Marcos 5 - NandevaBiblia

Kuimbai mbaiposhy ichepya Gadarape'õ

¹ Vãhẽ jyraha yyvasu hyvaishope, Gadarenore jy'yvype.

² Jesús vejyĩ kanoaivi, ou hỹvãĩti tã'õvere õĩvi pente kuimbai mbaiposhy ichepya,

³ ñymyhenta'iva tã'õvẽre ẽvãĩpi, mbavamba katu jokova, ajemaĩ kadenape jokuaha.

⁴ Ajemaĩ ipy hareka jyva pokuahashi kadenape, tẽvã opaĩ mỹndoso, mba'ety jepyheva.

⁵ Ara hareka pyharekue iko sapuke'i ñũũ hupi hareka tã'õvẽre ẽvãipi, opa ñỹmbyperepy ita.

⁶ Hãrã mbyryivi Jesús hesharã ñani ou jykotyrã, ĩñesu hỹnonde.

⁷ Hãma hỹnatu sapukerã hei: Jesús, Tũpa vateve'õ Tay, mbaivara ĩmeryre shendie? Airurende Tũpa heepe avy rivareite shyrehe verã!

⁸ Jesús heishu: Mbaiposhy, ẽhẽshi ko kuimbai!

⁹ Haivi Jesús pyrãndushu: Marãra hei'o ndyree? Hai hei: Legion he'ia rãnga she, shara yryreta.

¹⁰ Haipe jurure'asyshu Jesús, potamba mohẽ verãre iko jyreaivi.

¹¹ Haipe mbyryã karu ñynoĩ kushi heta vekua, yvyturusu hyvache.

¹² Hãma mbaiposhyre jurure'asyshu Jesús: Ma'ẽĩ yryrehe tohoa ticheapy kushire.

¹³ Jesús ma'ẽĩhe, hãrã mbaiposhy porãmba opa õhẽshi kuimbairã opa jyraha ichepy kushire, 2.000 kavi'õ, opa ñyvãhẽrã jyraha oapy yyvasukue, haipe opa mano.

¹⁴ Hãma kushi ñyngareko'iheare opa ñyvãhẽrã, jyraha mbeu ikova tentaipi hareka ñuu hupi. Hãrã kuaretare jyraha hesha ikova.

¹⁵ Vãhẽma jyraha Jesús ẽvãperã hesha reta kuimbai mbaiposhy ĩmere vekua vapy'ẽ, ñĩmimonde hareka haikavijyma'ẽrã. Hãrã kyje jyre.

¹⁶ Hãma kuaretare heshava Jesús, mbeu mbaivara ikohe kuimbai mbaiposhy ĩmere vekua hareka kushire.

¹⁷ Hãrã kuaretare õñepỹrõ jurure'asyshu Jesús oho verã jy'yvy retaivi.

¹⁸ Jesús jupijy kanoaperã, ko kuimbai mbaiposhy ĩmere vekua, jurureshu oho hãndi verã.

¹⁹ Tẽvã Jesús he'iãshu, koñeĩ heishu: Ekuajy nyrẽntape hareka mbeushu nyrẽtãrãre, mbai Ñandeja japo ndyreheva, hareka marãra ndypareko.

²⁰ Hãrã hoka kuimbai oho õñepyrõ mbeu Decapolispe, opa mbai haikaviva Jesús japohe vekua; hãrã henduvare mbyrymaĩ reta.

Jairo tajy hareka pente taupe ñymbairasy'i vekua

²¹ Hãma Jesús hasajy yy hyvaisho kyty kanoaperã, yy hymbeypema'ẽrã, kuareta hetava jatyjyhe.

²² Vãhẽ ou Jesús ẽvãpe pente mburuvisha Judiore ñymbatyseape'õva Jairo he'iashua, heshamarã ĩñesu hỹnonde.

²³ Jurureshurã hei: Shyrajy rãnga mano serima'i, eimĩte ndepo ñono ĩãrẽ kuerajy verã.

²⁴ Hãrã Jesús oho hãndirã; kuareta hetava oho jyve hipii hareka opa jasoishu reta.

²⁵ Haipe kuaretare mbytepe ẽẽjyve pente taupe 12 ãñoma huvy pytambashia,

²⁶ heta iko'asy pyrỹpyhãno'iare ipoipi, opama poryhe kyrypoti ĩmetere vekua potate kuerarã, katynga teiteve oho'ishu ñymbairasykue.

²⁷ Henduma Jesús he'iahevarã, ou kuareta hetavare pãũpe, ñymboja haykueivirã pokohe mondeva ĩãrẽ'õ.

²⁸ Shara pyapẽĩ hei: “Mondeva reheĩ apokorã, akueramapokui”.

²⁹ Haipevaĩ pytashi tuvykue hareka hetepy ñandu kueramava mbai'rasykueivi.

³⁰ Jesús ñandu jyve õhẽshia mbaikatukue; jerepy hetavare mbyteperã pyrãndu: Mbavara pokohe amondeva?

³¹ Mboireare heishu: Ryhesha rãnga marãra opa ndasoi kuaretare, hãmera rỹpyrãndujy, mbavara poko shyrehe?

³² Tẽvã Jesús mãĩ jyvyĩhupi kuaretare hesha verã mbavara pokohe.

³³ Hãma taupe kyjeiterã ryry'i, shara kuaa ijehe mbaivara ikohe, hãrã ou, hareka ĩñesu Jesús hỹnonderã opa mbeushu añeteva.

³⁴ Jesús heishu: Shyrajy, rirojarãmẽĩ rykuera. Kapyryĩ ekuajy, shara rykueramahe nymbairasykue.

³⁵ Jesús ijeta teri'õvã, vãhẽ jyveru kuimbaire Jairo hentaivi, huvisha Judiore ñymbatyseape'õ, hareka heishu reta: Ndyrajy manoma; marã'ĩrãra ĩmeĩ rỹmangãtũãrẽĩ pyrỹmboi'ia?

³⁶ Tẽvã Jesús jasakããhe haire heiva, hãrã heishu mburuvisha Judiore ñymbatyseape'õ: Avy kyje, jyrojaiño.

³⁷ Tẽvã hejãã yngare mi'ĩrũ verã, koñeĩ Pedro, Jacobo hareka tyvy Juan.

³⁸ Hãma vãhẽma jyraha Judiore ñymbatyseape'õ huvisha hentaperã hesha reta opa ikoraiva, jaheova hareka sapukeva,

³⁹ iche jyraha oo'iperã heishu reta: Mbaiva rehera opa pikorai hareka pijaheo? Kova kuñatãĩ ray manoã, ocheĩ rãnga'ẽ.

⁴⁰ Haipe kuaretare jojejyre. Tẽvã Jesús opa mohẽ oo ipe'iare, haivi iche tuu, ishy hareka mboireare kuñataĩ ray ẽvãpe.

⁴¹ Jesús pysy ipoperã heishu: Talita, kumi! He'iseva: “Kuñataĩ ray she hainde, pũ'ã”.

⁴² Kuñataĩ ray haipevaĩ pũãrã vatajy; 12 ãñomaĩre. Kuaretare opa mbyrymaĩ reta hokava hesharã.

⁴³ Tẽvã Jesús heishu reta mbeumba verãre yngavape ikova, haivi heishu myngaru verãre kuñataĩ ray.