Marcos 15 - NandevaBiblia

Jesús rahaha Pilato hỹnonde

¹ Hãma kõĩmarã, ñymbaty ijeta reta pai ruvishare, Moisés mbypara vekua pyrỹmboi'iheare, Judio juhuvishare, hareka opaite pirĩmbivacheka'iare. Haivi raha reta Jesús opa popokuahavape hareka ñono reta Pilato ipope.

² Hãma Pilato pyrãndushu: Ndera hai Judiore juhuvishavasu? Jesús heishu: Nde rãnga rere.

³ Hãma haipe pai ruvishare heta ñee porãmba vekua heihe reta Jesús.

⁴ Haipe Pilato hykuãĩ pyrãndujyshu: Mba'ẽãrapo rere? Mãĩhe, heta ñee porãmba he'ia ndyrehe.

⁵ Tẽvã Jesús mba'ẽã hei; hãma Pilato mbyrymãi.

Jesús õĩma jukaha verã

⁶ Hoka arete Pascua arape, Pilato jypykuaa mohẽñoĩ pente kuimbai mbyperesoava, kuaretare jurureheva.

⁷ Haipe pente kuimbai Barrabas he'iashua mbyperesoha ñonoava ĩrũre hãndi, syndarore ñyrãrõ hãndirã purukavare.

⁸ Hãma ou kuareta hetavare jurureshu verã Pilato poishi verã pente kuimbai mbyperesoava, kuei japosea rãĩmi.

⁹ Hãma Pilato heishu reta: Pipotara apoijyshi Judiore juhuvishavasu?

¹⁰ Shara hai kuaa pai juhuvishare Jesús heshatãã retarãmeĩ meẽrã.

¹¹ Hãma pai juhuvishare hei jyvỹĩshu kuaretare jurureshu verã Pilato, Barrabas poishi verã.

¹² Pilato hykuãĩ pyrãndu jyshu reta: Akuarã, mbaivara pipota ajapohe, pymbyheeva Judiore juhuvishavasu?

¹³ Hãma haire sapukerã hei: Mbysavava kurusure!

¹⁴ Hãma Pilato heijyshu reta: Mbaiva porãmbara hai japo? Tẽvã haire hỹnatu jyvyĩ sapuke reta: Mbysavava kurusure!

¹⁵ Hãma Pilato pota haikavi ẽẽ hãndi kuareta retarã, poishi Barrabas; hãrã meẽshu syndarore nupãka verã Jesús, haivi meẽ mbysavava verã kurusure.

¹⁶ Hãma syndarore raha Jesús, huvishavasu ho'ipe “Pretoriope” hãrã haipe syndarore opa mbatyka ñi'ĩrũre.

¹⁷ Hãma Jesús hetere ñonoha mondeava pỹtãva, hareka ñonohã ñakare pente juu ñopeãva.

¹⁸ Hãma õñepyrõ ñymbyhoryhe reta hareka sapuke reta: Tiko puku Judiore juhuvishavasu!

¹⁹ Hãma ñakaipi nupashu reta pente yvyrape, myndyvy reta hovare, hareka ĩñesu ra'ãnga jyre hỹnonde.

²⁰ Hetama Jesús ñymbyhoryhe retarã, hekyjyshi reta mondeava pỹntava, hãrã ha'ei mondeva mỹmondekajy retarã, nohẽ reta katoape raha mbysavava verã kurusure.

Jesús mbysavavaha kurusure

²¹ Pente kuimbai Cirenepe'ia Simón he'iashua, Alejandro hareka Rufo tuu, ñũũvi oujyva, haipi hasa ohorã, mbyrahaka reta Jesús jukurusu.

²² Hãma raha reta Jesús pente henda “Golgota” he'iashuape, he'iseva: Tãka kãvẽ rẽnda.

²³ Hãrã meẽjyreshu vino pohã irova jihiava, tẽvã Jesús ho'uã.

²⁴ Hãma mbysavavama reta kurusurerã, haipe syndarore mbijao reta jasoi vekua jyvare ñynoiheape, kuaa verãre mbavarapo raha Jesús monde vekua.

