Mateo 2 - NandevaBiblia

Kuimbai ãrãndure jyveru pohyshu sanjay

¹ Jesús oa tijupa Belén he'iashuva yvy Judeape, mburuvisha vasu Herodes jy'arape. Akuape vãhẽ jyveru Jerusalenpe kuarasy õhẽaivi kuimbai ãrãndure,

² haire pyrãndushu: “Mapera ĩme'ẽ Judiovare juhuvisha vasu oava? Ore heshaha kuarasy õhẽakyty jasytata sape'ẽherã, hãrã ouha omomba'eashu”.

³ Mburuvisha vasu Herodes henduma kovarã, pya myngyjepy hareka opaite Jerusalenvare.

⁴ Hãrã mburuvisha vasu hẽnoka pai juhuvishare hareka jyve Moisés mbypara vekua pyrỹmboi'iheare, haivi pyrãndushu reta maperapo oa Cristo.

⁵ Haire heishu: Belén Judeape'õ, shara Tũpa ĩñee mbeu'ia kyrã mbypara:

⁶ “Nde Belén, Judeape rẽĩva, nimishivẽãmapokui mbavaivi tentare mbytepe. Shara ndyhevipo õhẽ mburuvisha vasu, ñyngarekohe verã shyrẽnta Israel”.

⁷ Haipe Herodes, ñemiapẽĩ hẽnoka karai ãrãndure. Hãrã pyrãndushu reta mbaipeitera hesha jasytata.

⁸ Haivi mondoshu reta Belenperã, heishu reta: “Pekua hareka pypyrãndu kavihe sanjay; pyvãĩshurã peijy pymbeushekui, aha ãmombaishu verã jyve”.

⁹ Henduma reta mburuvisha vasu heishuarã, karai ãrãndure jyraha. Hãrã jasytata heshavare kuarasy õhẽaivi, hỹnonderã ohoshu reta pytapeve sanjay ẽvãpe.

¹⁰ Ko kuimbai ãrãndure heshama jasytatarã, vy'a jyre.

¹¹ Iche reta oo iperã, hesha sanjay hareka ishy María hãndi. Haipe ĩñesu retarã, õmombaishu sanjay, haivi mbai hyru pea retarã, meẽshu ita vera ijuva, mbai pishekatuva hareka mirra.

¹² Tẽvã Tũpa kuaakashu reta jypaihupe, potamba ohojy verãre Herodes ẽvãpe, hãrã tape yngavaipi jyrahajy hentape.

José raha sanjay hareka ishy Egiptope

¹³ Ohojyma karai ãrãndu retarã, Tũpa jokueva José jypaihupe ijeshakashurã hei: “Pũ'ã, narẽ'ãĩte raha sanjay hareka ishy Egiptope. Haipe pytakui she ãrỹmarãndujypeve, shara Herodes hekakapo'ẽ sanjay juka verã”.

¹⁴ José sarekorã, hoka pyhareperavĩ raha sanjay hareka ishy Egiptope.

¹⁵ Haipe pyta reta Herodes manopeve. Kyrã jehu iko verã hekope kavi Ñandeja hei vekua, Tũpa ĩñee mbeu'ia rupii: “Egiptoivi ãheno shyray”.

Herodes jukaka sanjayre

¹⁶ Herodes kuama kuimbai ãrãndure mbytavyrã, pya poshyiterã, mondo syndarore juka verã sanjay kuimbaimi nde'iaveteri mokue ãño mbotyva, Belénpe hareka hyvache'õre, kuimbai ãrãndure mbeushua rãĩmi mbai arapera hesha jasytata.

¹⁷ Kyrã jehu, iko verã hekope kavi Tũpa ĩñee mbeu'ia Jeremías mbypara vekua kuatiape:

¹⁸ “Tenta Ramápe ñyhendu jaheo vasu; Raquel hãpĩrõtere membyre shara opa manoshi, hãrã katuã pya haikavi'ẽjy”.

José hareka María, jyrahajy Jesús hãndi Nazaretpe

¹⁹ Herodes manomarã, Ñandeja jokueva ijeshakashu José jypaihupe Egiptoperã heishu:

²⁰ Pũã, rahajy nysanjay hareka ishy, ekuajy tenta Israelpe shara ko sanjay pota jukareare manoma.

²¹ José pũãrã, rahajy sanjay hareka ishy tenta Israelpe.

²² José kuama Arquelao mburuvisharã ẽjy Judeape tuu Herodes hẽndakueperã, kyje ohojy haipe. Tẽvã Tũpa mbeushu jypaihupe oho verã Galileape.

²³ Vãhẽ jyraha haiperã, oho iko jyre tentami Nazaret he'iashuvape. Kyrã jehu iko verã hekope kavi Tũpa ĩñee mbeu'ia hei vekua: “Jesús mbyheeapo Nazareno”.