Marcos 4 - NandevaBiblia

Ñimity'ia ryheva

¹ Jesús hykuãĩ õñepyrõ pyrỹmboijy yyvasu hỹmbeype, haipe kuareta hetava ou hai ẽvãpe, oho jupi vapy kanoape, hãrã ñymbaty'õre pyta yyvasu hỹmbeype.

² Hãrã heta mboishu reta mbai ñee ñymyhã'ãnga rupii, hãma pyrỹmboi'ẽrã hei:

³ Pyhendu: Pente ñimity'ia oho ma'ẽty.

⁴ Ma'ẽtyrã ĩme'ẽ oava pehupi, haipe ou vyrare opa hou.

⁵ Ĩme'ẽjy oava ita pãũpe, yvykui jihiavaperã areã hẽño, yvy pyrẽrĩvape.

⁶ Haivi kuarasy õhẽmarã opa hapy, hapõarã opa jipi.

⁷ Ĩme'ẽ oava kapi'ãti pãũpe, hoka ñanavã vatema ohorã opa jasoi.

⁸ Tẽvã ĩme'ẽjy oava yvy kavivape, hẽño, vatema ohorã heta'ia, ĩme'ẽ iava 30, ĩrũ 60 hareka 100 kavi pente jypyivi.

⁹ Haivi Jesús heishu reta: Ĩme'ẽ japysa'iarã, tyhendu.

Marã'ĩrãra Jesús ijeta ñee ñymỹhã'ãnga rupii

¹⁰ Haivi Jesús hã'ẽĩma ñỹnoĩ hãndirã pyrãndushu reta 12 ia mboireare hareka haipe õĩ hãndivare, mbaivara he'ise hoka ñee ñymyhã'ãnga,

¹¹ Jesús heishu reta: Pee rãnga ñemiãpe'õ Tũpa ẽvãpe'õ ryheva pynymbykuahaka, tẽvã yngavare mbe'uashu reta ñee ñymyhã'ãnga rupii;

¹² maĩtẽ jyreare tẽvã heshãã, hendutẽvare kuãã, potãã Tũpa kyty oujy retarã hai hejareiishi verã mbai porãmba japo vekuare.

Jesús mbeu kavivejy ñimity'ia ryheva

¹³ Jesús heijyshu reta: Pikuããra ko ñee ñymyhã'ãnga? Hãmera marãpo pikuajykui yngavare?

¹⁴ Ñimity'ia hai Tũpa ĩñee mbeu'ia.

¹⁵ Ĩme'ẽ timity oava pe hymbeype hokava hai Tũpa ĩñee hendutẽva, Satanas ou opa hekyjyshi ñee pyape ñotỹhãtẽva.

¹⁶ Ĩme'ẽjy timity oava ita pãũpe hokava hendu Tũpa ĩñeerã, areã vy'ape myvãhẽ,

¹⁷ tẽvã hapo pukuãrã kỹã'ẽ, hãma oushu mbai porãmbarã, poi jyroja.

¹⁸ Hãma ĩme'ẽjy oava kapi'ãti hetava pãũpe, hendu Tũpa ĩñee;

¹⁹ tẽvã ojepy'apy ko yvy'ĩãrẽ'õreirã, jytavykashu iko katukue hareka pota hetare mba'ekue, kova opa ou ĩãrẽshi ñee hẽnduvarã, katoa ia.

²⁰ Tẽvã ĩme'ẽjy yvy kaviape oava: Hokava reta hai hendu Tũpa ĩñeerã pysykaviva, hãrã ia 30, ĩrũ 60 hareka 100 kavi ia.

Mba'ety ñemiape'õ jykuamba verã

²¹ Hãrã heijyshu reta: Veruhara kuei tataĩndy hyru ñonoã verã maĩnunga hyru ipe maĩrã turupa ipe? Mba'ety! Mbai sapeka vateñõĩpo ñonohã sape kavi verã.

²² Mba'ety maĩnunga ñemiãpe'õ kuaahamba verã; hareka ñomihareva heshahamba verã.

²³ Ĩme'ẽ japysavarã, tyhendu.

²⁴ Hãrã heijyshu reta: Pijasaka kavihe ko pyhendu pẽĩvare, papisha pijapova rãĩmi katĩĩpo, Tũpa pory jyve pyrehe; hãrã mi ĩrũhãvepojy pekui ko pyhenduvaivi.

²⁵ Shara ĩmemarea mẽ'ẽhãvepojyshu; tẽvã mba'etyreva, mĩshĩ ĩmetereamikue, hekyha jyvapypojyshi.

Ñee ñymyhã'anga timity hẽño kaviva ryheva

²⁶ Jesús heijyshu reta: Tũpa ẽvãpe'õ ryheva rãnga ova pente kuimbai ma'ẽty'ia;

²⁷ ocherã maĩrã sarekorã, hasa ara, pyhare, hãrã ñotyva hẽñoshu hai kuamba'õvã marãra.

²⁸ Yvy rãnga ha'ii myhẽño; tynonde mbyhapo, myhãka haivi mbypoty, mbi'ia hareka myhãỹjy.

²⁹ Haivi javyjemãrã myno'õhã, shara vãhẽma jy'ararã.

Ñee ñymyhã'anga mostaza hãỹ ryheva

³⁰ Hãma Jesús heijy: Mbaivarapo ñambivachehe Tũpa ẽvãpe'õ ryheva? Marãvara ova?

³¹ Hãi rãnga mostaza hãy, yvype ñotyãvã. Hokava hai mbairãỹ mishĩveva opaite yvy'ĩãrẽ'õ retaivi.

³² Hãma ñotyãmarã, hẽño, ikoshi marẽyveva opa yngava ñotyãva retaivi, hãkã marẽrẽyrã vyra retaave ñymby haitypy hareka ñykuãrãsyã'ipe reta.

Ñymyhã'ãnga Jesús poryva

³³ Kyrã Jesús heta ñee ñymyhã'ãnga rupii mbeushu reta Tũpa ĩñee, kuaa kavive verãre.

³⁴ Ñee ñymyhã'ãngambape Jesús ijetããshu reta; tẽvã mboireare hã'ẽĩ'õpẽĩ mbeu kavishu reta.

Jesús joko yvytu vasu

³⁵ Hokava arape pỹntuma potarã, Jesús heishu mboireare: Jahasa yy hyvaisho kyty.

³⁶ Haivi opajyma mondo kuareta hetavarã, mboireare rahashu Jesús kanoape. Ĩme'ẽjy ynga kanoape ohovare.

³⁷ Hãrã sapy'ãĩ vãhẽ yvytu vasukue, hãrã yy ñarõvã iche kanoaperã, õñepyrõ mynyhẽ rahare.

³⁸ Tẽvã Jesús oche'ẽ kanoa huva kyty. Hãma mombarã heishu reta: Pyrỹmboi'ia! Ryheshãra opamapo ñañapymỹĩrã?

³⁹ Jesús pũã hareka poshy ryheve heishu yvytu hareka yyvasu: Jasaka! Chirĩrĩ'ẽ! Haipevaĩ yvytu pyta, hãrã opaitea haikavijy'ẽ.

⁴⁰ Haipe Jesús heishu mboireare: Marã'ĩrãra pykyjepi? Pirojããmba teri?

⁴¹ Tẽvã mboireare opa kyje retarã pyrãndujyre ijupe: Mbavarajy kova, yvytu hareka yyvasuave japoshuva hai heiva?