²⁵ Kỹỹmima kõĩrã, hupi reta kurusure.

²⁶ Hãma pente mbyparahava ñonohã kurusu ñakare mbaiva rehera jukaha, heiva: “Judiore juhuvisha vasu”.

²⁷ Haipe mbysavavaha hãndi kurusure mõkue manarõ'iare, pente ñonohã jakata kyty hareka ĩrũ jasu kyty.

²⁸ Hãma kyrã iko Mbyparahava heiva: “Mbai porãmba japo'iare mbivacheha hãndi”.

²⁹ Hãma haipi hasava ñymbyhoryhe Jesús, ñaka mbyvava jyrerã hei reta: Mahẽ! Nde rãnga rere tũpao opa rỹmambairã, mbahapy arape rũmupuãjy verã.

³⁰ Ndeii ñymondojepe, vejyshi kurusu!

³¹ Kyrã ñymbyhory jyvehe reta, pai juhuvishare hareka Moisés mbypara vekua pyrỹmboi'iheare. Hei jyre ijupe: Hetavape mondoje, tẽvã ha'ĩ katuã ñymondojepe.

³² Tyvejy kurusuivi hokava Cristo, Israelitavare juhuvishavasu, heshaha verã hareka rojaha verã jyve. Hãma kurusure mbysavava hãndivare, hehei jyrejyveshu.

Jesús mano

³³ Ndosemarã, opaite yvy jerekue pyta timimbivape, ka'aru mbahapy orapeve.

³⁴ Hãma Jesús hỹnatu sapukerã hei: Eloi, Eloi, Lama sabactani? Hokava he'ise: Shu Tũpa, Shu Tũpa, marã'ĩrãra sheĩ shyreja?

³⁵ Hãrã haipe'õre hendumarã hei reta: Hẽnoma'ẽ Tũpa ĩñee mbeu'ia Elías.

³⁶ Hãma pente hairetava ñani ou mãky esponja vinagrepe, hãma jokua takuara japyrerã mbyho'uka, hãrã hei: Jaheshara, Elías ou mbyvejyshukui.

³⁷ Tẽvã Jesús hỹnatu sapukerã, mano.

³⁸ Hãrã tũpaope'õ tarapo jochahapya mbyteipitei soro, vateivi yvykyty.

³⁹ Hãma syndaro ruvisha Romano, ñymbou'ia Jesús hỹnonde heshama marãra mano, hei: Ãñetẽĩtemba kova kuimbai hai Tũpa tay.

⁴⁰ Hãma ĩme'ẽjyve haipe taupere mbyryivĩ maĩ ñynõĩ; haire mbytepe'ẽ Maria Magdalena, Maria, Jakobo ndeiveva hareka José ishy, hãndi Salome.

⁴¹ Hãma kova taupere hai Jesús mi'ĩrũreare hareka ñyngareko jyreheva Galileape'irã, hareka heta'ẽjy ĩrũ taupere oho hãndi vekua Jerusalenpe.

Jesús ñotỹha

⁴² Hãma ka'aru pỹntumapo'irã, ñai kavi verã jy'arape, hareka putu'uava jy'ara serivape.

⁴³ Hãma ou José Arimateape'ia, kuimbai heko kaviva, hai jyve mburuvisha hãrõ'õ Tũpa ẽvãpe'õ ryheva, hãrã kyjeã icheshu Pilato jurureshu verã Jesús hetekue.

⁴⁴ Hãma Pilato mbyrymaĩ henduma mbe'ua Jesús manorã, haivi hẽnoka syndaro ruvisha pyrãndushu verã mbovy aramara japo manova.

⁴⁵ Hãma kuaa kavimashi syndarore juhuvisharã, mẽ'ẽkashu José Jesús hetekue.

⁴⁶ Hãma José ova pente tarapo pyrẽrĩva, harã mbyvejy Jesús hetekuerã ñomapy. Haivi raha ñono ita jo'oa vekuapy, hãrã ita vasu pẽi mbotyjy'ĩãrẽ.

⁴⁷ Maria Magdalena, hareka Maria José ishy hesha reta mapera ñonohã Jesús hetekue.