Marcos 14 - NandevaBiblia

Pai ruvishare pota jukajyre Jesús

¹ Mokue araima hemby'ẽ Pascua verã hareka pãhã harina mby'ouka jyhiamba arete he'iashuajy. Hãma pai ruvisha hareka Moisés mbypara vekua pyrỹmboi'iheare heka marãrapo mbytavy retarã pysyka Jesús hareka juka verãre;

² tẽvã a'ãmore hei: Avy jajapokui aretepe, mahẽ henta'õre pũã ñandyrehekui.

Pente taupe ñohẽhe Jesús mbai pishekatuva

³ Jesús ĩme'ẽ Betaniaperã, Simón, kuru porãmba'ia he'iashua hentape, mesapema vapy ñynõĩrã, vãhẽ ou pente taupe veruva mbai hyru tynyhẽ'õ mbai pisheka hepyva ryheva, joka'ĩãrẽrã ñohẽ Jesús ñakãre.

⁴ Hãrã haipe'õre poshyjyrerã hei jyre ijupe: Marã'ĩrãra jyvareareiihe mbai pisheka?

⁵ Katutẽ 300 ara repykue nikere ovendehava, hareka hepykue me'ẽãtẽshu verã pavete'iare. Haipe pya ohõãhe retarã poshyjyreshu taupe.

⁶ Tẽvã Jesús heishu reta: Pyma'ẽĩhese! Marã'ĩrãra pyma'ẽĩãhe? Mbai haikaviva rãnga japo shyrehe.

⁷ Pavetevare ĩmeñoĩpo pynymbyteipi, hãrã potama haikaviva pijapoherã pijapopohe reta, tẽvã she opa arããpo aiko pynymbyteipi.

⁸ Kova taupe japo koñeĩ katu japova. Opa mbipishekatu shyrete ñotyã verã.

⁹ Ãñeteĩte hai pee, mamãĩpi ko yvy jerekue mbe'uhavaipi ko Ñee kaviva, mbe'uhapo jyve ko taupe japova.

Judas mbeu meẽ verã Jesús

¹⁰ Hãrã Judas Iscariote, hai jyve 12 Jesús mboireare ryheva, oho pai ruvishare ẽvãpe meẽ verã Jesús.

¹¹ Hãrã henduma retarã vya jyre hareka heishu reta meẽshu verãre kyrypoti, hãma Judas heka marãrapo myhẽvãshu reta.

Jesús mby'arete Pascua

¹² Ara tynondevape arete pãhã jylevadurambava hareka avisha ray jukahava Pascua arape, mboireare heishu: Mapera ripota myhẽvãhã Pascuape reu verã?

¹³ Jesús mondo mõkue mboirea retãrã heishu: Pekua tentape. Haipepo pyheshakui pente kuimbai rahava yy kambushipe; pekua hipikui.

¹⁴ Mãĩpi oho ichevape oo ija pereshukui: “Pyrỹmboi'ia rãnga he'ika: Mape'õ oo'ipera haupo hãndi amboi'areare Pascuape ho'uava?”

¹⁵ Hãrã hai heshakapope pente oo tivishava vate'õ hareka opa myhẽvãvã; haipe pymyhẽvã ñandekui jau verã.

¹⁶ Hãma mboireare jyraha tentape hareka hesha reta Jesús heishua rãĩmi, hãrã haipe myhẽvã reta Pascuape ho'ua verã.

¹⁷ Pỹntuma'irã, Jesús hareka mboirea 12 iare vãhẽ oho hãndi haipe.

¹⁸ Haipe mesape karuma ñynoĩrã Jesús heishu reta: Ãñeteĩte hai pee, pente pynymbytepe'õ, akaru'ãĩ hãndiva shymeẽpokui.

¹⁹ Haire õñepyrũ mbyvy'ã, hãrã pepenteĩ pyrãndushu reta: Sherapokui?

²⁰ Jesús heishu reta: Pente 12 pẽiva, peratupe pãhã ãmaky'ãĩ hãndiva.

²¹ Kuareta Tay iko ñoĩpohe kuatia mbyparahahea rãĩmi, tẽvã tengapokui kuimbai Kuareta Tay meẽva! Haikavivetẽshu verãmba ko kuimbai o'ãrã.

²² Karuma ñynoĩrã, Jesús pãhã hekyrã ohovasa, pyseã meẽshu retarã hei: Pe'u, kova hai shyrete.

²³ Haivi hekyjy vino ho'uapya, ohovasarã meẽshu mboireare, hãrã opaiteva hou reta.

