Marcos 7 - NandevaBiblia

Mbai kuareta myngyava

¹ Haipe ñymboja Jesús ẽvãpe fariseore hareka Moisés mbypara vekua pyrỹmboi'iheare, Jerusalenvi ouva.

² Kovare hesha Jesús mboireare a'ãmo karu ñynoĩ ipo kya ryheverã, he'ise jypoimbaa, ijeta porããhe reta.

³ Shara fariseore hareka yngaa Judiore, tynondevare ikova rãĩmi ĩmeĩ japo, karuã reta jypoi kaviãrã.

⁴ Hãma oujy maĩnunga ovaha'õĩvirã ho'uã ovava ndeiteri joherã, heta ĩmerejy kyrãvã haire jypykuava: Yy ho'uapya joheañõĩpopy, opaite timbiporyre, hareka ochehahea.

⁵ Hãrã fariseore hareka Moisés mbypara vekua pyrỹmboi'iheare pyrãndushu Jesús: Marã'ĩrãra rỹmboivare japoã tynondevare heiva rãĩmi, jypoimba ryhevẽĩ karu jyre?

⁶ Jesús heishu reta: Pee hova mokue'iare! Hei kavi pyndyrehe Tũpa ĩñee mbeu'ia Isaias, jykuatiape heiva rãĩmi: “Kova tentape'õ reta rãnga jurupeĩ shemombai jyre, tẽvã pyare mbyry'ẽ shyhevi.

⁷ Shemombai rã'ãngai jyre, shara kuaretare hei vekuaĩ pyrỹmboi jyrehe”.

⁸ Pee rãnga pijapoã ñeẽ japoha verã Tũpa heiva, kuaretare hei vekuãĩ pijapopirã.

⁹ Heijyshu reta: Pee pipykuava rãĩmi pijapopirã, pijapoã Tũpa ĩñee japoa verã.

¹⁰ Shara Moisés hei: “Japoshu nderu hareka ndesy heiva hareka ñyngarekohe reta”, tẽvã “ĩme'ẽ tuu hareka ishy jahe'ihearã, tijukaha”.

¹¹ Tẽvã pee pypyrymboikuei, pente kuimbai katu heishuva tuu hareka ishy: “Katuãny ãrỹmbory, shara opaiteva ĩme'areare hai Corban” (he'iseva: “Tũpa pevarã mbijicheava”).

¹² Hãma kyrãma heirã, pee pymboihekuei katuveamapo mboryshu tuu hareka ishy.

¹³ Kyrã pimbijiche Tũpa ĩñee, pipykuava rãĩmi pijapopirã, hãrã heta maĩnunga kyrãva pijapo.

¹⁴ Haivi Jesús hykuãĩ hẽnojy kuareta hetavarã heishu: Pijasakashyre opaiteva pikuaa kavi verã:

¹⁵ Mba'ety ho'uavare kuareta myngyashu verã Tũpa hỹnonde; pyaivi õhẽva rãnga katu myngyashu.

¹⁶ Ĩme'ẽ japysa'iarã, tyhendu.

¹⁷ Jesús hejama kuareta retarã iche pente oo'ipe, haipe mboireare pyrãndushu mbaivara he'ise hokava ñee ñymyhã'ãnga.

¹⁸ Hai heishu reta: Peeavera pikuãã kova? Pikuããmba mba'ety maĩnunga kuareta houva myngyashu verãrãme?

¹⁹ Shara icheã pyape, hyepẽĩ vãhẽrã haivĩma õhẽjyshi. Kyrã Jesús heirã he'isema opaite ho'uavare kyambava.

²⁰ Hãrã heijy: Kuaretare pyaivi õhẽva rãnga, myngya.

²¹ Shara kuareta pyaivi õhẽ porãmba pya mbijetava, omendava ynga mãĩ'ijyhea, omendambape jyrekova, purukava,

²² manarõ, mbai pota raiviva, poshyrei'iva, japuva, ñynotimbaa, kateỹva, juruvaiva, jyroja ijeheva, opaisharei'iva,

²³ opaite kova mbai porãmba õhẽ typyaivi, hãrã pyrỹmyngya.

Taupe haimba Judiova jyrojahe Jesús

²⁴ Haivi Jesús oho Tiro hareka Sidon kyty; haipe iche pente oope potambatẽ mbava kuaava, katũã ñemĩ;

²⁵ pente taupe memby kuña mbaiposhy ĩmerea, hendu Jesús he'iahevarã, ou ĩñesu hỹnonde.

²⁶ Kova t aupe hai Griega, tenta Sirofeniciaivi ouva. Haipe jurure'asyshu Jesús, mohẽshi verã mbaiposhy memby ĩmerea.

²⁷ Tẽvã Jesús heishu: Ma'ẽihe tykarurãni tayre hyvãtapeve, shara porãã jahekyshi tayre houva ñameẽshu verã ñaũmbare.

²⁸ Hãrã taupe hei: Ãñete rãnga, Sheja! Tẽvã ñaũmba mesa ipe'iare, hykuaĩ houjy tayre houva ku'ikue mesaivi oava.

²⁹ Jesús heishu: Ãñete rãnga rereva, kapyry ekuajy nyrẽtape, mbaiposhy õhẽmashi nymemby.

³⁰ Taupe vãhẽjy oho hentaperã, hesha memby ñeno'ẽ hupape. Shara õhẽmashi mbaiposhy.

Jesús mynguera pente japysamba hareka ña'ẽnguva

³¹ Jesús õhẽ Tiroivirã hasa oho Sidonpi, hareka vãhẽ oho yyvasu Galileape, yvy Decapolis he'iashuape.

³² Haipe veruhashu pente kuimbai japysamba hareka ña'ẽnguva. Hãma jurureshu reta ñono ĩãrẽ verã ipo.

³³ Hãma Jesús hã'ẽĩ yngaity rahashi kuaretare, haipe japysa põĩpyrã, myndyvy iporerã pokohe ĩku;

³⁴ haivi Jesús vate maĩrã putuẽ mondorã hei: “Efata!” (he'iseva: “Jype'a!”)

³⁵ Haiperaveĩ jypeajyshu japysa, ĩku jera, hãrã ijeta kavijy.

³⁶ Hãma Jesús heishu reta avy mbavape mbeu verãre, tẽvã kyrãte he'iashuva ñymyrõĩteve opa mbeushu kuaretare,

³⁷ shara hãĩrãite hesha retarã hei: “Japo kavi rãnga Jesús, shara japysambavare myhendukajy, hareka ña'ẽnguvare mbijetakajy”.