Mateo 24 - NandevaBiblia

Jesús mbeu tũpao opa mbaia verã

¹ Jesús õhẽjy tũpaovirã, ohojyma'ia, mboireare ou ẽvãpe mbyheshaka verã oo vate'õvã tũpaore.

² Jesús heishu reta: Pyheshara opaiteva kova? Ãñete hai pee, penteãpo pytakui ita jyvohy'õ. Opaitepo oarã ñymbai.

Jehu verã ara opama potarã

³ Haivi oho reta ñũũ olivo he'iashuape, Jesús vapy haipe, hareka mboireare ñymboja hai ẽvãpe. Haipe hã'ẽi'õpe pyrãndushu reta: Pota rãnga kuaahave mãrãrapokui vãhẽma reijy verãperã. Mbaivarãnirapo heshahakui vãhẽma hokava arape?

⁴ Jesús heishu reta: Pymãĩkavikui, avy pyma'ẽĩhe mbava pynymbytavykui.

⁵ Shara hetapo'ẽ shyreepe ou heipe verã: 'She hai Cristo', hãrã hetapo'ẽ mbytavyva.

⁶ Pyhendupo iko ñyrãrõvasu oparupi, tẽvã avypo pykyje. Kova mbai rãnga ikoñõĩpo, hokava ha'ẽã he'iseva vãhẽmava ara opa verã.

⁷ Pente tentavasu pũãpo ynga tenta vasure, hãrã opavare pũãpo ijehe. Opa rupipo ẽẽ ñymbahyvasu hareka yvy ryry.

⁸ Kova opaite haipo õñepyrõhea ara jahasa'asy verãpe.

⁹ Haivi pypysyapo pynymbyperesoa verã, hetapo jyvavareha pyndyrehe, pukahapo hareka opaiteva kuaretare pyndyreshatããpo shyryhevaperã.

¹⁰ Hoka arape, hetapo'ẽ jyroja shyrehevare, poi jyroja shyrehe verã. Hokavare jyhaihuveamapo reta, õñehãpo ijity verã mburuvishare ipope.

¹¹ Hetapo'ẽ Tũpa ĩñee mbeu'iare japuva, hareka hetavapepo mbytavy.

¹² Oparupipo ẽẽ mbai porãmba vekua, hãrã mba'etymapo jyhaihuva, ijaihuva rãĩmi.

¹³ Tẽvã tãtangatu ẽẽva japypeve, ohojepepokui.

¹⁴ Kova Ñee Kaviva Mburuvisha vasurã vate araivi ouva ryheva, opa rupiipo mbe'uha ko yvy jerekue, opa henta'õre hendu verã. Haiperãpo, vãhẽkui ara opa verã.

¹⁵ Pyheshama ko mbai porãmba'eite vekua ẽẽ kyamba'ẽvãpe, Tũpa ĩñee mbeu'ia Daniel heiva rãĩmi. Henduva ko he'iava, tikuaa mbaivara he'ise.

¹⁶ Hokava pyheshamarã, Judeape'iare ãrẽ'ãite toho tiñemi ita vate ouvaipi.

¹⁷ Oo ĩãrẽ'iva, avy tyvejy nohẽ verã maĩnunga hoo'ivi.

¹⁸ Ñuuhupi'ia, avy toujy raha verã mondeva.

¹⁹ Tengapokui taupere purua'ia hoka arape, hareka memby kambu'iare!

²⁰ Pirureshu Tũpa avy tikokui kova ara ro'yma'iape, hareka putu'uava jy'arape.

²¹ Hãma hetapo iko jyhasa'asy, hasa'asymbateria rãĩmi ko yvy oñepyrõrãvãĩ, hareka ko rãĩmiva jyhasa'asy maipivẽamapo jehukui.

²² Hãrã Tũpa mykoĩpĩã kova ara, jyrojaheare reherã, mbavẽapo ohojepekui. Hai pyhyrõvare haihu rupii rãnga mykõĩpĩpokui.

²³ Hãrã hoka arape ĩme'ẽ heipeva: “Kõõ ẽẽ Cristo” maĩrã “Hooka'i”, avy pyroja.

²⁴ Shara hetapo Cristo rãĩmi ñymyhã'ãnga ouva, hareka Tũpa ĩñee mbeu'ia japuva. Hetapo mbaikavi heshahava japokui, mbytavy verã Tũpare jyroja retaivive, katurã.

