Mateo 20 - NandevaBiblia

Ñee ñymyhã'ãnga mba'apo'iare ryheva

¹ Huvisha vasu vate arapy'õ, ova koo ija õhẽva kõ'ẽĩ heka mba'aposhu verã ju'uva rẽndape.

² Opa ijeta kavi hãndi reta mba'apo verãre, hareka mbyhepyshu verã hoka arape pente nikere, haivi mondoshu reta ju'uva rẽndape.

³ Haivi kõ'ẽĩ nũnga õhẽjyrã heshajy ikorei'iare plazape.

⁴ Hãrã heishu reta: “Pekuã pymba'apo jyveshu uva rẽndape, hekope kavipo ãmbyhepypekui”. Hãrã haire opa jyraha.

⁵ Koo ija õhẽjy ara mbyteipima'orã, haivi ka'arumima ohorã kyrãĩi japojy.

⁶ Haivi ka'aruitemarã hykuãĩ õhẽ ohojy plazape, heshajy haipe mbaimba japo'õre, hãrã heishu reta: “Marã'ĩrãra pee pikorei mbaimba pijapopẽĩva?”

⁷ Haire heishu: “Mbaveã rãnga yrokue mba'apoha verã”. Haipe heishu reta: “Pekua pymba'apove shu'uva rẽndape, hekope kavipo ãmbyhepypekui”.

⁸ Pyntumarã, koo ija heishu ju'uva rẽnda ñyngareko'ẽheã: “Hẽno mba'apo'iare meẽshu reta japova hepykue. Tynõnde mbyhepyshu reta taykueite ichevare, tynondeite icheva retapo taykueite rymbyhepyshukui”.

⁹ Hãma jyveru ka'aruiterã ichevare, pente ara mba'apova rãĩmi pepenteĩ me'ẽãshu reta nikere.

¹⁰ Haivi vãhẽ jyveru jyve tynondeite ichevare, moãtẽ hetave me'ẽãshu hai retarã, tẽvã ĩrũre rãĩmi me'ẽã jyveshu reta pente nikere.

¹¹ Hãrã me'ẽãmashu mba'apoheare hepyrã, õñepyrõ ijeta porãã jyreshu koo ija.

¹² Hei reta: “Taykue icheva reta rãnga sapy'aiteĩ mba'apo, tẽvã rymeẽshu reta ore rymeẽva rãĩmi, ore rãnga ko ãño mba'apoava kuarasy hakupe”.

¹³ Tẽvã koo ija heishu penteva: Shi'ĩrũ, ajapoã rãnga ndyrehe porãmbava. Ja'ẽãra ijupeje ambyhepynde verã pente nikere?

¹⁴ Me'ẽãma rãnga nde rijapova hepy, ekuajy nyrẽtape. Potai ameẽ jyveshu taykue icheva ameẽ ndeva rãĩmi.

¹⁵ Katuãra she sha'ãpova ajaposhi pota ajapova? Maĩrã shypya kavirãra ndyposhy she?

¹⁶ Kyrãpo tynonde'õre mbytaykueha, hareka taykue'õre mytynõndeapo. Hetavape rãnga hẽnohã, tẽvã mbovyi'ẽ pyhyrõãvare.

Jesús mbeujy mano verã

¹⁷ Jesús oho Jerusalen kytyrã raha 12 mboireare hã'ẽĩ õpe, hãrã heishu reta:

¹⁸ Jaha rãnga jai Jerusalen kyty, haipe kuareta Tay mẽ'ẽhaposhukui pai juhuvishare hareka Moisés mbypara vekua pyrỹmboi'iheare, haire jururepo shukaha verã.

¹⁹ Haivipo shyme'ẽãkui haimba Judiovare ipope, ñymbyhory shyrehe verã, shunũpa hareka shymbysavavaha kurusure. Tẽvã mbahapy arapepo shykovejyrã ãpuãjykui manovare mbyteivi.

Santiago hareka Juan ishy jurureva

²⁰ Haivi ñymboja Jesús ẽvãpe Zebedeo hyreko, membyre hãndi Santiago hareka Juan, hãrã ĩñesu Jesús hỹnonde jurureshu verã pente mbai.

²¹ Jesús pyrãndushu: Mbaivara ripota? Hãrã taupe heishu: Aipota ereshu, kova shymemby mõkue'iare tyvapykui rẽivape mburuvisha vasurã, pente ndakata kyty hareka ĩrũ ndasu kyty.

²² Tẽvã Jesús heishu reta: Pee pikuãã pirureva. Pẽĩra pyhasa'asy verã, she ahasa'asy verã rãĩmi? Haire hei: Õĩha rãnga hasaha verã.

²³ Jesús heishu reta: Ãñete rãnga pyhasa'asypokui she rãĩmi. Tẽvã pyvapy verã shasu hareka shakata kyty sheeãpo ameẽpe, Sherupo meẽ hokava hai mỹhẽvã'ẽshua retape.

²⁴ Hãrã ĩrũre 10 mboireare hendurã, poshy jyreshu tyvyre mõkue'õ.

²⁵ Jesús hẽnoshu retarã hei: Pee rãnga pikuaa mãrãra jyrojambare yngava tenta juhuvishare, hareka mãrãra karaivasure reko'asyshu reta.

²⁶ Tẽvã pynymbytepe ha'ẽã kyrãĩ verã. Ĩme'ẽ pota vateve'ia pynymbyteperã, opava retapo jokuereiishu,

²⁷ hareka pota tynonde'ia pynymbyteperã, ikopo jyve jokuehareirea yngava retape.

²⁸ Kyrã, kuareta Tay oũã ñyngareko pyryrehe verã, jokueha'i verã rãnga jyve hareka meẽ verã tykove, mondo jepe verã hetavape mbai porãmbaivi.

Jesús mynguera mokue heshamba kuvãĩpia

²⁹ Hãrã Jesús hareka mboireare õhẽma tenta Jerikoivirã, heta'ẽ kuaretare ohova haykue.

³⁰ Mõkue heshamba kuvãĩpiare vapy ñynõĩ pe hỹmbeype. Henduma Jesús hai hasa ohovarã, sapuke jyre: Sheja, David Tay yryparekomĩtẽvẽ!

³¹ Heta'ẽ poshyshuare pota jasakarã, tẽvã haire hỹnatuve sapuke jyrerã hei: Sheja, David Tay yryparekomĩtẽvẽ!

³² Haipe Jesús oho ñymboyrã, hẽno mokue heshamba kũvãipiarã heishu: Mbaivara pipota ajapo pyndyrehe?

³³ Haire heishu: Yreja, pota rãnga heshaha jyve kũvãĩpi.

³⁴ Haipe Jesús parekoiterã pokoheshu hesare, hãrã haipevãĩ heshamba kũvãĩpiare, heshajy hareka jyrahahipi reta.