Marcos 9 - NandevaBiblia

¹ Jesús heijyshu reta: Añeteĩteva hai pee, ĩme'ẽ kopepẽivã manomba verãre, ndeiteri hesha Tũpa ẽvãpe'õ ryheva ou ñymbaikatukue ryheverã.

Jesús opa hĩmbiperã vẽkua

² Haivi 6 arama hasajyrã, Jesús koñeĩ raha Pedro, Santiago, hareka Juan, oho hãndi reta yvyturusu vate'õpe; hesapẽĩ Jesús hete opa yngai'ẽ.

³ Mondeva hĩmbiperã tĩĩrai, mba'ety mondeava johe'ia yvy'ĩãrẽ'õ kyrãite mitĩĩjy verã.

⁴ Haipe ijeshakashu reta Elías hareka Moisés, ijeta ñynoĩ hãndi Jesús.

⁵ Haipe Pedro heishu Jesús: Pyrỹmboi'ia. Haikavimbaje kope ĩmehã'ẽrã! Tijapoha mbahapy oo rãĩmi, pente na'ãporã, ĩrũ Moisés ña'ãporã hareka Elías pevarã jyve.

⁶ Shara Jesús mboireare kyjekue japyraha retarã, Pedro kuããmba marãra hei'i.

⁷ Haipe sapy'ãĩ vejy ĩãrẽ ãvãpỹntu, opa jasoi reta. Hãrã ãvãpyntuivi ñyhendu ñee heiva: Kova hai Shyray ahaihuva, pijaposhu heiva.

⁸ Haivi sapy'ãi mãĩjy juriretarã, mba'etyjy hesha'ẽ hãndiare, koñeĩ Jesús hã'ẽĩ i.

⁹ Vejyjyma jyveru yvyturusuivirã, Jesús heishu reta avy mbavape mbeu verãre ko heshava, kuareta Tay kuerajypeve manovare mbyteivi.

¹⁰ Hãrã nãtu reta hokava ñee, tẽvã pyrãndujyre ijupe mbaivara he'ise pũãjyva manovare mbyteivi.

¹¹ Pyrãndushu reta Jesús: Marãjyrãra Moisés mbypara vekua pyrỹmboi'iheare heijyre Elías rãni ou verã?

¹² Jesús heishu reta: Ãñete rãnga, Elías rãnipo ou opa mbai ñono kavi verã. Hãmera marã'ĩrã kyrã heijy Tũpa ĩñee, kuareta Tay hasa'asy verã hareka mymorãhamba verã?

¹³ Tẽvã she hai pee Elías ouma rãnga, pota japohevãĩ japohe reta; Tũpa ĩñee heiheva rãĩmi katĩ iko.

Jesús mynguera pente kunumi Ãña ichepya

¹⁴ Haivi oujy reta mboireare'õperã hesha kuareta hetava jere vasĩhe, hareka Moisés mbypara vekua pyrỹmboi'iheare, ijao ñynoĩ hãndi reta.

¹⁵ Kuaretare Jesús heshamarã, mbyrymaĩhe reta, hãrã opa ñani jyraha marãndushu.

¹⁶ Jesús pyrãndushu reta: Mbaiva rehera pijaopẽĩ hãndi reta?

¹⁷ Haipe pente kuimbai hetava mbyteivi heishu: Pyrỹmboi'ia! Kope aru nde shyray, Ãña ichepyrã ma'engureva,

¹⁸ mãĩpi ĩme'õĩpi mbaiposhy ityshu yvyperã juru mbytyryju, hãĩre opa rorokua ijehe hareka opa myvỹrãkuaseve. Hãma rymboiryreare airurematẽshuje mohẽshi verã, tẽvã haire katuã mohẽ.

¹⁹ Jesús heishu reta: Ko kuareta jyrojambaare! Mbaipeverapo'ãi penendie? Mbaipeverapo aiko pyndyrehe? Perushe kope kunumi ray!

²⁰ Hãrã verushu reta kunumi ray; tẽvã mbaiposhy Jesús heshamarã, hỹnatu opa mbyryry kunumi ray, ity yvyperã japajere'i hareka juru opa mbytyryju.

²¹ Jesús pyrãndushu kunumi ray tuu: Mbaipevãĩra kova jehushu? Tuu hei: Ndei ryhevevãi rãnga kyrã'i.

²² Hetajy rãnga ityshu tatape hareka yype potaite jukarã; ĩme'ẽ katu rijapohevarã, yrypareko hareka ỹrỹmborymitẽ.

²³ Jesús heishu: Marã'ĩrãra rere “ĩme'ẽ katu rijapohevarã”? Opa mba'e rãnga katu, jyrojava pevarã!

²⁴ Haipe kunumi ray tuu sapukerã hei: Airoja rãnga, shymbory tairoja katu!

