Marcos 3 - NandevaBiblia

Jesús mynguera kuimbai ipo opa vỹrãkuava

¹ Jesús ichejy Judiore ñymbatyseape, haipe'i pente kuimbai ipo opa vỹrãkuava.

² Hãma ñemiãpẽĩ mãĩ jyrehe, hesha verã mynguerarapo putu'uava jy'arape, ĩmere verãre mbaivarapo heihe reta.

³ Hãrã Jesús heishu kuimbai ipo vỹrãkuava: Pũ'ã, ñymbou mbytepe.

⁴ Haipe pyrãndushu yngare: Mbaivara katu jajapo putu'uava jy'arape, haikavivara maĩrã porãmbara? Ñamondojeperapo pente tykove, maĩrã jajukarapo? Tẽvã haire mba'ẽã heishu reta.

⁵ Haipe Jesús poshy ryheve mãĩ jurirã mbyvy'ã pya tãntaĩte retarã, hãma heishu hoka kuimbai: Mysymyĩ ndepo. Ko kuimbai ipo mysymyĩrã, kuera.

⁶ Haivi fariseore opajy õhẽ oho, hareka jyraha ijeta hãndi Herodes ryhevare marãrapo juka reta Jesús.

Kuareta hetava ñymbaty yyvasu hỹmbeype

⁷ Jesús hareka mboireare hãndi jyraha yyvasu hymbey kyty, hareka kuareta hetava oho haykue Galileaivi.

⁸ Kuaama reta mbai vasu haikaviva japorã, ou jyve hesha verãre Judeavi, Jerusalenvi, Idumeavi, Jordan kuarasy õhẽaivi, Tiro hareka Sidonvi.

⁹ Hãrã Jesús jurureshu mboireare myhẽvã verãre kanoa, shara potãã kuareta hetava jasoirã.

¹⁰ Shara hetavapema mynguerarã, ñymbairasy vekuare opa jasoi pota pokoherã.

¹¹ Haipe mbaiposhyre heshamarã, ĩñesu hỹnonderã, sapuke: Nde hai Tũpa tay!

¹² Jesús ñyngãtape heishu reta potamba mbeu verãre, mbavara hai.

Jesús pyhỹrõ 12 mboi verã

¹³ Jesús jupi yvyturusurerã, haipe hẽno pota hẽnovare, hãrã haire ou hai ẽvãpe,

¹⁴ hãrã 12 kavi pyhỹrõ ikoñoĩ'i hãndi verãre, hareka mondo verã mbeu verãre Ñee kavi. Kovare mbyhee Apostol.

¹⁵ Hãrã meẽshu reta mbaikatu mynguera verã ñymbairasyvare hareka mohẽ verã mbaiposhyre.

¹⁶ Kova hai 12 õre hai pyhỹrõvare: Simón, mbyheejyva Pedro;

¹⁷ Jacobo hareka tyvy Juan Zebedeo tayre, mbyheejy Boanergues, he'iseva: “Hy'apua rayre”;

¹⁸ Andres, Felipe, Bartolome, Mateo, Tomas, hareka Jacobo Alfeo tay, Tadeo, Simón Canaanva,

¹⁹ hareka Judas Iscariote, Jesús pysyka vekua.

Ñee porãmba Espiritu Santore

²⁰ Hãma Jesús hareka mboireare iche pente oope, haipe kuareta heta vekua jatyjyhe, hãrã katũa karushi reta.

²¹ Jesús hẽtãrãre kuaamarã jyverujy heka; shara heimbahe reta, kuakuamba'ia.

²² Tẽvã Moisés mbypara vekua pyrỹmboi'iheare, ouva Jerusalenvi, hei reta: “Kova kuimbai rãnga ĩmere Beelzebu, Ãña juhuvisha, hãmẽ rãnga Beelzebu ñymbai katukue rupii mohẽ'i mbaiposhykue”.

²³ Jesús hẽnorã mbeushu reta pente ñee ñymyhã'ãnga heiva: Marãrapo Satanas mohẽjy yngava Satanas?

²⁴ Pente tentavasu ijupii ñymbyvaishorã, katuãpo kỹỹ iko.

²⁵ Hãma pente oope'õre ñymbyvaisho jyre ijeherã, oho porããñõĩpo.

²⁶ Kyrãijy Satanas ñimbijaorã hareka pũã ijupiirã katuã kỹỹ'ẽ, vãhẽñõĩpo japyape.

²⁷ Mbavẽapo iche kuimbai pỹrãtava hoo'ipe manarõshu verã, ñapĩnti rãniãrã, hãmerãpo kapyry manarõshu.

²⁸ Añeteĩteva hai pee, Tũpa hejareiiposhu kuimbaire mbai porãmba japo vekua hareka ijeta porãmba'iheare.

²⁹ Tẽvã Espiritu Santo ijeta porãmbaheva mbaipe'ãĩteipo hejahareiishi, koñeĩ mbai porãmba pytapohe opa ara.

³⁰ Kyrã Jesús hei, shara heihe reta mbaiposhy ĩmerea.

Jesús ishy hareka tyvyre

³¹ Haivi vãhẽ jyveru Jesús ishy hareka tyvyre, tẽvã katuapeĩ ñynõi, haivĩĩ hẽnõka reta.

³² Hãrã kuaretare Jesús vapy'i jurivare heishu: Ndesy, ndyryvyre hareka niindyre katuape ndyreka jyre.

³³ Jesús heishu reta: Mbava retara shesy hareka shyryvyre?

³⁴ Haivi maĩhe juri vapy'õva retarã hei: Kova reta rãnga hai shesy hareka shyryvyre.

³⁵ Opaite japoshuva Tũpa potava, hai reta rãnga, shyryvy, shiindy hareka shesy.