²⁵ Ãmbeu'ãiĩpe kova, ndei ikorã.

²⁶ Hãrã ĩme'ẽ heipeva: “Mesia ĩme'ẽ yvy ikoambaipi”, avy pekua. Heiperã: “Koo rãnga ñemi'i, avy pyroja”.

²⁷ Verava heshava rãĩmi kuarasy ichea kytyve, kyrãpokui vãhẽma ara kuareta Tay oujy verãperã.

²⁸ Tã'õvẽ ẽvãpe, opa jaty vyrachevasure.

Ara opamarã jehu verã

²⁹ Ara jyhasa'asy hasamarã, kuarasy ovepokui, jasy sapeveamapokui, jasytatare opapo oakui vateivi, hareka ara vate'õre opapo ryry.

³⁰ Haipe, heshahapo vate arare heshakava kuareta Tay, oumarã. Haivi kyjerã, opa yvy'ĩãrẽ tenta ijare jaheopo shyresha aima ãvãpỹtupyrã, mbaikatu hareka hĩmbipe ryheve.

³¹ Ñyhendupo mimbyvasukue hỹnatu ipuva, haivi ãmondopokui ajokuevare mbaty verãre shyryhevare opaite yvy jerekue, ara japyivi opapeve.

³² Pikuaashi kova ñee ñymyhã'ãnga igo jypy ryheva: Hãka hoky py'ahuma'ẽjyrã, pikuaakuei ara haku vãhẽserimarã.

³³ Kyrãpo jyve, pyheshama kova opa ikorã pikuapokui vãhẽserima, She kuimbai rãĩmi ai vekua, õchepema ẽẽrã.

³⁴ Añeteĩteva haipe: Kova mbai opapo ikokui ndei opa mano ã'ẽ ikoteri'ia retarã.

³⁵ Ara hareka yvy opapokui, tẽvã shiñee opããpokui.

³⁶ Tẽvã mbai arapera hareka mbaipeitera, mba'ety kuava, Tũpa jokueva retamba kuaa verã hareka Taymba kuaa verã, koñeĩpo kuaa Sheru.

³⁷ Noe ikoteri yvy'ĩãrẽrã arape rãĩmipo, jehukui kuareta Tay oujymarã.

³⁸ Hoka arape ndei ãmavãsurã opava iko, karu, ñymbyu y hareka omenda jyre, Noe ichepeve varko vasupe.

³⁹ Hãrã ñymoãmba ñynoi vekua, ou ãma vãsurã opaite juka reta. Kyrãipo jyvekui kuareta Tay, oujymarã.

⁴⁰ Hoka arape, mõkue kuimbai ĩmepo'ẽ ñuupe, pentepo rahashi ĩrũpo hejaha.

⁴¹ Mõkuepo taupe avati mungui ñynoĩ, pentepo rahaha, ĩrũpo hejaha.

⁴² Pymãi kavipeĩ, shara pikuãã mbaipera oujypo Peja.

⁴³ Pyreko kova pankape: Pente oo ija kuaa mbaipera ichepokui ho'ipe manarõ'iarã, hai ocheãpo hareka ma'ẽĩãpohe ho'ipe manarõshu.

⁴⁴ Tẽvã, pẽĩ kavipopeĩ, shara pimoãmbapeĩvape, kuareta Tay oujypokui.

Jokuearea heko kaviva hareka heko porãmba

⁴⁵ Mbavara jokuearea jyrojahea hareka heko kaviva? Hai jokue'õ ñono ipope opaite ĩrũ jokuehareireare myngaru verãre ikotẽvema ñynoirã.

⁴⁶ Vy'apo jokuehareirea, jokue'õ oujy hesha opakavi japoshu heishuvarã.

⁴⁷ Añeteĩteva haipe, oo'ija opaiteapo ñono ipope ña'ãpovare.

⁴⁸ Tẽvã jokuehareirea heko porãmbavarã, pya mbijetarã mõãte jokue'õ kỹypo ohorã,

⁴⁹ õñepyrõ jyvavarehe hapishare, hareka õhẽ karu, hou hãndi kau'iare,

⁵⁰ haivi jokue'õ oujypo, hai ñymoamba hareka hãrõmba'ẽ vekua,

⁵¹ jokue'õ ñũpa pohyposhu hareka mondopo hova mokue'iare ẽvãpe. Hãrã haipepo jaheo hareka hãĩ mbupurupo'i.