²⁴ Heijyshu reta: Kova hai shuruvy ñee me'ẽã py'ahuva ryheva, turuvy ñohẽa verã opava reta rehe.

²⁵ Ãñeteĩte hai pee, hauveamapokui ko uva tyy, haujypeve hoka arape vino py'ahuva Tũpa ẽvãpe.

Jesús mbeu Pedro ñomire verã

²⁶ Hãma opama pyrahe salmope'õrã, jyrahajy ñana'õ Olivo kyty.

²⁷ Jesús heishu reta: Ko pyhare opaitevapo shyrejapikui, ñee Mbyparahava heiva rãĩmi: “Ajukapo avisha ñyngareko'ihea, hãrã avishare opapo ñymomohẽshikui”.

²⁸ Tẽvã, akuerajymarã ahapokui pynynonderã Galileape.

²⁹ Hãrã Pedro heishu: Opaĩtẽ ndyrejavara, ha'ẽã she aryreja verã.

³⁰ Jesús heishu: Ãñeteĩte hainde, ndei uru mokue ñyrãrã, ko pyhare mbahapyjypo shiñomikui.

³¹ Tẽvã Pedro hei jyvyĩ: Ajemaĩpo ãmano verã jyve nendie, ãrĩñomiãpokui. Hãrã ĩrũre kyrãpãveĩ hei reta.

Jesús ñymboi Getsemanipe

³² Jesús hareka mboireare hãndi jyraha Getsemani he'iashuape, hãrã Jesús heishu reta: Pyvapy kope, ahapo ãĩmboi.

³³ Hãrã raha Pedro, Santiago hareka Juan. Jesús õñepyrõ kyje hareka vy'ãã.

³⁴ Jesús heishu: Vyambava añandu shukamapotarã; kopeĩ pime, hareka avy pechekui.

³⁵ Jesús mbyrykatu ohorã, haipe ĩñesurã jurureshu Tũpa, katurã mbyhasashi verã mbai pohyva hasa verã.

³⁶ Ñymboirã hei: Abba, Sheru, nde rãnga opa mbai javaiã rijapo verã; heky shyhevi kova mbai pohyva ahasa verã. Tẽvã avy tiko she aipotava, kõñẽi tiko nde ripotava.

³⁷ Jesús oujy mboireare'õperã hesha ocheñynoĩ reta, hãrã heishu Pedro: Simón, recherarẽĩ? Katu ãĩteira kỹỹmĩtẽ recheãrẽĩ?

³⁸ Avy peche, pirurekatu pijepyhe verã pyarãã ou verã, espirituara kyrẽyte mbai haikaviva japo, tẽvã pyndyroo kãngy.

³⁹ Jesús hykũãĩ oho ñymboijy, hei vekua rãĩmi katĩ heijy.

⁴⁰ Oujyrã hykuaĩ heshajy mboireare oche ñynoĩrã, shara hypehyite retarã, hãrã kuãã heishu verãre.

⁴¹ Jesús mbahapyheama oujyrã, heishu reta: Peche, hareka puputupẽĩkate. Haikavima, vãhẽma kuareta Tay mẽ'ẽhã verã heko porãmbare ipope.

⁴² Pupũã jaha, shara vãhẽserima ou shymeẽva.

Jesús pysyha

⁴³ Jesús ijeta teri'ẽ vẽkua, vãhẽ ou Judas Iscariote hai jyve pente 12 mboireare ryheva, kuareta hetava ou hãndi veru reta kyse hareka yvyra. Pai ruvisha, Moisés mbypara vekua pyrỹmboi'iheare, hareka Judiore juhuvisha mondovare.

⁴⁴ Judas pyrypysykava heimaimbashu reta: “Apyte ãmarãndushuvapo haikui, pypysykui hareka kapyry pyrahakui”.

⁴⁵ Hãma Judas ñymboja Jesús ẽvãperã hei: Pyrỹmboi'ia! Hãrã pyteshu.

⁴⁶ Haivi kuimbaire pysy reta Jesús, ñapĩtĩrã raha reta.

⁴⁷ Hãma pente haipe'õ jykyse nohẽrã, poryhe pai ruvisha jokuereirea nambi hyvaisho jasyjashi.

⁴⁸ Hãrã Jesús heishu kuaretare: Marã'ĩrãra pepope peru kyse hareka yvyra shyraha verã, manarõ'ia rãĩmi?

⁴⁹ Opa ara rãnga'ãĩ pynymbytepe apyrỹmboi tũpaope, tẽvã shypysyãpi. Tẽvã kova jehu hekope kavi iko verã Tũpa ĩñeepe heiva.

