Mateo 15 - NandevaBiblia

Mbai ñanymyngyava

¹ Haivi ñymboja Jesús ẽvãpe fariseo hareka Moisés mbypara vekua pyrỹmboi'iheare, ouva Jerusalenvi, haire pỹrandushu:

² Marã'ĩrãra rỹmboivare japoã hekope kuakuavare pyrỹmboiva rãĩmi? Jypoiã reta karu verã, japohasea rãĩmi!

³ Jesús heishu reta: Marã'ĩrãra hekope kaviã pijapo ñee japoa verã Tũpa heiva, pipykuava rãĩmi pijapopirãme?

⁴ Tũpa rãnga hei: “Emombaishu nderu hareka ndesy, shara jaheheva tuu hareka ishy, jukahañoĩpo”.

⁵ Peeny perekuei mbava katu heishuva tuu hareka ishy: “Katuany arỹmbory, shara opaiteva ĩme'areare opama ameẽ Tũpape”.

⁶ Ĩme'ẽ kyrãĩ heivarã, katuveama mbory tuu hareka ishy. Kyrã pimbijiche Tũpa heiva pijapo verã pipykuava rãĩmi.

⁷ Hova mokue'iare! Heikavi pyndyrehe Tũpa ĩñee mbeu'ia Isaias, heirã:

⁸ Kova kuaretare jurupẽi shemombai jyre, tẽvã pyare mbyry'ẽ shyhevi.

⁹ Hãrã reii shemombai rã'ãnga reta, shara haire kuimbaire hei vekuaĩ pyrỹmboi jyrehe.

¹⁰ Haivi Jesús hẽnoshu kuaretare hãrã heishu: Pyhendu, hareka pikuakavi verã.

¹¹ Kuaretare juruipi icheva myngy'ããshu, juruivi õhẽvãĩ myngyashu ñee porãmba vekua.

¹² Haipe mboireare ñymbojaherã heishu reta: Rikuara fariseore pya'ohoãhe hendu rereva rãĩmi?

¹³ Jesús heishu reta: Opaite yvyra Sheru ñotỹmba po'oapokui hapoivive.

¹⁴ Pyma'ẽihe hai reta rãnga heshamba kũvãipiare, ĩrũ heshamba kũvaipiare raharea. Hãrã pente heshamba kũvãĩpia rahare ĩrũ heshamba kũvaipiarã, mokue ryheveãrapo oa yvykuape.

¹⁵ Haipe Pedro heishu: Mbeu kavivejy ore mbaivara he'ise ko ñee ñymyhã'ãnga.

¹⁶ Jesús heishu reta: Peeavera pikuã teri kova?

¹⁷ Pikuããra opa mbai icheva ñandijuruipi oho ñandyretepy, haivi õhẽjy ñandyreteivi?

¹⁸ Ñandijuruivi õhẽva ñandypyaivive, hai hoka ñanymyngyava.

¹⁹ Ñandypya ñambijeta rupii õhẽ mbai porãmba, ijukava, javasa'ia, kyrãĩrãĩ'iare, manarõ, japuva, ijetareiva hapishare hareka jahehea.

²⁰ Kova hai ñanymyngyava, tẽvã jaipohemba jakaru verã japohasea rãĩmi, mbavããpo myngyã.

Taupe haimba Judiova jyrojahe Jesús

²¹ Jesús ohẽ haivirã oho tenta Tiro hareka Sidon kyty.

²² Pente taupe Canaanpe'ia, ñymboja Jesús ẽvãperã sapuke: Sheja, David tay, shyparekomĩteño! Shymemby taupe ĩme'ẽ mbaiposhy ĩmere, hareka mbypaveteitereshu.

²³ Tẽvã Jesús mba'ẽã heishu. Haipe mboireare ñymbojaherã heishu: Mondojy shara sapuke ou ñandaykue.

²⁴ Haipe Jesús hei: Tũpa rãnga shymboushu Israelvare avisha rãĩmi kañyva heka verãi.

²⁵ Haipe taupe ñymbojahe, ĩñesu hỹnonderã heishu: Sheja shymborymitẽño.

²⁶ Jesús heishu: Porãã rãnga jahekyshi sanjay houva ñameẽshu verã ñaũmbare.

²⁷ Ko taupe heishu: Ãñeteĩte rereva Sheja. Kyrãtẽvã, ñaũmba ho'uĩpojy timbiu ijare ñymesaivi oava.

²⁸ Jesús heishu: Nde hai taupe tivisha rirojava! Tiko nde ripotava rãĩmi. Haiperaveĩ memby taupe kuera.

Jesús heta mynguera ñymbairasyva

²⁹ Jesús õhẽ haivirã, hasa Galileape yyvasu hymbeypi. Jupi pente yvy vate'õrerã haipe vapy.

³⁰ Heta hai ẽvãpe ouva, raha reta japava, heshamba kũvãipia, vatambaa, ña'ẽnguva hareka ñymbairasy vekuare. Ñono reta Jesús hỹnonderã mynguerashu reta.

³¹ Opavare mbyrymaĩ hesha mãrãra ña'enguvare ijetajy, japava vatajy kavi hareka heshajymba heshajy kũvaãĩpi, õñepyrõ õmombaishu reta Tũpa Israel Ija.

Jesús myngaru 4.000 kuimbaire

³² Jesús hẽnoshu mboirea retarã heishu: Aparekony ko kuaretare, mbahapy arama japo ẽẽ ai hãndiare, hãrã mba'ety maĩnunga hou verãre. Potã ñymbahy ryheve amondojyshu reta hentape, mãhẽ pehupi mamano jyrekui.

³³ Hãrã mboireare heishu: Mãĩvirapo ñavãhẽshu maĩnunga ñamyngarupy verã ko kuaretare, mba'ety rãnga ikova koipi?

³⁴ Jesús pyrãndushu reta: Mbovy pãhãra ĩmepyre? Haire heishu: 7 pãhã hareka mbovy pira.

³⁵ Haipe Jesús opava retape mbyvapyka yvype,

³⁶ hãrã heky 7 pãhã hareka pira, jurure Tũpa ohovasa verã. Haivi pysẽã meẽ mboirea retape, haire memẽeshu opavape.

³⁷ Opa karu hareka hỹvãnta reta, haivi 7 kanãta mãrẽyva mỹñyhejy hemby vekuaivi.

³⁸ Haipe karuva reta rãnga 4.000 kuimbaire, papahamba ryheve taupe hareka sanjay reta.

³⁹ Haipe Jesús opa jy mondo reta hentape, jupi kanoaperã oho tenta Magadan kyty.