Mateo 17 - NandevaBiblia

Jesús hete opa yngai oho

¹ Haivi 6 arajyape Jesús rahashu Pedro, Santiago hareka tyvy Juan, jupi reta yvyturusure.

² Haipe hỹnonderãpetei Jesús hete opa yngai oho. Hova opa hĩmbipe kuarasy rãĩmi, hareka jasoiva tĩĩ hendyva sapeva rãĩmi.

³ Haipe ijeshaka reta Moisés hareka Elías, ijeta ñynõĩ hãndirã.

⁴ Pedro heishu Jesús: “Sheja, haikavi rãnga ore kope ĩmeha'ẽrã. Ripotarã japohapo mbahapy oo rãĩmi: Pentepo na'ãporã, pentepo Moisés pevãrã hareka ĩrũ Elías pevarã”.

⁵ Pedro ijetateri'ẽ vekua, mundii ãvãpyntu hĩmbipeva opa jasoishu reta. Haipe ãvãpyntuivi ñyhendu pente ñee heiva: Kova hai Shyray ahaihuva, apyhỹrõ vekua, pyhendushu.

⁶ Mboireare henduma kovarã, ĩñesu reta mbojapeve hova yvyre, kyjeite retarã.

⁷ Jesús ñymbojahe retarã, pokoherã hei: “Pupũ'ã, avy pykyje”.

⁸ Hãrã mãĩjy retarã mbaveã heshajy, koñeĩ hesha Jesús hã'ẽima ẽrã.

⁹ Vejyjy retarã, Jesús heishu reta: Avy pymbeukui mbavape ko pyheshava, kuareta Tay, mũpũ'ãjypeve manovare mbyteivi.

¹⁰ Mboireare pyrãndushu Jesús: Mãrã'irãra Moisés mbypara vekua pyrỹmboi'iheare hei, Elías rãni ou verã?

¹¹ Jesús heishu reta: Ãñete rãnga Elías rãnipo ou, hareka haipo opa mbai ñono kavijy.

¹² Hairã she hai pee, Elías ouma rãnga, tẽvã mba'etyĩ kuaashuva, pota japohevaĩ, japohe reta. Kyrãmi jyve kuareta Tay ahasa'asypo ipope.

¹³ Haiperãã, mboireare kuaakavi reta, Jesús ijetaheshua Juan Bautista.

Jesús mynguera pente kunumi mbaiposhy ĩmerea

¹⁴ Vãhẽ jyraha hetavare'õperã, ñymboja Jesús ẽvãpe pente karai, ĩñesu hỹnonderã heishu:

¹⁵ Sheja, parekomitẽ ko shyray, hai rãnga ñymba'asy vãhẽmajyshurã opa mbyryry hareka juru mbytyryju, hetama oa tatape, ãmõpe yypy ityjy.

¹⁶ Arumatẽshuje rỹmboivare tẽvã haire katũã mynguera.

¹⁷ Haipe Jesús hei: Tykove jyrojambaa, ñarõvare! Mbaipeverapo ãime ãĩ penendie? Mbaipeverapo aiko pyndyrehe? Perushe kope kunumi.

¹⁸ Haipe Jesús poshy ryheve heishu mbaiposhyperã, õhẽshi kunumiray, hãrã haiperaveĩ kuera.

¹⁹ Haivi mboireare ñymbojahe Jesús hã'ẽĩ õperã, pyrãndushu: Marã'ĩrãra katuã mohẽhashi ore mbaiposhy?

²⁰ Jesús heishu reta: Sa'ite pirojarã. Ãñete hai pee, pirojakue mbairãỹ mishĩva rãĩmirã, pereposhu yvyturusu: “Syry koivi, ãupe syryjy”, japoĩpo jyvepe. Opa mba'e katu pijapo.

²¹ Tẽvã, mbaimba peuva ryhevepepo pirureshu Tũpa, hãmẽrãpo katu pymohẽ kyrãva mbaiposhyre.

Jesús hykuãĩ mbeujy mano verã

²² Ikojyre Galileaperã Jesús kyrãĩ ijetashu mboireare: Ko kuareta Tay, me'ẽãpokui kuaretare ipope.

²³ Haire shukapokui, tẽvã mbahapy arape akuerajypokui. Kova hendu retarã opa mbypy'ã reta.

Kyrypoti me'ẽãva tũpao pevãrã

²⁴ Jesús hareka mboireare vãhe tenta Capernaumperã, kyrypoti mbaty'iare tũpao pevãrã oho Pedro ẽvãperã pyrãndushu: Pymboi'iara meẽ jyve kyrypoti tũpao pevãrã?

²⁵ Pedro heishu: Meẽ rãnga. Haivi hai iche oo iperã Jesús rãni ijetashu Pedro hãrã pyrãndushu: Simón, marãra rere? Mburuvishare yvy'ĩãrẽ ẽvãre, mbaty kyrypotirã, mbavarera jopyve ñyñoĩ? Henta rehera maĩrã ynga tentarera?

²⁶ Pedro heishu: Ynga tentaivi ouvare. Jesús heishu: Akuarã henta ĩrũre katuã rãngapo meẽ.

²⁷ Kyrãrã, potamba poshy ñande verã mbava, ekua ity nipinda yyvasupe, tynonde pira rynohẽva jurupy rymaĩrã ryvãĩposhukui nikere ñande pevãrã, raha meẽshukui hokava.