Mateo 18 - NandevaBiblia

Mbavara hai mbaivasuveva

¹ Haivi, Jesús mboireare ñymboja ẽvãperã pyrãndushu: Mbavara hai vateveva huvisha vasu vate arapy'õpe?

² Haivi hẽno pente sanjaymi ñono mbyteperã,

³ hei: Ãñete hai pee, piko vekua rãĩmi pyhejããrã hareka pikoã sanjay rãĩmirã picheãpo huvisha vasu vate arapy'õ ẽvãpe.

⁴ Ko sanjay rãĩmi ñimimishĩva, hokavapo mbai vasuve huvisha vasu vate arapy'õpe.

⁵ Ĩme'ẽ kuareta shyreepe myvãheva ko sanjay rãĩmi, shee shymyvãhe.

Mbai porambape katu ñandirityva ryheva

⁶ Ĩme'ẽ mbai porãmba japokashua kova sanjay rãĩmi jyroja shyreheva, haikavivepo jajure ñapitĩha pente jytaky vasu momboha yyvasupe.

⁷ Ko yvy'ĩãrẽ mbai porãmbape pirirityva, japoãã Tũpa heiva. Shara ẽẽñoĩpo mbai porãmbava, tẽvã tengapokui kuareta mbai porãmba pirĩmbijapokava.

⁸ Hãrã ndepo hareka ndepy ndyrahapo porãmba kytyrã, jasyja hareka mombo mbyry, haikavivepo riche tykove ryheve, ndepy hareka ndepo hãndi, mãhẽ nymombohakui tatavasu opambape ndepy hareka ndepo mokue ryheve.

⁹ Hãma ndyresa hai ndyraha'i mbai porãmba kytyrã, heky hareka mombo mbyry; haikavivepo nde riche tykove opambape pente ndyresa ryheve, mãhẽ nymombohakui mokue ndyresa ryheve tata vasupe.

Pente avisha kañyva

¹⁰ Avy pijahehe sanjay rãĩmi jyroja shyryheva. Haipe Tũpa jokuevare haire ĩme'ẽ Ñanderu hỹnonde hareka hesha reta hova.

¹¹ She Kuareta tay rãĩmi aiva ko yvy'ĩãrẽ, ai ãnohẽ opavape mbai porãmbape jeky verã.

¹² Mãrãra pereshu? Pente kuareta ĩmere 100 avisharã, kañyshi pentevarã, hejarapo 99 õ yvyturusu kyty ĩrũre hãrã oho hekajy pente kañyshia?

¹³ Vãhẽjymashurã, ãñete hai pya horyitevepo hoka avishare haipe 99 õre kañymbarã.

¹⁴ Kyrã jyve Peru vate arapy'õ potãã mbava kañy ko sanjay ndeiveva rãĩmi jyrojava.

Marãrapo jahejareishi mbai porãmba ñandapisha

¹⁵ Ndapisha japo ndyrehe porãmbarã, ijeta hãndi hã'ẽĩvape hãrã mbeu kavishu mbai porãmba japo vekua. Nyrẽndurãpo rẽi kavijy hãndi ndapisha.

¹⁶ Hãrã nyrẽndusearã katu rỹhẽno pente o mokue hendu verã, katu mapo “opaite he'iava ñonoã kavipo, mokue hareka mbahapy'õ hyvache”, heiva rãĩmi Tũpa ĩñee.

¹⁷ Hãma potã hendushu retarã, mbeu tũpaope, hãrã hẽnduseãjy tũpaoperã tẽvãra, pijaposhu haimba pyndyryhevava kyrypoti mbatyse'iare Roma pevarã rãĩmi.

¹⁸ Añeteva hai pee, pee piñapintiva ko yvy'ĩãrẽ, ñapintiãpo jyve vate arapy, hareka pee pijora ko yvy'ĩãrẽva jorahapo jyve vate arapy.

¹⁹ She hai jyve pee, mõkue peeva piñiñono pente ñeepe ko yvy'ĩãrẽ, pee pota pirureva ñymboipe, Sheru arapy'õva ẽvãpe meẽpope.

²⁰ Hãma mokue, maĩrã mbahapy shyreepe ñymbatyva, she haipe ãĩ hãndi reta.

²¹ Hãrã Pedro ñymboja Jesús ẽvãpe heishu: Sheja, mbovyjyrapo ahejareiishi shapisha, porãmba japo shyreheva? 7 jyrapo?

²² Jesús heishu: Ha'eande 7 jy peveĩ verã, katynga 70 kavi'õ 7 jypeve rãnga.

Mbai porãmba hapishaivi hejasembava

²³ Hãrã huvisha vasu vate arapy'õ, ova jyve huvisha vasu pyrãndushu vekua jokuehareirea japovare.

²⁴ Hãma õñepyrõ japo hoka verua hỹnonde pente hetaiteve oreveshuape.

²⁵ Mba'etyre mainũnga meẽ verã, ko kuareta hei õvendeha verã pyrokue'ia, jokuehareiire verã hyreko hareka tayre hãma opa ĩmerea ryheve, opa mbyhepy verã oreve vekua.

²⁶ Haivi ko jokuehareirea ĩñesu hỹnonde, jurure asyshurã hei: “Karai, shy'ãrõminte hãrã opapo ameẽjyndekui”.

²⁷ Hãma ko pyrokue'ia parekoiteshu jokuereirearã hejareiishi oreveshu vekua hãrã mã'ẽihe ohojy.

²⁸ Hãma õhẽjy oho hoka jokuehareirea hỹvãitijy ñi'irũ oreveshua 100 nikere, kũavãshu jaseoipirã hãrã puntue mbijapyshirã heishu: “Mẽ'ẽjyshe rereveshea”.

²⁹ Haipe jokuehareirea ĩñesu hapisha hỹnonde jurure'asyshurã hei: “Shy'ãrõ rãniani hãmepo opa ambyhepyjy ndekui”.

³⁰ Katynga, hai hãrõseã mbashua hãma mondo mbyperesoka opajy mẽepeveshu orevehe vekua.

³¹ Hesha hoka ynga jokuehareirea mbyvy'ãã reta hãrã oho hoka ija õpe opa mbeushu reta ikova.

³² Haipema pyrokue'ia hẽnoka jokuehareirearã heishu: Nde jokuehareirea heko porãmbava! She ahejareiite ndyhevije rereveshe vekua, shara rirure'asy reisheje.

³³ Hãma nde ryparekotẽ verã jyve ndapisha, she aryparekova rãĩmi.

³⁴ Hãma poshyite'i ko pyrokue'iarã raha mbyperesoka opa mbyhepyjypeve oreveva.

³⁵ Hãrã Jesús hei: Kyrã jyve Sheru arapy'õ japopo pyndyrehe pepenteĩ, pãtẽỹ pyhejareiishi pyndypyaivive papisharã.