Mateo 11 - NandevaBiblia

Juan Bautista mondo mboireare Jesús ẽvãpe

¹ Jesús opama 12 mboireare mbeu kavishurã, õhẽ haivi pyrỹmboi, hareka ñimiñee verã tenta retaipi.

² Juan Bautista ĩme'ẽ mbyperesoavaperã, hendu opa mbai Cristo japova, hãrã mondo mõkue mboireare pyrãndushu verã Jesús:

³ Ndera hai Cristo ou verã, maĩrã ĩmera'ẽjy yngava hãrõha verã?

⁴ Jesús heishu reta: Pekua pymbeushu Juan opaite pyheshava, hareka pyhenduva.

⁵ Pymbeushu, heshamba kũvãipia heshajy, vatamba vatajy, kuruva porãmba'ia kuerajy, japysambava hendujy, mano vekua kuerajy, hareka Ñee kaviva mbe'ua kavishu pavetevare.

⁶ Vy'apo shyrehe poimba jyrojava hareka shyrejambava.

⁷ Hãrã Juan mboireare jyrahajymarã, Jesús õñepyrõ kuaretare hỹnonde ijetaheshu Juan, hãrã hei: Yvy ikoambaipi pehorã, mbaivara pyhesha? Pyheshara kuimbai kangyva haipe, takuara yvytu mbyvava'õ rãĩmi? Mba'ety.

⁸ Mbaiva pyhesha verãramba peho? Pente kuimbai ñimimonde kavi'iapera? Mba'ety. Pee pikuaakavi, ñimimonde kavi'iare mburuvisha vasure hentaipi iko.

⁹ Mbaivara akuarã pyhesha? Pente Tũpa ĩñee mbeu'iara? Ãñeteite rãnga Juan vateveshi ĩrũre Tũpa ĩñee mbeu'iaivi.

¹⁰ Kuatia mbyparavape rãnga Tũpa heihe Juan: “She amondo ajokueva nynonderã, myhẽvande verã ndyraperã”.

¹¹ Añeteva hai pee, mba'ety kuaretare mbytepe vateveshia Juan Bautista. Tẽvã huvisha vasu vate arapy'õ kuareta mishiveva, vateveshi Juan.

¹² Juan Bautista ourãvive ã'ẽpeve, heta kuaretare pyrãtakuepe oñehãã iche verã huvisha vasu vate arapy'õ, hãrã pyrãtavevare pota ñimbi'ijahe.

¹³ Tũpa ĩñee mbeu'iare hareka Moisés mbypara vekua mbeu reta Tũpa ĩñee Juan ndeiteri ourãvãĩ.

¹⁴ Hãrã pota pyroja heiva retarã, Juan rãnga hai Tũpa ĩñee mbeu'ia Elías ou'ẽ verã.

¹⁵ Opaite japysa'iare, tyhendukavi.

¹⁶ Mbaiva rehera katu ambivache ã'ẽva kuaretare? Ova sanjayre ñimbijaru ñynõĩrã sapuke jyre ijuperã hei:

¹⁷ “Mbopuha rãnga pee mimby tẽvã pirokỹã; pyrahea pee mbyrahe pavete'ova tẽvã pijahe'õã”.

¹⁸ Shara ou Juan mbaimba houva hareka vinoĩmba houva pee pereshu: “Juan mbaiposhy ĩmere”.

¹⁹ Hãrã, kuareta Tay pereshu: “Karu hareka houva vino, karuiteva hareka kauva, opaite mbai porãmba japo'iare hãndi, kyrypoti mbatyse'iare Roma pevarã mi'ĩrũva”. Tẽvã ãrãndu Tũpaivi ouva, mbai jajapova rupiipo ijyheshakui.

Kuaretare ñee hendumbava

²⁰ Haipe Jesús õñepyrõ pya ohoãhe tentare, hetave mbaikavi heshaha verã japovape. Shara haipe'õre mbai porãmba japo vekua ñatẽy heja reta. Hãrã Jesús heishu reta:

²¹ Tengapopekui kuaretare pikova tenta Corazinpe! Tengapopekui kuaretare pikova tenta Betsaidape! Tiro hareka Sidonpe japoha mbaikavire heshaha verã pynymbytepe japoha vekuarã, kurimbatẽ oujy verã Tũpa jykoty, ñymbasype mondeava hũũvape ñimimonderã, hareka vapytẽ verã tanimbupy.

²² Hãrã hai pee, ñimbivache arape, punũpahã pohyvepokui tenta Tiro, hareka Sidonpe vekuaivi.

²³ Nde tenta Capernaumpe'õ, rimoãra ndurupiha jyve vate arapy? Mba'ety, nymombohapokui Ãña ẽvãpe. Shara tenta Sodomape kova mbaikavi heshaha verã japoha ndyreherã, ã'ẽpeve hokava tenta ĩmeĩtẽ'ẽ verã.

²⁴ Hãrã hai pee, ara ñimbivache vãhẽmarã, pee punũpahã pohyvepokui tenta Sodomape vekuaivi.

She ãĩvape pei puputuu

²⁵ Hokava ara vãhẽrã Jesús hei: “Apyrahende Sheru. Nde hai yvy hareka vate arapy'õ Ija, rĩñomishi ñy'ãrãnduvare hareka mbai kuavare, hãrã rymbykuakashu sanjaymi retape.

²⁶ Opaite Sheru, shara kyrã nde ripota ikorã”.

²⁷ Sheru rãnga opa mbai ñono shepope. Mba'ety kuava Tũpa Tay, koñeĩ Tuu kuashu. Mba'ety kuashuva Tuu, koñeĩ Ta'yĩ kuashu. Hãrã she pota ambeuvape ambeupo mbavara Sheru.

²⁸ Pei she ãĩvape, opaite pee pynykangyva hareka ojepy'apyva, she apurũmbuputuupo.

²⁹ Shiñee pyhendu kavi, hareka pijapo kavi she haipeva, pikuaa jyve shyhevi shara she shypya kavi hareka airojãã shijeherã, she apurũmbuputuupo.

³⁰ Shiñee ambeupeva javaiã pijapo verã hareka pohyãã.