Mateo 10 - NandevaBiblia

Jesús hekapy 12 mboi verã

¹ Jesús hẽno 12 mboireare, meẽshu mbaikatu, mohẽ verã mbaiposhyre, hareka mynguera verãre mbairasy marãrãngatu vekua.

² Kova hai 12 apostol reta hee: Tynonde'ẽ Simón mbyheajyva Pedro, hareka tyvy Andres; Santiago, hãndi tyvy Juan, Zebedeo tayre;

³ Felipe, Bartolome, Tomas, Mateo kyrypoti mbatyse'iare Roma pevarã, Jacobo Alfeo tay; hareka Tadeo;

⁴ ĩme'ẽjy Simón cananita ryheva, hareka Judas Iscariote, Jesús pysykashu vekua.

Jesús mondo 12 mboireare oparupi mbeu verãre ñee kaviva

⁵ Jesús mondo kova 12 õre opama mbeu kavishu retarã: Avy pekuakui haimba Judiore hentaipi, hareka tenta Samariaipi.

⁶ Pekua pyheka avishare opa kañy vekua, Israelre henta retaipi.

⁷ Pekua, hãrã pymbeu: “Huvisha vasu vate arapy'õ vãhẽserima ou”.

⁸ Pymynguera ñymbairasyvare, pymbyhykovejy manovare, pijoheshu kuru porãmba'iare hareka mbaiposhyre pymohẽ. Pee rãnga mẽ'ẽhareiipe kova mbaikatu, hãrã piporyrã avy pekora ĩãrẽkui.

⁹ Avy pyraha pindijehe ita verava ijuva, ita vera tĩĩva hareka kobre,

¹⁰ hareka vosape pehupi peu verã ryheve, pymondevare pimbivohy verã, hareka pyndypasare, avy pyraha yvyra pirãtãsehea; shara mba'apo'ia karuñoĩpo.

¹¹ Pyvãhẽ tenta, hareka tentamire õĩpirã, pyheka haipe kuareta heko kaviva hareka pypyta hentape pehẽjypeve haivi.

¹² Hãma pichemarã pymarãndupo: “Pyavapy tõĩ kova oope”.

¹³ Haipe'õ kuaretare hentape pynymyvãhẽ kavirã, pyhejashu reta ko ñymymarãndu pyavapy, haire mba'ẽãshurã timejype.

¹⁴ Hãrã pymyvãhẽseã, hareka pynyrẽndusearã, pẽhẽshi hoka oo, hareka tentamire'õĩvi, hãrã pepy pymytymoshi yvytimbokue.

¹⁵ Ãñete hai pee: Ñimbivache arape, ñunũpa haire pevarã teitevepo hoka tenta Sodoma hareka Gomorrape vekuaivi.

Jesús mboireare hasa'asypo

¹⁶ Pikuapo, avisha rãĩmi she apyrỹmondo avara vasure mbytepe. Hãrã piko kuaapo mboi rãĩmi, hareka pykasure rãĩmi heko poshymbaa.

¹⁷ Pingareko pijehe, shara kuaretare piniñonopo mburuvishare ipope, punũpaha verã Judiore ñymbatyseape.

¹⁸ Pyndyrahapo mburuvishare mbory'õre hỹnonde, hãrã pee pijetapo shyrehe, hareka opaite jyrojamba retape

¹⁹ Tẽvã pynymẽ'ẽhama mburuvisha ipoperã, avy pejepy'apyhe perepi verãre maĩrã pere verã rãĩmi, shara Tũpa meẽpope ñee pere verã rãĩmi.

²⁰ Shara peeãpo pijeta, Tũpa Espiritu Santo rupiipo pijeta.

²¹ Ĩmepo'ẽ tyvyre meẽva jukaha verã; terure meẽva tayre jukaha verã; tyrayre pũãpohe tuure juka verã.

²² Kuaretare pyndyreshatããpo shimimboiperã, tẽvã ara japyapeve tãnta jyroja shyreheva, ohojepepokui.

