Mateo 14 - NandevaBiblia

Juan Bautista jukaharã vekua

¹ Hokava arape Herode, mburuvisharã ẽẽshu 4 tenta'õre, kuaretare heiva hendu jyve mbaivara Jesús japo.

² Hãrã jokuereare heishu: Hoka kuimbai rãnga Juan Bautista, manovare pãũvi pũãjy vekua, hãrã ĩmere mbaikatu, japo verã mbaikavi heshaha verã.

³ Herode rãnga pysykashu Juan hãrã mbyperesoka shara Herode omendahe Herodia, tyvy Felipe hyrekorãrerã.

⁴ Hãrã Juan heishu Herodes: Katuã rãnga Herodia ndyrekõrãryre.

⁵ Herodes pota jukareshu Juan. Tẽvã kuaretare kyjeshirãmimba japõã, shara haire heihe Juan haiva Tũpa ĩñee mbeu'ia.

⁶ Herode ñy'ãño mbotyrã mby'aretemba, hãrã Herodia memby kuña vãhe jyroky verã Herode hareka opaite haipe'õre hỹnonde. Hãma Herode pya ohoitehe ko kuñatãĩ jyrokyva rãĩmi,

⁷ hãrã Herodes ĩñee meẽshu, opa mbai meẽshu verã hai jurureshua.

⁸ Kuñatãĩ ishy mboihe jurureshu verã Juan ñakãkue, verushu verã pente yape.

⁹ Hokava mbypy'ã mburuvisha vasu Herode, shara meẽ ĩñee hetavare hỹnonderã katuã pyrõhe ĩñe'ẽkue, hãrã japo kuñataĩ jurureshua.

¹⁰ Haipe karselpe Juan jasyjahakashi ñãka,

¹¹ hãrã veru reta ñakãkue pente yaperã, meẽshu reta kuñataĩ, hai raha meẽshu ishy.

¹² Haivi Juan mboireare jyraha hupi Juan hetekuerã raha ñoty reta, hãrã jyraha mbeushu reta Jesús ko ikova.

Jesús myngaru kuaretare jaheva

¹³ Kuaama Jesús Juan ikohearã, oho haivi kanoape hã'ẽĩ yvy ikoambaipi. Hãrã kuimbaire kuamarã jyraha hipii reta yvyipĩ.

¹⁴ Jesús vejy kanoaivirã hesha hetava kuimbai retarã parekoshu reta, hãrã mynguera ñymbairasyva haire verushuare.

¹⁵ Ka'aru pyntumapo'ia, Jesús mboireare ou ẽvãperã heishu reta: Ka'aruitema rãnga, mba'etyvãĩjy koipi ikova. Mondo ko kuimbaire tenta retaipi tova ijupe reta hou verã.

¹⁶ Jesús heishu reta: Tekotẽvea rãnga jyraha, peiipo pymyngarushu.

¹⁷ Haire heishu: Mba'ẽa rãnga ĩmerekoa kope. Koñeĩ pandepo pãhã hareka mokue pira.

¹⁸ Jesús heishu reta: Perushe kope.

¹⁹ Opa mbyvapyka reta kapi'atarerã, haipe heky pandepo pãhã hareka mokue pira, maĩ vaterã jurureshu Tũpa ohovasa verã. Hãrã pyseã pãhãrã meẽshu mboirea retape, meẽ verã opavape.

²⁰ Opaiteva hou hareka hỹvãta reta. Hemby vekuaivi mbatyjyrã mynyhẽjy reta 12 kanãta.

²¹ Haipe karu vareta rãnga 5000 kuimbai retãi, papahambateã taupe hareka sanjayre ryheve.

Jesús vata yy ĩãrẽ

²² Haivi Jesús hei mboirea retape jupi verãre kanoape hareka hasashi verãre tynonde yy hyvaisho kyty, hokape hei verã opavape ohojy verã hentape.

²³ Opajyma mondo reta hentaperã, Jesús jupi pente ita vate'õre jurure verã hã'ẽĩ'õpe. Pyntumarã Jesús ĩmeĩteri'i haipe hã'ẽĩ.

²⁴ Kanoany yy mbyteipima oho hareka yy ñarõva hỹnatu ñunũpa kanoa intire, yvytu hỹvãĩti jyraharã.

²⁵ Kõĩma ourã, Jesús ñymbojahe reta yy ĩãrẽĩ vata ohovape.

²⁶ Mboirea reta heshama yy ĩãrẽ vata ohorã, kyjeiterã sapukejyrerã hei: Jykuamba'ia rãnga hokava!

²⁷ Jesús ijetashu retarã hei: Avy pykyje! She rãnga.

²⁸ Haipe Pedro ijetashurã hei: Sheja, ãñete nde hairã, ma'ẽĩ shyrehe taha yy ĩãrẽ rẽĩvapeve.

²⁹ Jesús heishu: Ei. Haipe Pedro vejy kanoaivirã õñepyrõ vata yy ĩãrẽ, oho verã Jesús jykoty.

³⁰ Ñanduma yvytu ñakua ouvarã kyjepy hãrã õñepyrõ opa iche yypy. Haipe hỹnatu sapuke: Sheja, shymondojepe.

³¹ Haipe Jesús pysyrã heishu: Sa'itemba riroja! Marã'ĩrãra rypyhu?

³² Haire jupima kanoaperã yvytu pyta'ẽ.

³³ Kanoape'iare opa ĩñesu Jesús hỹnonderã heishu: Nde rãnga ãñete Tũpa Tay.

Jesús mynguera hasyvare tenta Genesaretpe

³⁴ Hasa reta yy hyvaisho kytyrã, vahẽ jyraha Genesaretpe.

³⁵ Haipe'õre kuama Jesús hai vãhẽ ohovarã opa mbeushu reta juri'õvãre. Hãrã verushu reta opa ñymbairasy vekua.

³⁶ Hãrã jurureshu reta mondeva hymbeyrei poko verãre, haipe opaiteva pokoheare, kuera.