⁵⁰ Hãma opaite mboireare heja Jesús, hareka opa ñyvãhẽ reta.

Pente kunumi oho vekua

⁵¹ Tẽvã pente kunumi tarapo tivishavapẽĩ ñymama'ia oho haykue, hãrã syndarore pysy;

⁵² tẽvã kunumi poishi savanarã, nanitei ñyvãhẽ.

Jesús rahaha pai ruvishare hỹnonde

⁵³ Hãma rahashu reta Jesús pai vasure hỹnonde, opaiteva ñymbaty pai ruvishare, Judiore juhuvishare hareka Moisés mbypara vekua pyrỹmboi'iheare.

⁵⁴ Hãma Pedro mbyryĩ oho'i Jesús haykue, pai juhuvishare hoo jykorapeve vãhẽ oho. Haipe Pedro vapy hãndi syndarore tata hyvache jypee ñynoĩ.

⁵⁵ Hãma pai juhuvishare, Judiore juhuvisha heka ñynoĩ marãrapo ñono vaishu reta Jesús jukaka verã; tẽvã vãhẽãshu reta.

⁵⁶ Hãma hetatẽ mba'ety vekua heiheva, tẽvã mbeuvare opa jyvavy reta.

⁵⁷ Hãma ĩme'ẽ pũã heiheva ñee mba'ety vekua:

⁵⁸ Ore henduha heirã: “Opapo ãmambaikui ko tũpao kuimbaire japo vekua, tẽvã mbahapy arape amupũãpojy yngava, haimba kuimbaire japova”.

⁵⁹ Tẽvã pente ñeepe'ãĩtei ñynoĩjy reta.

⁶⁰ Haipe kuaretare mbytepe pũã paire juhuvisharã pyrãndushu Jesús: Mba'ẽãrapo rere? Rỹhenduãra mbaivara hei ñynoĩ ndyrehe?

⁶¹ Tẽvã Jesús mba'ẽã hei, mbyhovaimba. Hãma paire juhuvisha hykuãi pyrãndujyshu: Ndera hai Cristo, Tũpa heko kaviva Ray?

⁶² Jesús hei: She hai. Pyheshapokui kuareta Tay vapyma'ẽ Tũpa ñymbaikatuva jakata kytyrã hareka oujy ara vateivi ãvãpỹntupyrã.

⁶³ Hãma paire juhuvisha henduma kovarã, mỹndoro mõndevarã hei: Mbai verãra ynga jaikotẽvẽpo jyhe mambeu ñande verã?

⁶⁴ Pyhenduma rãnga ijeta põrãhe Tũpa; Marãra pereshu? Hãma opaiteva heihe reta japova porãmba hareka ẽẽshu mano verã.

⁶⁵ Hãma haipe a'ãmokue õñepyrõ myndyvyhe, hesa jokuashirã nũpa retarã hei: Mbeu mbavara nunupa! Hãma Syndarore nupajyre Jesús hovaipi.

Pedro hei kuaamba Jesús

⁶⁶ Hãma Pedro ĩmeĩteri'i oo jykoraperã, ou pente taupe pai ruvishare jokuerea,

⁶⁷ hãma hesha Pedro jypea'ẽ tata hyvache, maĩherã taupe heishu: Nde rãnga riko reijyve hãndi ka'ãĩ Jesús Nasareno.

⁶⁸ Pedro ñomirã hei: Aikuaanyshe, hareka aikuãvãĩjy rereva. Hãrã Pedro õhẽ katuape, hãma haipe uru ñyrã.

⁶⁹ Hãma hoka taupe heshajy Pedro, hãrã heishu haipe'iare: Kova kuimbai haijyve hai ryheva.

⁷⁰ Tẽvã Pedro hykũãĩ ñomijy, haivi haipe'iare hei jyvyĩshu reta: Ãñete rãnga ãmo nde jyve hai ryhevare, shara Galileava jyve nde.

⁷¹ Hãma Pedro õñepyrõ porãã ijeta, hãrã ĩñee meẽvape hei: Tũpa heepe hai pee, shapumbava. Aikuããny she hoka kuimbai, pee pijetahesheva.

⁷² Haipevaĩ uru mokueheama ñee. Hãma Pedro manduahe Jesús heishu vekua: “Ndeiteri uru mokue ñeerã, mbahapyjypo shiñomi reikui”. Pedro mandua hokavarerã õhẽ katuape, hareka haipe jaheo'i.