²⁵ Jesús heshama heta kuaretare jatyherã, poshy ryheve heishu mbaiposhy: Nde, mbaiposhy ña'ẽnguva hareka japysamba, she hai nde ẽhẽshi kova kunumi ray, hareka ỹtẽñoma ichepykui!

²⁶ Haipe mbaiposhy sapuke, hỹnatu opa mbyryry kunumirã õhẽshi; juka ñonorã manova rãĩmi'ẽ, hãrã heta'ẽ heiva manomava.

²⁷ Tẽvã Jesús pysyshu ipoperã mupuãjy, hãrã kunumi ray ñymbou.

²⁸ Haivi Jesús iche o'ipe, hã'ẽĩ õpe mboireare pyrãndushu: Marã'ĩrãra mbaiposhy katuã mohẽãshi'ore?

²⁹ Jesús heishu reta: Kyrãvã mbaiposhy, koñeĩ mbaimba ho'uavape hareka ñymboi katu mohẽhã.

Jesús mokueheape mbeu mano verã

³⁰ Õhẽjy reta haivirã hasa jyraha Galileaipi, tẽvã Jesús potãã mbava kuaa,

³¹ shara mboi'ẽ mboireare. Heishu reta: Ko kuareta Tay ñonoãpokui kuaretare ipope, haire jukapokui, tẽvã mbahapy arapepo kuerajykui.

³² Tẽvã haire kuãã mbaivara he'ise hokava hai heiva, hareka kyje pyrãndushu reta.

Mbavara hai vateve'õ

³³ Vãhẽ jyraha Capernaumpe, o'ipema ñynoĩrã Jesús pyrãndushu reta: Mbaivarera pijetapeije pehupi?

³⁴ Tẽvã haire jasasakãi jyre, shara pehupi ijetamba jyveruhe, mbavara haire mbytepe vateve'ẽ.

³⁵ Hãma Jesús vapyrã hẽno 12 iare, haipe heishu reta: Ĩme'ẽ pota vateve'iarã, ikopo taykue'õ rãĩmi, hareka opava retapepo mbory.

³⁶ Haivi ñono haire mbytepe pente sanjay, hupirã heishu reta:

³⁷ Ĩme'ẽ myvãhẽva shyreepe kova sanjay rãĩmivarã, she shymyvãhẽ. Shymyvãhẽva ha'ẽã shẽĩ shymyvãhẽva, shymbouvape rãnga myvãhẽ jyve.

Ñymbyvaishomba ñandyreheva ẽẽ ñanendie

³⁸ Juan heishu: Pyrỹmboi'ia, hesha rãngaje pente kuimbai mohẽva mbaiposhy ndyreepe, tẽvã jochahashije, shara ha'ẽã jaiko jai hãndiarã.

³⁹ Tẽvã Jesús hei: Avy pijocha, mba'ety mbaikavi heshaha verã vateivi ouva japova shyreepe, ijeta porãmba'ijy shyrehe verã.

⁴⁰ Shara ñymbyvaishomba ñandyreheva ẽẽ ñanendie.

⁴¹ Ĩme'ẽ yyintẽ meẽpeva Cristo ryhevaperã, ãñete hai pee Tũpa meẽñõĩposhukui hekovia.

Mbai porãmba rijaporã

⁴² Ĩme'ẽ ityva mbai porãmbape pente jyroja shyreheva sanjay rãĩmiterivarã, haikavivepo momboha yyvasupe jajure jokuahashu ita marẽyvarã.

⁴³ Ndepo ndirity mbai porãmbaperã, jasyja; haikavivepo ndepo hyvaishoĩ riche Tũpa ẽvãpe, mahẽ ndepo mokue ryheve rehokui tata vasupe, tata katumba oveape,

⁴⁴ haipe tasore manoã hareka tata ove'ãĩtei.

⁴⁵ Ndepy ndirity mbai porãmbaperã, jasyja; haikavivepo ndepy hyvaishoĩ riche Tũpa ẽvãpe, mahẽ ndepy mokue ryheve nymombohakui tata vasupe, tata katumba mboveavape;

⁴⁶ haipe tasore manoã hareka tata ove'ãĩtei.

⁴⁷ Ndyresa ndirity mbai porãmbaperã, nohẽ ndijuhuvi; haikavivepo ndyresa hyvaishõi riche Tũpa ẽvãpe, mahẽ ndyresa mokue ryheve nymombohakui tata vasupe,

⁴⁸ haipe tasore manoã hareka tata ove'ãĩtei.

⁴⁹ Shara opava reta joheapo tatape.

⁵⁰ Haikavi rãnga juky; tẽvã hymboshyveãmarã, mbaivaperapo pyporyjykui? Pyreko juky pyndypyape, hareka opavare piko kavi hãndi.