Marcos 13 - NandevaBiblia

Jesús hei tũpao opa mbaia verã

¹ Jesús õhẽ tũpaoivirã, pente mboirea heishu: Pyrỹmboi'ia, maĩndaveheno ko ita hareka tũpao, marãra tivisharã mashyãseve!

² Jesús heishu: Ryheshara kova oo vasukuere? Penteãpo ĩmekui ita jyvohy'õ, opaitepo mambaiakui.

Mbai jehu verã ara opaserimarã

³ Hãma jyraha reta Ñana'õ Olivoty tũpao hỹnonde, haipe Jesús vapy'ẽrã, Pedro, Jacobo, Juan hareka Andres pyrãndushu reta hã'ẽĩ õpe:

⁴ Mbeu'ore, mbaipeiterapo jehukui kova mbai? Mbaiva jyheshava rãnirapo'ẽkui, kova ikomapotarã?

⁵ Jesús õñepyrõ heishu reta: Pymãĩ kavi avy mbava pynymbytavykui.

⁶ Hetapo ou shyreepe heiva: “She hai Cristo”, hãma hetavapepo mbytavy.

⁷ Pikuama ñyrãrõva ikorã hareka mbe'uha ñyrãrovarã, avy pykyje, shara kyrãñoĩpo iko; tẽvã ha'ẽã opamahe verã.

⁸ Hãma tentavasure hareka mburuvishavasure opapo pũã ijehe; oparupipo iko yvy ryry, hareka õĩpojy ñymbahy; kova hai jyhasa'asy tynonde'õre.

⁹ Tẽvã pingareko katu pindijehe. Shara ĩmepo'ẽ pyndypysykarã pyndyrahava mburuvishare hỹnonde hareka punũpa verã Judiore ñymbatyseaipi. Shyryhevaperã pyndyrahapo mburuvisha vasu hareka huvishare hỹnonde, shyreepe piñymbeushu verãre.

¹⁰ Shara ndeiteri ara japyrã, mbe'uhañõĩpo Ñee kaviva opa tenta retaipi.

¹¹ Hãma pyndyrahama mburuvishare hỹnonderã avy pejepy'apyhe pere verã rãĩmi, ñee me'ẽãpevaĩpo perekui, shara ha'ẽã pee pijeta verã; Espiritu Santo rãngapo ijetakui.

¹² Hãma ĩmepo'ẽ meẽva tyvy jukaha verã, terure meẽpo tayre; hareka tyrayre ñymbyvaishopohe tuu hareka jukapo.

¹³ Opavaretapo pyndyreshatããkui shyryhevaperã, tẽvã tãtangãtu'õ japyapeve, hokavapo oho jepekui.

¹⁴ Pyheshama ko mbai porãmba'eite vekua ẽẽ, ẽmbatẽ verãperã Tũpa ĩñee mbeu'ia Daniel heiva rãĩmi (ko mbijetava tikuaa mbaivara he'ise) Judeape'iare tĩvãhe yvyturusu ẽvãipi;

¹⁵ hãma hoo ĩãrẽ'iva, avy tyvejy nohẽ verã mãĩnũnga hoo'ivi;

¹⁶ hãrã kaahupi ĩme'õ, avy toujy tyheka mondeva.

¹⁷ Tengapokui taupere purua'ia hoka arape, hareka memby kambu'iare!

¹⁸ Pirure katushu Tũpa potãã jehupe kova mbai ara ro'yperã,

¹⁹ shara hokava arape ẽpo jyhasa'asy vasu arykai ikombava, Tũpa jypy japorãvãĩ ko yvy ã'ẽpeve, hareka ikovẽãmapo kutyve.

²⁰ Ñandeja mykoĩpĩã hokava ararã, mba'etypo ohojepeva, hãma hai pyhỹrõvare rehẽĩ mykõĩpĩĩpo hokava ara.

²¹ Hãrã ĩme'ẽ heipeva: “Pymaĩhe, kope'i Cristo, maĩrã, kuty'i”, avy pyroja.

²² Shara oupo Cristo rã'angarã'ia hareka Tũpa ĩñee mbeu'ia japureiivare, hetapo japo mbai heshaha verã hareka mbaikavi heshaha verã pyrỹmbytavy verã, Tũpa pyhỹrõva retavepo mbytavy.

²³ Hãrã pingareko katu pẽĩ, ambeu'ãĩpe kova mbai ndeiteri ikorã.

Jesús ndeiteri oujyrã mbaivarapo iko

²⁴ Hokava arape, jyhasa'asy hasamarã, kuarasy ovepo hareka jasy sapeveãmapo.

²⁵ Jasy tatare opapo oa vate araivi, hãrã mbai arapy'õre mbaikatu opapo'õmykui.

²⁶ Hãrã ijyheshapo kuareta Tay oujy avãpỹntupyrã, mbaikatukue hareka hĩmbipekue ryheve.

²⁷ Hãma hai mondopo jokuevare mbaty verã hai pyhỹrõvare urũndy yvytu pejuvaivi, yvy japyaivi hareka vate ara japyapeve.

²⁸ Pikuaashi kova ñymyhã'ãnga igo jypy: Hãka hovyma'ẽrã hareka õhẽmashu hokyrãrã, pikuaakuei ara haku vãhẽmapojyrã.

²⁹ Kyrãpo jyvepe pyheshama kova mbai jehurã, pikuaapo ara opa verãpe vãhẽserimarã, õchepema'ẽvã.

³⁰ Ãñeteĩte hai pee, opapo iko kova mbai ndeiteri ã'ẽ ĩmeĩteri'iare, opa manorã.

³¹ Ara hareka yvy opapo, tẽvã shiñee opããpo hai.

³² Tẽvã hokava ara hareka ora mba'ety kuaava, Tũpa jokuevare arapy'iare hareka Tũpa Tay kuaa'ãĩ jyve, koñeĩ Tuu kuaa.

³³ Pymaĩ katupẽĩ, avy peche, hareka pirure katu shara pikuãã mbaipera vãhẽpo hoka ara.

³⁴ Pente kuimbai mbyry ohova rãĩmi; hoo hejashu jokuereirea, hãma pepenteĩ ñonoshu japo verã, hãrã õchepe ñyngareko'õ heishu ochemba'ẽ verã.

³⁵ Hãrã avy peche, shara pikuaã mbaipera oujypo oo ija, ka'arurãra, pyhare mbytepera, uru ñyrããma'ẽrãra, kõĩ ourãra, maĩrã kõ'ẽĩra,

³⁶ mahẽ sapy'ãĩ ourã pyndysapyakui pechepẽĩrã.

³⁷ Kova haipeva, opaitevape hai: Avy peche.