Marcos 2 - NandevaBiblia

Jesús mynguera pente kuimbai vatamba vekua

¹ Mbovy aramajyrã Jesús ichejy Capernaumpe. Kuaahamajy oo'ipe ĩme'ẽrã,

² heta kuaretare oho jatyhe õche javeveãpeve, haipe Jesús mbeushu reta Tũpa ĩñee.

³ Haipe vãhẽ jyveru urũndy kuimbai veruva pente vatamba vekua.

⁴ Katynga hetaite kuaretare haipe'õrã katuã myvãhẽ reta Jesús ẽvãpe, hãrã mbijupi reta oo ĩãrẽ, haipe hese peashu retarã, mbyvejy reta kuimbai vatamba vekua hupa ryheve.

⁵ Jesús heshama marãra haire jyrojaherã, heishu vatambava: Shyray, mbai porãmba rijapo vekua hejareiima ndyhevi.

⁶ Haipe vapy ñynoĩ mbovy Moisés mbypara vekua pyrỹmboi'iheare pyapeĩ hei ñynoĩ:

⁷ “Marã'ĩrãra kova kuimbai kyrã ijeta? Jaitamba rãnga he'i! Mbavarapo hejareii ñande mbai porãmba jajapo vekua? Penteĩ rãnga'ẽ, hokava hai Tũpa”.

⁸ Tẽvã Jesús kuaaravĩĩ mbaivara hei ñynoĩ pyape, hãrã heishu reta: Marã'ĩrãra kyrã pypya pimbijetapẽĩ?

⁹ Mbaivara javaĩa jaishu ko vatambava: “Hejahareiima ndyhevi mbai porãmba rijapo vekua”, maĩrã jairaposhu: “Pũã hupi ndurupa, ekuajyvy?”

¹⁰ Pikuaa verã, kuareta Tay ĩmere mbaikatu yvy'ĩãrẽ hejareii verã mbai porãmba vekua. Hãma heishu vatamba vekua:

¹¹ She hainde: “Pũ'ã Hupi ndurupa, ekuajy nyrẽtape”.

¹² Hãma haipevãĩ vatamba vekua pũã, hupi huparã hetavare hesapẽĩ õhẽjy oho, hãma mbyrymaĩ reta, hareka õmombaivasu Tũpaperã hei jyre: Maĩpia rãnga kyrãva mbai jahesha!

Jesús hẽno Leví

¹³ Haivi Jesús ohojy yyvasu hymbeype, haipe heta kuaretare ou jatyhe hãrã hai mboishu reta.

¹⁴ Oho'irã hesha Leví, Alfeo tay, vapy'ẽ tenta Roma pevarã kyrypoti okorase'õpe, Jesús heishu: Ei shimi'ĩrũ. Leví pũãrã oho hãndi.

¹⁵ Hãma jehumba, Jesús vapyma'ẽ mesape Leví hentaperã, kyrypoti mbatyse'iare Roma pevarã, mbai porãmba japo'ia retaave ou vapy hãndi, hareka mboirea reta jyve; shara heta'ẽ ouva haykue.

¹⁶ Hãma Moisés mbypara vekua pyrỹmboi'iheare hareka fariseore, hesha Jesús karu ñynoĩ hãndi mbai porãmba japo'iare kyrypoti okorase'iare Roma pevarã pyrãndu jyreshu Jesús mboireare: Marã'ĩrãra pynymboi'ia karu hãndi heko porãmba'iare hareka tenta jurureva okorase'iare?

¹⁷ Jesús hendu hokavarã heishu reta: Mambaimba'ia ikotẽveãhe pyrỹpỹhãno'ia, koñeĩ ñymbairasy'ivaĩ. She aiã ãhẽno heko kavivape, koñeĩ mbai porãmba japo'ia retaĩ.

Jesús pyrãndu jyreshu karumba ryheva

¹⁸ Juan Bautista mboireare hareka fariseore haipe kavi karuã ñynoĩ reta, hãma ĩme'ẽ ou pyrãndushua Jesús: Marãĩra Juan hareka fariseo mboireare karuã ñynoĩ hai, tẽvã rỹmboiryrea retamba japoã hai?

¹⁹ Jesús heishu reta: Katura karuãkuei omendavape'õre ĩme ñynoĩ hãndi omendavarã? Katuã rãnga japo ĩmeteri ñynoĩ hãndirã.

²⁰ Tẽvã, vãhẽpokui ara hoka temerã hekyashi verãre, haiperãpo karuã ñynoĩkui.

²¹ Mba'ety mbyvyvy verã mondeava py'ahuva tuja vekuare, hoka mondeava pysẽvẽ py'ahuva matarã tivishaitevepo tuja vekua myndoro.

²² Hareka mba'ety ñonova vino py'ahuva vakapi tuja vekuapy, kyrã japorã vino py'ahuva myndoroĩpo vakapi tuja vekua hãma opapo iñohẽ vino, kyrãĩpojy vakapi; vino py'ahuva mbyhyruañoĩpo mbai hyru py'ahuvapy.

Jesús mboireare mynoõ jyre trigo putu'uava arape

²³ Putu'uava arape Jesús hasa oho koo hupirã, mboireare õñepyrõ mynoõ jyraha jyre trigo.

²⁴ Hãma fariseore heishu: Maĩhe, marã'ĩrãra rymboiryreare japo japoamba verã putu'uava arape?

²⁵ Jesús heishu reta: Mape'ãiteira pimbijeta mbaivara David japo ñymbahy'irã hareka iko'i hãndiare?

²⁶ Marãra David tũpaope iche, pai ruvisha vasu Abiatar jy'arape, hai hou pãhã kapyryva Tũpa pevarã, mbavamba katu houva, pai retaĩtẽ oĩshu hou verã, hãma meẽ jyveshu opaite iko'i hãndiare.

²⁷ Jesús heivejyshu reta: Hoka putu'uava ara rãnga japoha kuaretare pevarã, japohãã kuareta ara putu'uava pevarã.

²⁸ Hãrã kuareta Tay hai jyve putu'uava ara Ija.