Mateo 22 - NandevaBiblia

Ñee ñymyhã'anga omendava ryheva

¹ Jesús poryjy ñee ñymyhã'ãnga ijetajy verã opavape. Heishu reta:

² Huvisha vasu vate arapy'õ rãnga ova mburuvisha japova karuvasu tay omendapo'ẽrã.

³ Mondo jokuehareirea hẽno verã opaite hai hẽnokavare. Tẽvã haire ñateỹ jyveru.

⁴ Hykuaĩ mondojy jokuehareirea retarã, heishu reta: “Pymbeushu opaite tou reta ãhẽnokavare, opama ẽẽ hou verãre, pymbeushu reta ajukakama shurũmba kyrava”.

⁵ Tẽvã opaite jurureshu vekuare ou verã mba'ẽã kuahase ñynoĩ. Penteva oho maĩhe jy'yvy, ĩrũ oho mba'ova,

⁶ ĩrũ hembyvare opa oushurã pysy reta jokuehareirea mburuvisha vasu jokueva, heta nũpa retarã juka.

⁷ Haipe mburuvisha poshyite'irã, mondo ñysyndarore opa juka verã jokueva juka vekuare hareka opa hapyshi verãre hentare.

⁸ Haivi heishu jokuehareireare: “Opaitema ẽẽ jykaruvasu shyray omenda verã. She airuretẽshu ou verã retava, tẽvã jave'ãĩ haire sherope ou verãre.

⁹ Hãrã pekua oparupii pyheshava pereshu ou verã jykaru vasupe”.

¹⁰ Haipe jokuehareireare opa rupi jyraha mbaty heshavavive, heko kavi hareka porãmba opaite oho, kyrãĩ mynyhẽ reta oo.

¹¹ Hãrã mburuvisha vasu iche hesha verã ouvare, haipe hesha pente kuimbai mondembava omendavare ẽvãpe mondeava.

¹² Heishu: “Shi'ĩrũ, mãrãra riche kope rỹmondemba omendavare ẽvãpe mondeava?” Ko kuimbai jasakãi'i.

¹³ Haivi mburuvisha vasu heishu jokuereare: “Pijokuashi ipy hareka ipo, pymombo katuape pyntuvape, haipe tijaheo hãĩre tyrorokua ijehe”.

¹⁴ Jesús poi ijeta verã hei: Hetavape rãnga hẽnoha, tẽvã mbovyi'ẽ pyhyrõãvare.

Tũpa ña'ãpova hareka mburuvisha ña'ãpova

¹⁵ Fariseore ijeta ijupi retarã pente ñeepe ñynoĩ pysyka verãre Jesús, hareka heivare ñonovaishu verãre.

¹⁶ Fariseore mondo mboireare hareka Herode ẽẽ hãndiare. Heishu reta: Pyrỹmboi'ia, kuaa rãnga añeteva rỹmbeurã, hareka hekope kavi rymboi Tũpa hape. Kuaahaĩjy rymbyvapyã ndijehe, he'iandevarã, hãndi rỹma'ẽãvãĩjyhe marãvara.

¹⁷ Pota kuaaha mbaivara rereshu kova: Haikavira mẽ'ẽhãshu kyrypoti mburuvisha vasu Cesar Romape'õ, maĩrã mba'etyva?

¹⁸ Jesús kuaa potai kyrãĩ hei jyreshurã, heishu: Pee hova mokue'iare! Marã'ĩrãra pota shiñono porããpi?

¹⁹ Ñamaĩheno, kyrypoti kuei pymẽ'ẽsea. Haivi verushu reta nikere denario he'iashua.

²⁰ Jesús maĩherã pyrãndushu reta: Mbava hã'anga hareka mbava heera ẽẽhe?

²¹ Haire heishu: Huvisha Cesar. Jesús heishu reta: Akuarã, pymeẽshu mburuvisha vasu ña'ãpova, hareka Tũpape, Tũpa ña'ãpova.

