Marcos 8 - NandevaBiblia

Jesús myngaru 4.000 kuaretare

¹ Pente arape hykuãĩ heta jatyjy kuaretare, tẽvã mba'ety hou verãre. Hãrã Jesús hẽno mboirea retarã heishu:

² Aparekonytẽ ko kuaretare, mbahapy arama'ẽ shendie, hareka mba'etyre reta hou verãre.

³ Ñymbahy ryheve ãmondojy hentaperã, ĩmepo'ẽkui pya mamano'ia pehupi; shara ĩme'ẽ mbyryivi ouvare.

⁴ Mboireare heishu: Maĩvirapo ñavãhẽshu ñamyngarupy verãre, mba'ety koipi ikova?

⁵ Jesús pyrãndushu reta: Mbovy pãhãra ĩmepyre? Haire hei: 7.

⁶ Hãma mbyvapyka kuaretare; haivi heky 7 ia pãhã, ohovasarã, pyseã hareka meẽshu mboireare, haivi memeẽshu verã opaite kuaretare.

⁷ Ĩmerejy reta mbovy pira mishishĩvã, ohovasarã memeẽjyshu reta.

⁸ Opaiteva karu hareka hỹvãta reta, haivi pysẽvẽ hemby vekua mynõjy retarã, 7 kanata mynyhẽjy reta.

⁹ Haipe karu vekuare 4.000 kuareta rupi'ẽ, haivi Jesús opa mondojy.

¹⁰ Jesús jupijy kanoape mboireare hãndirã, oho Dalmanuta kyty.

Fariseore jurure mbai heshaha verã

¹¹ Haipe vãhẽ jyveru fariseore hareka õñepyrõ hehei ñynoĩ ijupe hãndi reta hãrã pyahããshu verãre Jesús, haire jurureshu mbai heshaha verã vate araivi ouva.

¹² Jesús putuhẽ mondorã hei: Marã'ĩrãra kova kuaretare jurure mbai heshaha verã? Añeteĩteva hai, me'ẽhãpope pota pyheshava.

¹³ Hãrã hejashu reta, hãrã Jesús jupi kanoaperã ohojy yy hyvaisho kyty.

Fariseore jylevadura

¹⁴ Haipe mboireare sarembahe reta hou verãre, koñeĩ pente pãhãimba ĩmere reta kanoape.

¹⁵ Jesús heikavishu reta: Pymãĩ kavi, pingareko pindijeheshi fariseo hareka Herode ryhevare jylevadura.

¹⁶ Jesús mboireare ijeta ijupi retarã hei: Pãhã jaruãjerã'ãmo kyrã hei'i.

¹⁷ Jesús kuaaravĩĩ marãra ijeta ñynoĩrã heishu reta: Marã'ĩrãra pere pãhã mba'ety pyreva? Pikuaa'ãĩteirateri? Pyndypya tãtãiteirateri?

¹⁸ Pyndyresa rãngapi, pyheshããra'e? Papysa rãngapi, pyhenduãra? Pymandu'ãrahe

¹⁹ ãmbijaorã vẽkua 5 pãhã 5.000 kuimbai ẽvã retape? Mbovy kanatara pymynyhẽjy hemby vekua? Haire hei: 12 kanata.

²⁰ Hareka 7 pãhã 4.000 kuimbai pevarã ambijaorã, mbovy kanatara pymynyhẽjy hemby vekua? Haire hei: 7.

²¹ Jesús heishu reta: Pikuããrateri?

Jesús mynguera pente kuimbai heshamba kũvãĩpia Betsaidape

²² Jesús hareka mboireare vãhẽ jyraha Betsaidape, haipe veruashu pente kuimbai heshamba kũvãĩpia, jurure jyreshu Jesús pokohe verã.

²³ Jesús pysyshu ipope heshamba kũvãĩpiarã nohẽ raha tentaivi, myndyvy hesarerã ipo ñono'ĩãrẽ; haipe pyrãndushu heshara maĩnunga.

²⁴ Haipe heshamba kũvãĩpia hei: Ahesha kuaretare, tẽvã yvyra vata'iare rãĩmi ahesha.

²⁵ Jesús hykuaĩ ñonojyshu ipo hesare ĩãrẽ, hãrã kuimbai kuera. Heshajy kũvãĩpi hareka mbyryivi opa mba'e hesha kavijy.

²⁶ Haivi Jesús mondojy hentaperã heishu: Avy ekuajy tentape.

Pedro hei Jesús haiva Cristo

²⁷ Jesús hareka mboireare oho tentamire'õipi Cesarea Filipope'õre. Pehupi Jesús pyrãndushu mboireare: Marãra hei shyrehe kuaretare? Mbavara she?

²⁸ Haire heishu: Ĩme'ẽ hei ndyreheva Juan Bautista, ĩme'ẽjy heiva Elías, ĩrũre heijy ndyrehe nde haiva Tũpa ĩñee mbeu'ia aryka'eiteva.

²⁹ Jesús pyrãndushu mboireare: Pee jyveno, marãra pere jyve shyrehe, mbavara she? Pedro heishu: Nde hai Cristo.

³⁰ Jesús hei jyvyĩshu mboireare, potamba kova mbai mbavape mbeu verãre.

Jesús mbeu mano verã

³¹ Jesús õñepyrõ mbeushu mboireare hai kuareta Tay hasa'asyñoĩ verã, heshatambaa verã Judio juhuvishare, pai ruvishare hareka Moisés mbypara vekua pyrỹmboi'iheare. Heijyshu reta hai jukaha verã, tẽvã kuerajypo mbahapy arape.

³² Jesús mbeu kavishu reta kova, hãrã Pedro raha yngaity hã'ẽĩrã, poshy ryheve heishu ỹtẽñoma kyrã ijeta verã.

³³ Tẽvã Jesús jerepyrã, maĩ jykoty mboirea retarã poshy ryheve hei Pedrope: Syry shyhevi Satanás! Rikuãã nde Tũpa pya mbijetava rãĩmi, koñeĩ kuareta pya mbijetava rãĩmi.

³⁴ Haipe Jesús hẽno mboireare hareka kuareta retarã hei: Ĩme'ẽ pota shaykue ouvarã, tiñymbysare ijuhuvi, tuhupi jukurusu, tou shaykue.

³⁵ Shara hykove potaĩ mondojepe'ia, ha'eipo jyvarejyhekui. Tẽvã hykove meẽ shyreheva hareka Ñee kaviva rehe, ohojepepokui.

³⁶ Mbaivara mbijehupo pente kuareta opaĩ ĩmere ko yvy'ĩãrẽ'õvarã, manoshirã?

³⁷ Mbaivara kuareta katu meẽhe hykove hekovia?

³⁸ Ĩme'ẽ mbava shynotivarã hareka Shiñee notiva ko tykove ñarõva hareka mbai porãmba japo'ia hỹnonde, kuareta Tay notipo jyveshukui oujyma Tuu hĩmbipekue ryheverã hareka Tũpa jokueva heko kyambare hãndi.