Mateo 12 - NandevaBiblia

Jesús mboireare mynoõ trigo putu'uava arape

¹ Hoka arape, Jesús hasa oho kookueipi putu'uava jy'arape, mboireare opa ñymbahy hareka õñepyrõ mynoõ reta trigorã houjyre.

² Fariseore hesha hokavarã heishu reta Jesús: Maĩndaheno, rỹmboivare japova, japoamba verã putu'uava arape.

³ Jesús heishu reta: Pimbijetaamba Tũpa ĩñeepe'õ mbaivara pente arape japo arykai David hareka ñi'ĩrũre opa ñymbahyrã vekua?

⁴ Iche tũpaope hou pãhã Tũpa pevarã, katumbaa hai hareka ñi'ĩrũre hauva, pai retãite hou verã hokava pãhã.

⁵ Pimbijetããra Moisés mbypara vekua heiva rãĩmi, paire putumbaa verã putu'uava jy'arape tũpaope, tẽvã mbavẽã heishu hokava mbai porãmba?

⁶ Tẽvã haipe, kope ĩme'ẽ pente mbai vasuveva tũpaoivi.

⁷ Pee pikuãã mbaivara he'ise Tũpa ĩñee heivape; “She aipota pypareko papisha, mymba pijukateshe verã vekuaivi”. Hokava pikuarã pereãtẽposhu mbai porãmba japo'iare.

⁸ Shara kuareta Tay hai putu'uava ara ija jyve.

Jesús mynguera ipo vyrãkuashi vekua

⁹ Jesús oho haivirã, iche Judiore ñymbatyseape.

¹⁰ Haipe ẽẽ pente kuimbai ipo vyrãkuashi vekua; potai ñono vaishu reta Jesús, hãrã fariseore pyrãndushu: Katura ñamynguera hasyva putu'uava arape?

¹¹ Jesús heishu reta: Mbaara peeva ĩmere pente avisha, oa pyhevi yvykuape putu'uava jy'araperã, pehoãrapo pynohẽjy verã?

¹² Pente kuimbai rãnga mba'eiteveshi pente avisha. Hãmeãra katu jajapo haikaviva ñandapishare putu'uava arape.

¹³ Haipe Jesús heishu kuimbai: Mysymyĩ ndepo. Hãrã mysymyĩ iporã kuera. Hyvaisho rãĩmi.

¹⁴ Haivi fariseore õhẽ oho, haipe õñepyrõ ijeta reta marãrapo katu juka Jesúspe.

Profeta heihe vekua Jesús kuatiape

¹⁵ Jesús kuama pota juka jyreshurã õhẽ haivi, hareka heta ohova haykue. Hãrã Jesús opaĩ mynguera hasyvare,

¹⁶ hei jyvyĩshu reta potamba mbeuva mbavape, mbavara hai.

¹⁷ Kyrã rãnga jehu iko verã hekope kavi Tũpa hei vekua Tũpa ĩñee mbeu'ia Isaia rupii:

¹⁸ Kova hai ajokueva apyhỹrõ vekua, she ahaihushu hareka shymbyhoryva. Añonopohe she Espiritu ĩãrẽ, hai mbeupo hekope kavi'õ tenta retaipi.

¹⁹ Ñyrãrõapo hareka sapukeãpo, mba'etypo henduva ijeta kovare vataha'õĩpi.

²⁰ Mỹ'õpeãpo takuara hareka mboveãpo tata mishiĩ hendy'õ, opa mbijapokapeve hekope kavi'õ.

²¹ Opa tenta vasure jyrojapohe reta.

Jesús hareka mbaiposhyre juhuvisha

²² Haipe veruhashu pente kuimbai Jesús ẽvape mynguera verã, heshamba kũvãĩpiva, ña'ẽnguva, hareka mbaiposhy ĩmerea. Jesús mynguerashu hãrã ko kuimbai hesha hareka ijetajy.

²³ Opavare hesha kova ikovarã hei reta: Ha'ẽãra ko David ta'y?

²⁴ Fariseore hendu kovarã hei: Hai rãnga mohẽ mbaiposhyre juhuvisha Beelzebu ñymbaikatu rupii.

²⁵ Jesús kuaa haire heiñynoi pyaperã heishu reta: Opaite tenta vasure ñimbijaova oñehundipo. Ĩmerãẽa tenta hareka henta ijupi ñyrãrõrã, oñehundipo jyve.

²⁶ Kyrãi jyve Satanas pũã ijeherã, marãrapo pỹrãta opa arape?

²⁷ Pee rãnga pere, shee amohẽva mbaiposhy reta Beelzebu mbaikatupe. Kyrãrã, mbavara meẽshu rỹmboivare mbaikatu mõheshi verã? Pymboivare japova rupii rãnga, heshaha pee pijavyva pijetapẽirã she amohẽva mbaiposhyre Beelzebu pyrãtã rupii.

²⁸ She ãmohẽ mbaiposhykue Tũpa Espiritu rupiirã, hokava he'ise Tũpa Mburuvisha vasu vãhẽmapeva.