²² Hendu hokavarã opa mbyrymaĩ reta. Haipe hejashurã opajy oho reta.

Ñypyrãndu kuerajya ryheva

²³ Hoka arapevaĩ Saduseore oho reta Jesús ẽvãpe. Saduceore rojããmba hai manova kuerajy verã, hãrã heishu reta Jesús:

²⁴ Pyrỹmboi'ia, Moisés rãnga heja kuatiape, pente kuimbai manoshi hyreko membymba vekuarã, tyvypo rekojy hyrekokue mimoña verã tichey mano vekua.

²⁵ Iko rãnga aryka'e 7 kuimbai pente'iare. Tynondeiteva omendateã mano, hyreko membymba vekua, hãrã tyvy omendajyhe.

²⁶ Kyrãi jehu jyveshu mokuehea hareka mbahapyhea, hipitypeve kõñẽmahea.

²⁷ Haivi kõñeitema hea mano jyve taupe.

²⁸ Hãrã manovare puãjymarã, mbavara pokui ko taupe, hyrekoite ko 7 iare omendãã hevekuare mbytepe?

²⁹ Jesús heishu reta: Tivisha rãnga pijavy. Pee pikuãã Tũpa ĩñee maĩrã Tũpa ñymbaikatu.

³⁰ Mba'erã manovare puãjymarã, kuimbai hareka taupe omendaveãmapo ijehe. Ikoposhi reta, Tũpa jokuevare vate arapy'õre rãĩmi.

³¹ Pyrojãã manovare puãjy verãrã, pikuãmba Tũpa heipeva? Hai heimba aryka'e:

³² “She hai Abraham, Isaac hareka Jacob ñu Tũpa”. Hai ha'ẽã manovare ñu Tũpa. Hykoveteri'iare ñu Tũpa rãnga hai.

³³ Hendu hokavarã, opavare hãĩrã hesha ko mbai Jesús pyrỹmboihea.

Ñee japoa verã mbaivasuveva

³⁴ Fariseore henduma Jesús opa mikuirĩrĩ saduceo retarã, ñymbaty jyraha Jesús ẽvãpe.

³⁵ Penteva, Moisés mbypara vekua opavee kuaava, ity verã pyrãndushu:

³⁶ Pyrỹmboi'ia, marãva ñee japoa verãra haikavive ñee mbyparahava japoa verãivi?

³⁷ Jesús heishu: “Haihu Ñandeja nu Tũpa ndypyaivive, ndykove ryheve hareka opaite ny'ãrãndukue ryheve”.

³⁸ Kova hai tynonde'õ hareka ñee japoa verã haikaviveva.

³⁹ Haivi haykue ouva ovajy, kyrãĩ hei: “Haihu ndapisha nde rijyhaihuva rãĩmi”.

⁴⁰ Kova mokue'õvaivi ñee japoa verã ẽẽ jyvehe Moisés mbypara vekua hareka Tũpa ĩñee mbeu'ia pyrỹmboihe vekuapy.

Mbavaivi ñymoña vekuara Jesús

⁴¹ Jesús ijeta fariseore jaty õperã.

⁴² Pyrãndushu reta: Mbaivara perehe Cristo? Mbavaivi ñymoñavara hai? Haire heishu: David.

⁴³ Haipe Jesús heishu reta: Marã'ĩrãra David Espiritu Santo rupii heishu: “Sheja”? David rãnga heimba:

⁴⁴ Ñandeja heishu Sheja: “Vapy shakata kyty, tãñono ndepy ẽvãpe ndyreshatamba'iare”.

⁴⁵ David teiva rãnga heishu. “Sheja”? Hãmerã marã'irã David ñymoña hãndiapojy?

⁴⁶ Haipe mbaveã mbai heijyshu. Haivivãĩ mbavea mbaiva pyrãndujyshu.