Mateo 23 - NandevaBiblia

Jesús mbeukavi fariseo hareka Moisés mbypara vekua pyrỹmboi'iheare

¹ Haivi Jesús ijetashu kuaretare hareka mboireare hãrã hei:

² Moisés mbypara vekua pyrỹmboi'iheare hareka fariseore kuaakavi hai reta pyrỹmboihe verã Moisés mbypara vekua.

³ Hãrã pyhẽndushu hareka pijaposhu haire heiva; tẽvã avy pijapo haire japova rãĩmi, shara haire heiva japoã.

⁴ Ñapĩnti mbai pohyva katumba jajepyhea hãrã ñono kuaretare ñyvãpenkare, tẽvã mupuãjy verã haire penteĩmba ẽẽshua ipo my'õmyva.

⁵ Hãrã haire opa mbai japovare kuaretare hesha verãĩ. Syvare ñono hareka jyvare, vakapi haikaviveva japymi Tũpa ĩñee; hareka mondevare pukuhe.

⁶ Hãrã haire pota vapypy vapyhahea mashyãva ñymyngaruha'õpe hareka Judiore ñymbaty'õpe,

⁷ hareka potaĩ marãnduhashu reta karai vasure rãĩmi vataha õĩpi, hãrã kuaretare heihe verã pyrỹmboi'ia.

⁸ Tẽvã pee avypo kuaretare pynymbyhee pyrỹmboi'ia, shara pee pente'ovare hãrã pyrỹmboi'ia rãnga penteĩ'ẽ, hokava hai Cristo.

⁹ Hãrã avy mbavape pyheno sheru ko yvy ĩãrẽ, shara penteĩ'ẽ pee Ru vate arapy'õ.

¹⁰ Avy piñymbyhee mburuvisha, shara koñeĩ Cristo hai punduruvisha.

¹¹ Hãrã vateve ia pynymbytepe jokueha rea rãĩmipo jokueha jyve.

¹² Hãrã pota vateve ĩñyñonova mba'ẽãpo hai, tẽvã õñemomishĩva haipo vateve ñonõha.

¹³ Tengapope Moisés mbypara vekua pyrỹmboi'iheare hareka fariseore, hova mokue'iare! Pymbotypiva huvisha vasu vate arapy'õ ryheva hõche potãã yngavare icherã, hãrã peeave picheã jyve hareka pyma ẽĩahe iche pota ichevare.

¹⁴ Hãrã pypavetepokui pyrỹmboi'ia hareka fariseore hapishatamba'iare! Pyheky piva ĩme manoshiare hoo haivi pymbyhasa verã puku rã ãngaĩ pirure. Hãrã pee pipity pokui ñunũpa pohyveva.

¹⁵ Tengapope Moisés mbypara vekua pyrỹmboi'iheare hareka fariseore, hova mokue'iare! Peho opa rupii ko yvy'ĩãrẽ hareka yyvasu hỹmbeyipi pyheka pyndyryhevarã hãrã hokava pijapomarã pijaposhi Ãña tay mokuejy pyndyheviva.

¹⁶ Tengapope pyrỹmboi'iare kũvãĩpi heshamba! Pereva: “Ĩme'ẽ ĩñee meẽva tũpao heepe, hokava mba'ẽã hai, hãrã ĩñee meẽva ita vera ijuva tũpaope'õ reherã, japoñoĩpo ĩñee”.

¹⁷ Pee mbaimba kuavare hareka heshamba kũvãipiare! Mbaivara haikavive, ita vera ijuva maĩrã tũpao ita vera ijuva hapype'õre mbyhaikaviva?

¹⁸ Pee pere jyve: “Ĩme'ẽ ĩñee meẽva altar tũpaope õ rehe, hokava mba'ẽãshu; tẽvã ĩñee meẽva Tũpape me'ẽãva altar ĩãrẽ õvã reherã, hokava japopo hai ĩñee”.

¹⁹ Pee tykove mbaimba kuaava heshamba kũvãĩpiare! Mbaivara haikavive: Ofrenda maĩrã altar, ofrenda mbyhaikavivara?

²⁰ Hãrã ĩñee meẽva altar rehe, me'ẽã altar reheĩ, meẽ jyve ĩñee opaite altar ĩãrẽ'õ rehe.