²³ Hãrã kuaretare pynymoña pente tentaivirã, ynga tentape pekuajy. Ãñete hai pee, kuareta Tay oujypo ndeiteri opa kavi pyvata tenta Israelperã.

²⁴ Mba'ety pente mbo'eharea vateve'ẽshia pyrỹmboi'õ, hareka mba'ety jokuehareirea vateve'ẽshia pyrokue'õ.

²⁵ Mbo'eharea vy'apo pyrỹmboi'õ rãĩmi'irã hareka jokuehareirea pyrokue'õ rãĩmi ikorã. Hãrã oo ija he'iahe Beelzeburã, mãrãrapo kyrãã he'ia jyveshu henta ĩrũre?

Mbavaivirapo jakyje

²⁶ Hãrã avy pykyjeshi kuaretare, mba'ety ñemiãpe'õ kuaahamba verã, hareka mba'ety ñemĩva heshahambaa verã.

²⁷ Ko she haipeva pỹntuape, pymbeushu kuaretare ara kõĩvape; she papysapeĩ haipeva, oo ĩãrãvive pysapuke pymbeu.

²⁸ Avy pykyjeshi pyndyreteĩ juka verã, shara katuãpo juka pyndyrykove; koñeĩpo pykyjeshi Tũpa, katu jukava pyndyrykove hareka pyndyrete tata vasupe.

²⁹ Ovendehããra mõkue vyra kyrypoti mbovyĩ'ia repy? Tẽvã penteãpo mano Teru he'ĩãrã.

³⁰ Tũpa opa kuaa pepetẽi pãnkahaa, papavape.

³¹ Avypo pykyje, shara pee mbai vasuveshi vyramire hetava.

Tũpa ñomimbavare

³² Ĩmerãẽva mbeuva kuaretare hỹnonde shyrehe jyrojava, ambeupo jyveshu Sheru vate arapy'õ hỹnonde.

³³ Ĩmẽrãẽa kuaretare hỹnonde “Shiñomi'ia”, ãñomipo jyvekui Sheru vate arapy'õ hỹnonde.

Jesús rehe veru ñimbijao

³⁴ Avy pimoã she ai ko yvy'ĩãrẽ aruva pyavapy, aiã aru verã pyakavi, koñeĩ ñimbivavyva ryheva jyve hareka jyhasa'asy.

³⁵ She ai, tyray ikokaviveama hãndi verã tuu, kuñatãi ishy hãndi, hareka tyreko ĩme ishy hãndi.

³⁶ Hãrã pynyrẽnta'ĩrũ retaipo opa pyndyreshatãã.

³⁷ Tuu hareka ishy haihuve shyheviva, katuãpo ikoshi sha'ãporã. Ĩme'ẽ haihuve shyheviva tay hareka tajy, katuãpo ikoshi sha'ãporava.

³⁸ Hãma jukurusu hupimbaa hareka shĩmi'ĩrũrã, katuãpo sha'ãporãva.

³⁹ Hãrã hykove haihuva, hekyhaposhi, Shyrehe jyrojava hareka hykove haihumbava, hipitypo tykove opamba.

Japoava mbyhepyajypya ryheva

⁴⁰ Ĩme'ẽ pynymyvãhẽva, she shymyvãhẽ jyve; hãrã shymyvãhẽva, myvãhẽ jyveshu shymbouva.

⁴¹ Ĩme'ẽ mỹvãhẽva ko Tũpa ĩñee mbeu'ia hairã, Tũpa mbyhekoviañoĩposhu Tũpa ĩñee mbeu'ia mbyhekoviashuva rãĩmi. Ĩme'ẽ myvãhẽva kuimbai heko kavivarã, Tũpa mbyhekoviajyposhu ko kuimbai heko kaviva Tũpa heiva japo'ia rãĩmi.

⁴² Ĩme'ẽ meẽva yy rỹ'ỹsami amboi'areaperã, ãñete hai pee Tũpa myngoviañõĩposhu.