²⁹ Mbavarapo icheva pente kuimbai pyrãtava hentape manãrõshu verã, ñapintiã hareka ipy jokuarãniããrã. Kyrã japorãrãpo katu manarõshu.

³⁰ Shyrehe õĩmbava, ñymbyvaishoshyre. Mỹnoombaa shendieva, momohẽĩ'i.

³¹ Ãñete hai pee, Tũpa hejareiiposhi mbai porãmba japo vekua hareka ijeta porãmba jyreva. Tẽvã Espiritu Santore ijeta porãmbaheva, hejareiiãposhu.

³² Tũpa hejareiiposhu kuareta Tay ijeta porãmbahea, tẽvã Espiritu Santo ijeta porãmbahea, ko yvy'ĩãrẽ hejareiiãposhu hareka ara ou'ẽ verãpe.

Yvyra iareĩ kuaaha

³³ Pente yvyra jypy haikavirã, ia kavipo; hãmã põrããrã, ia kaviãpo jyve shara yvyra iarei kuaaha.

³⁴ Pee mboi rayre! Mãrãrapo haikaviva pere, pee pyndyreko porãmbava. Ñandypyape jarekova, ñahenduka ñandijuruivi.

³⁵ Pente pya kaviva mbai haikavivai hei, shara pyape reko mbaikavi. Heko porãmba, mbai porãmbavãi hei, shara mbai porãmba imere pyapy.

³⁶ She hai pee, ñimbivache arape opavare mbeupokui Tũpape mãrã'irãra hei reta ñee porãmba vekua.

³⁷ Niñe'ẽkueipo Tũpa porykui ndyrejarei verã, maĩrã nehundi verã.

Jesús jurureashu mbai heshaha verã

³⁸ Haivi fariseore hareka Moisés mbypara vekua pyrỹmboi'iheare heishu reta Jesús: Pyrỹmboi'ia, potaha rãnga rijapo pente mbai heshaha verã.

³⁹ Tẽvã Jesús heishu reta: Tykove ñarõva Tũpa haihumba hareka ñee hendumbare jurure ñynoĩ mbai heshaha verã. Mba'ẽãpo heshahaka pee, mbai heshaha verã. Tũpa heshakapo pee Tũpa ĩñee mbeu'ia Jonas rehe japova rãĩmi.

⁴⁰ Jonas ẽvã rãĩmi mbahapy ara hareka pỹntu, pira vasu hyeperã kyrã jyve, kuareta Tay pytapo mbahapy ara hareka pỹtu, yvy'ipy.

⁴¹ Ñimbivache arape, opavapo Ninivepe'õre piniñono porããkui Tũpa hỹnonde, porãmba pijapo vekuare. Haireta rãnga heja porãmba japo vekua Jonas ñimiñeee'ishu retarã. She hai pee, kope ĩme'ẽ pente mbai vasuveva Jonasvi.

⁴² Mburuvisha vasu taype tenta vasu rovai kyty'õ Seva he'iashua, pũãpo jyvekui pirĩmbivacheava jy'arape hareka piniñono porããpo Tũpa hỹnonde porãmba pijapo vekuare. Shara hai yvy japyivive oho hendu verã Salomon Ñee kaviva. Tẽvã she hai pee, pente Salomonvi vateve'õ, ã'ẽ ĩme'ẽ kope.

Mbaiposhy oujy vekua

⁴³ Pente mbaiposhy õhe ĩmerãeaivi, oho iko yvy tiniaipi heka putu'u verãpe. Vãhẽashurã hei:

⁴⁴ “Ãhajypo shyrẽtape, ãhẽ vekuaivi”. Hãma oujyrã, hesha õhẽ vekuaivi pente oo mbaimba ẽpya rãĩmi opa typeiiha hareka mãshyãva.

⁴⁵ Haivi, oho hareka veru 7 ĩrũre mbaiposhy heko teitevevare hãrã ichepy reta hareka iko jyre haipe. Kyrã, kuimbaire hykovepe porã'ãĩteve õnepỹrõvaivi. Kyrãpo jehukui opa heko ñarõvare ã'ẽvare.

Jesús ishy hareka tyvyre

⁴⁶ Jesús ijetateri'ẽ vekua, vãhẽ hai ẽvãpe ishy hareka tyvyre pota ijeta hãndirã. Katoapẽ ĩme ñynoĩ reta:

⁴⁷ Pente haipe ĩme'õ heishu Jesús: Ndesy hareka ndyryvyre ĩmeñynoĩ katuape, pota rijeta hãndirã.

⁴⁸ Jesús hei: Mbavara shesy hareka shyryvyre?

⁴⁹ Haipe, pyvẽẽshu mboirea retarã hei: Kova reta hai shesy hareka shyryvyre.

⁵⁰ Ĩme'ẽ japova Sheru vate'õ arapy potava, hokava hai shyryvy, shiindy hareka shesy.