²¹ Ĩme'ẽ ĩñee meẽva tũpao rehe, ĩñee ha'ẽã tũpaoreĩ ĩñee meẽva, ĩñee meẽ jyve Tũpa haipe'õ rehe.

²² Ĩme'ẽ ĩñee meẽva vate arapy'õ reheva, ĩñee meẽ jyvehe Tũpa vapypya rehe hareka Tũpa haipe vapy'õ rehe.

²³ Tengapope Moisés mbypara vekua pyrỹmboi'iheare hareka fariseore, hova mokue'iare! Pymeẽva diesmo Tũpa pevarã piñotyva, menta, anis hareka komino, pyndysarehe Tũpa hei vekua pyrỹmboi'ia ikova rãĩmi pikotẽ verã, hekope kavi'õ, jyparekokuepe hareka jyrojape. Haikavĩ rãnga diesmo me'ẽharã hareka yngava mbai japoañoĩpo jyve Tũpa heiva.

²⁴ Pee rãnga hai heshamba kũvãĩpiare raharea, yy peu verã pymbovashi ñatiũ tẽvã pente kavajuva opaĩ pymokue!

²⁵ Tengapope Moisés mbypara vekua pyrỹmboi'iheare hareka fariseore, hova mokue'iare! Pijoheva timbipory ĩãrẽ tẽvã pyndypyape tynyhẽ potaĩ pymanarõshu kuaretare hareka hetapyre maĩnunga.

²⁶ Pyhendu fariseore heshamba kũvãĩpiare: Joherãnipy yy ho'uapya hareka y'a, hãrã ky'ãpo jyve kupere.

²⁷ Tengapope Moisés mbypara vekua pyrỹmboi'iheare hareka fariseore, hova mokue'iare! Pyndy'ova tã'õve ñonoavape, ĩãrẽĩ mashyãva tẽvã hapype tynyhẽ'ẽ tykavẽkue hareka mãrãrãgãtuva porãmba vekua.

²⁸ Kyrãĩ jyve pee, pyndyreko kaviva rãĩmi heshaha pyrehe katuaivi kuaretare hỹnonde tẽvã pyndypyape tynyhẽ papishatamba hareka piniñarõkuevi.

²⁹ Tengapope Moisés mbypara vekua pyrỹmboi'iheare hareka fariseore, hova mokue'iare! Pumupũava Tũpa ĩñee mbeu'iare ñotỹhã vekuape hareka pymymashyã heko kavi vekuare ha'ãngakue.

³⁰ Tẽvã haivi perepi: “Jaikoteri ñanytynondevare araperã, ñaĩmembatẽ hãndi verãre Tũpa ĩñee mbeu'iare jukaha verãpe”.

³¹ Kyrã peii pimbeu pee haiva Tũpa ĩñee mbeu'iare juka vekua ñymoña hãndiare.

³² Pijapoĩ pyraha opaite pynytynondevare õñepyrũ japo vekua!

³³ Pee mboi rayre! Marãrapo peho jepeshikui ñunũpa tata vasuivi?

³⁴ Hãmẽãra amondopokui Tũpa ĩñee mbeu'ia pyrỹmboi'ia mbai kuaava. Tẽvã peepo pijuka hareka pymbysavava kurusure hai retavape, hãrã ĩrũre punũpapokui Judiore ñymbaty'õpe hareka pymoñapokui henta'ia retape.

³⁵ Kyrãpo opa oa pyndyrehekui pijapo vekua hareka heko kavivare jukaha vekuare ko yvy'ĩãrẽ, Abel heko kavi vekua manoivivee, Zacarías Berekias tay ñymanopeve, hai hokava pijuka vekua tũpaope hareka altar mbytepe.

³⁶ Ãñete hai pee, kova mbai porãmba ryheva pijapo vekua, opa ñõĩpo oa ĩãrẽ ã'ẽva kuaretare.

Jesús hãpĩrõre Jerusalén

³⁷ Jerusalen, Jerusalen, rijukava Tũpa ĩñee mbeu'iare hareka pijapiva ikuimbai Tũpa mbouvape! Mbovy jyramba potatẽ ambatyva ndyrayre, uru membyre mbatyva rãĩmi hypepo ipe, tẽvã ripotã!

³⁸ Hãrã nderokuemi kyrãĩpo hejaha.

³⁹ Hãrã hai pee kova shyreshaveãmapokui vãhẽpeve ara perepi verã: “Tojehovasa vasu ouva Ñandeja heepe”.