Mateo 19 - NandevaBiblia

Jesús pyrỹmboihe omendava poi ijuhuviva ryheva

¹ Jesús opa hei kova mbairã, õhẽ Galileaivirã hareka vãhẽ oho yvy Judeape, yy syryva Jordan kyty.

² Kuareta hetava oho haykue, hãrã haipe mynguera ñymbairasyvare.

³ Fariseore ñymboja Jesús ẽvape pyahãshu verãrã pyrãndushu: Katura mbaimba reheĩ pente teme poishi hyreko?

⁴ Jesús heishu: Pimbijetãmba Tũpa jykuatiape heiva, Tũpa japo vekua jypyiterã kuimbai hareka taupe?

⁵ Haivi heijy: “Hãrã kuimbai hejapo tuu hareka ishy, hyreko hãndi iko verã, hãrã mõkue'õre penteva tyro'oĩma iko verã”.

⁶ Hãrã kyrãĩ mokueveãma jyre, koñeĩ pente tyro'oĩma verã, hãrã Tũpa omomendavare, kuaretare avy typoi ijuhuvi.

⁷ Haipe fariseore pyrãndushu: Mbaiva rehera akuarã Moisés mẽ'ẽka tyrekope kuatia omendava poishia ryheva, hãmã haipe poi ijuhuvi?

⁸ Jesús heishu reta: Pyndypya tãtaivi Moisés mã'ẽĩmbahe pee pypoishi pyndyreko; õñepỹrũape katy kyrãmbatẽ vekua.

⁹ Tẽvã she hai pee, “Hyreko poishia mbaimba reherã, haivi omendajyhe yngava tauperã, opa myngya omendavare; hejareiipo hyreko, ha'ẽĩ ynga kuimbai ñeno hãndirã rehe”.

¹⁰ Hãrã mboireare heishu Jesús: Kyrã potarã, hokava kuimbai hareka hyreko hãndi haikavivepo omendãã reta.

¹¹ Jesús heijyshu reta: Ha'ẽã kuaretare opaĩ kuaa verã, koñeĩ Tũpa pota meẽshuvãĩpo.

¹² Hãrã heta mbai rehe rãnga kuimbaire hyrekoã; ĩme'ẽ oarãvãĩ ñymbairã hyrekomba verã, hãrã ĩme'ẽjy yngava omendambava shara kuareta ñymbai jeperã, tẽvã ĩme'ẽ omendambava shara huvisha vasu vate arapy'õ ryhevare mba'aporã. Hãrã ĩme'ẽ katu japovarã, tijapo.

Jesús ñee kaviva ñonohẽ sanjaymire

¹³ Hãrã sanjaymire veruhashu Jesús ẽvãpe, ipo ñono ĩãrẽ verã hareka ñymboihe verã; tẽvã mboireare poshy jyreshu veru'õ retape,

¹⁴ tẽvã Jesús hei: Pyma'ẽĩhe sanjayre tou shyvache hareka avy pijocha, shara haire rãĩmiva Mburuvisha vasurã vate araivi ouva.

¹⁵ Hãrã ipo ñono ĩãrẽ sanjaymire, haivi oho.

Pente kunumi iko katuva ijeta hãndi Jesús

¹⁶ Pente kunumi vãhẽ ou Jesús õpe hãrã pyrãndushu: Pyrỹmboi'ia heko kaviva, mbaiva haikavivara katu ajapo apity verã tykove opambava?

¹⁷ Jesús heishu: Marã'ĩrãra rereshe heko kaviva? Penteĩ rãnga'ẽ heko kaviva, hokava hai Tũpa. Pota riche tykove opambavaperã, japo ñee japoa verã reta.

¹⁸ Kunumi heishu: Marãvara? Jesús heishu: Avy puruka; avy jyrekomava pokojyhe, avy manarõ, avy ãñetemba vekua erehe ndapisha.

¹⁹ Emombaishu nderu hareka ndesy, hãrã haihushu ndapisha rijyhaihuva rãĩmi.

²⁰ Hãrã kunumi heishu Jesús: Shyndei airãvãi rãnga opa ajapo hokava, mbaivara ĩmeve'ẽjy ajapo verã?

²¹ Jesús heishu: Pota opa rijapo hekope kavirã, ekua opa ẽvende ĩmeryreare, meẽshu pavete'iare hãrã ĩmepo ryrekui opa mbai vate arapy, haivi ei shimi'ĩrũ.

²² Hãrã ko kunumi hendu hokovarã vy'ãã ohojy, shara ikokatu.

²³ Haipe Jesús heishu mboireare: Ãñete hai pee, javaiposhu hai ikokatuvare iche verã huvisha vasu vate arapy'õ ẽvãpe.

²⁴ Hãrã haijy pee, javaiãshu kamello hasa verã ju sakuaipi, kuimbai ikokatuvare iche verã Tũpa huvisharã'õpe.

²⁵ Mboireare hendu hokavarã mbyrymaĩ retarã heishu: Mbavara akuarã katu ohojepekui?

²⁶ Jesús maĩhe hareka heishu: Kuaretare katuã japo hokava, tẽvã Tũpa ĩmere mbaikatu opa mbai japo verã.

²⁷ Haipema Pedro heishu: Ore rãnga opa mbai hejaha nimi'ĩrũha verã. Marãrapo mbyhekoviahajy orekui hokava?

²⁸ Jesús heishu reta: Ãñete hai pee, vãhẽma ara opa mbypy'ahuajy verã, hareka kuareta Tay, vapypo vapyhapya hĩmbipevape. Hãrã mĩ'ĩrũ vekua vapyĩpo jyvepy 12 ẽvãpe, mbaikavikue japo verã 12 ñymoñare Israelva retape.

²⁹ Hãrã opaite hoo heja vekua hareka tyvyre, hiindyre, tuu, ishy, hyreko, tayre maĩrã jy yvy, shyrehe, hãrã 100 kavipo me'ẽãjyshukui hareka hipitypo tykove opambava.

³⁰ Kyrãpo heta tynonde'õre mbytaykueha, hareka taykue'õre mytynõndehapo.