovavarã hei: “Sheja, Sheja, pea ore õche”.

¹² Tẽvã hai heishu reta: “Ãñeteĩte hai pee, she apyrykuãã”.

¹³ Haivi Jesús hei: “Pysareko katupeĩ, hareka avy peche shara pikuãã ara hareka ora kuareta Tay oujy verãpe”.

Ñee ñimbivache kyrypoti ryheva

¹⁴ Kova huvisha vasu vate arapy'õ ryheva, ova pente kuimbai ohopo'õ ynga tentape, haipe hẽno jokuehareirea retape meẽshu verã kyrypoti ña'ãpovare.

¹⁵ Pentevape meẽ 5 mil nikere, hãrã ĩrũ 20 mil, yngava retape meẽ 10 mil pepenteĩ hipity kavishu verã. Haivi oho mbyry.

¹⁶ Ko jokueharea 5 mil nikere ĩmere vekua, mymba'apoka hareka 50 mil kyrypoti hipityjyshu.

¹⁷ Kyrãi jyve ĩrũ 2 mil ĩmere vekua, 20 mimoñajy kyrypoti.

¹⁸ Tẽvã 10 mil ĩmere vekua, oho manaroshu ija jokuereaivirã haivi raha ñoty yvykuape.

¹⁹ Heta arama hasarã ko pyrokue'õvã oujy, hãrã jururejyshu jokuehareireare oreveshu vekuare.

²⁰ Tynonde vãhẽ ou 50 mil mẽ'ẽashu vekua haipe meẽjyshu 50 mil ĩãrẽve hãrã hei: “Sheja, 50 mil rãnga rỹmeẽ she, hãmã ko'ẽ, aru 50 mil ĩãrẽve amimoñajyva”.

²¹ Pyrokue'ia heishu: “Haikavite, nde hai jokuehareirea heko kaviva hareka jyrojahaheva; shara rĩngareko kavihe mĩshĩ ameẽndeva hãrã hetavepo ameẽjynde, iche vya shendie”.

²² Haivi ou jokuea rea 20 mil ĩmere vekua hãrã hei: “Sheja, 20 mil rãnga rỹmeẽ she, hãma arujynde 20 mil ĩãrẽve amimoñajyva”.

²³ Pyrokue'ia heishu: “Haikavite, nde hai jokuehareirea pya kaviva hareka japumbaa; shara rĩngareko kavihe mĩshĩĩ ameẽndeva hãrã hetavepo ameẽjynde, iche vya shendie”.

²⁴ Haivi vãhẽ ou jokuearea 10 mil me'ẽãshu vekua, hei pyrokue'iape: “Sheja, she rãnga aikuaa nde hai kuimbai heko pyatãtava, rỹmynõõ rĩñotymbape hareka rỹmbaty rỹmomohẽmbaipi.

²⁵ Hãmẽ rãnga akyje hareka araha añoty yvype ndy kyrypoti, ko arujynde na'ãpova”.

²⁶ Haipe ko pyrokue'ia hei: “Jokuehareirea ñarõva, ñatẽyva, rikuamba amynova ãĩmitymba aivaipi hareka ambaty ãmomohẽmbaipi.

²⁷ Kyrãrã riñonotẽ verã kyrypoti natũhã'õpe, me'ẽãjyshe verã aijymarã shyrẽtape”.

²⁸ Hãrã hei haipe'õ retape: “Pyhekyshi ko 10 mil hareka mẽe 50 mil ĩme revape.

²⁹ Hoka ĩmereva, me'ẽãveposhu hareka hembypojyshu; tẽvã hoka mba'etyrea, hekyaveposhi mishĩĩ ĩmerevaivi.

³⁰ Ko jokuehareirea mã'ẽrãmba'iany pymohẽ, mymondo katuape pỹntuvape jaheo hareka hãĩ opa puru verãpe”.

Ñimbivache japyhea opaite tenta rehe

³¹ Kuareta Tay oujyma hĩmbipekue ryheve opaite jokuevare hãndirã, vapypokui jyvapyka hĩmbipevapy vate arapy.

³² Opaite tenta reta mbatyhapo hỹnonde, hãrã hai hykypo ijuhuvi avisha ñyngareko'ihea rãĩmi heky jy'avishare kavarare mbyteivi.

³³ Ñonopo jy'avishare jakata kyty hareka kavarare jasu kyty.

³⁴ Haipe mburuvisha heiposhu jakata kyty'õre: “Pei Sheru ohovasashu vekua, piche ko Mburuvisha vasurã vate araivi mỹhẽva'ẽpeva Tũpa japorãvãĩ ko yvy'ĩãrẽ.

³⁵ Shara shimbahy'airã pee shymyngarupi, shu'uherã shymbyupi; mbyryivi ouva rãĩmi airã shymyvahẽ kavipi pynyrẽntape.

³⁶ Shynani'airã pee shimimondepi vekua; shymbairasyrã pee shiñandupi vekua, ãime'ãĩ shymbyperesoavaperã peiva shy rẽndape”.

³⁷ Haivi po heko kavivare heishu: “Yreja, mbaipera ore ndyreshaha nimbahyrã hareka nymyngaruha hãndi ndu'uherã nymby'uha?

³⁸ Maĩrã, mbaipera ore heshaha mbyryvatẽvã hareka myvãhẽhã ỹrỹrẽtape hãndi nynaniteireirã, nimimondeha?

³⁹ Mbaipera ore ndyreshaha nymbairasyrã, hareka nymbyperesoarã, hãndi ohoha ma'ẽã ndyreherã?”

⁴⁰ Hãma mburuvishavasu heiposhu reta: “Añetevape haipee, hokava pijapo vekua pente kova shyryvyre mishiveva rehe, Shyrehe opa pijapo jyve”.

⁴¹ Haivi mburuvishavasu heipo jasu kyty'õ retape: “Pysyry shyhevi, pee pimepẽĩva Tũpa ñunũpa'ipe; pekuape tata opamba'õpe myhẽvãha Ãña hareka jokuereare pevarã.

⁴² Shimbahyrã pee shymyngaruãpi, shu'uherã yy pyme'ẽã she;

⁴³ mbyryivi airã, shymyvãhẽãpi pynyrẽtape. Shynani'airã pyme'ẽãshe amonde verã; shymbairasyrã hareka shymbyperesoarã, pehoãã pymaĩ shyrehe”.

⁴⁴ Haipe haire heiposhu: “Yreja, mbaipera ore ndyreshaha nymbahyrã, ndu'uherã, maĩrã mbyryvanderã, nynanirã, ñymbai rasyrã, nymbyperesoavape, hareka nymboryhambava?”

⁴⁵ Mburuvisha heiposhu reta: “Ãñeteĩte haipe, hoka pijapo mbavekua pente mishĩveva rehe, pijapoã jyve shy rehe”.

⁴⁶ Harã kovare ohopokui ñunũpa opamba verãpe, tẽvã heko kavivare ohopokui tykove opamba verãpe.