Marcos 12 - NandevaBiblia

Mba'apo'iare heko porãmbare

¹ Jesús ijetashu reta ñee ñymyhã'ãnga rupiirã hei: Pente kuimbai ñoty uva jy'yvype, opa mangora; haivi japokajyshu uva ñamihã'ẽ verãpe. Mũpũãjy pente oo vate'õ, haivi ñyngareko hareka maĩ'ẽhe verã. Haivi hepyre porykashu ju'uva rẽnda mba'apo'ia retarã, oho mbyry.

² Vãhẽma uva mỹno'õhã verãperã, mondo pente jokuehareirea mba'apo'õre õpe jurureshu verã uva ia, hai ña'ãporã ju'uva rẽndaivi.

³ Tẽvã haire pysy, nũpa, haivi iporãĩ mondojy reta.

⁴ Haivi ijarã'õ mondojy ĩrũ jokuehareirea, hokavape ñaka jokashi reta, hareka heta heheishu reta.

⁵ Hykuãĩ yngava mondojy, tẽvã hokavape juka reta. Kyrã hetavape mondo, ĩme'ẽ nupãhãva, hareka jukahava.

⁶ Hãma koñemahea hembyshu tay haihuva, mondorã pyape hei: “Shyray rãnga, mba'ẽãpo japohe retakui”.

⁷ Tẽvã mba'apo iare hei ijupe reta: “Kova rãnga hai mbai ijarã; pei jajuka, hãrãpo ña'ãpõrãtẽ vẽkua pyta ñandekui”.

⁸ Hãrã pysy reta, juka, hareka nohẽ mombo reta hetekue uva rẽndaivi.

⁹ Haivi Jesús pyrãndu: Mbaivara pimoa japo uva rẽnda ija? Oupo opa juka mba'apo'iare, hareka meẽpo ju'uva rẽnda yngava retape.

¹⁰ Pimbijetããra kuatia Mbyparahavape heiva?: Ita, oo japo'iare mombo vekua, ã'ẽ ikoshi ita oo jypy vapyhe verã,

¹¹ Kova hai Ñandeja japova, hãrã haikavi ñande kova jahesharã.

¹² Hãrã pota pysykajyre Jesús, shara kuaa reta ñee ñymyhã'ãnga mondoha ñynõĩherã. Tẽvã kuaretare kyjejyreshirã; ma'ẽĩhe opajy oho.

Tũpa ña'ãpova hareka mburuvisha ña'ãpova

¹³ Haivi mondohashu Jesús a'ãmo fariseore hareka Herodes ryhevare, ijeta porãrã ñonovaishu verãre.

¹⁴ Kovare ohorã heishu reta: Pyrỹmboi'ia, kuaaha rãnga niñee añeteĩtevarã, rỹmbyvapyã ndijehe kuaretare hei ndeva, rỹma'ẽãhe marãva kuaretara, ãñete rypỹrỹmboihe Tũpa hape. Haikavira mẽ'ẽhashu kyrypoti mburuvishavasu Cesar, maĩrã, mba'ety? Mbyhepyaraposhu, maĩrã, mba'ety?

¹⁵ Tẽvã Jesús kuaa potai kyrã jyrerã heishu: Marã'ĩrãra aapy verã piñonopẽĩ she? Perushe pente nikere tamaĩhe.

¹⁶ Hãrã verushu reta, Jesús hesharã pyrãndu: Mbava hova hã'ãngara hareka heera ẽhe? Haire heishu: Mburuvishavasu Cesar.

¹⁷ Jesús hei: Cesar ña'ãpova pymeẽjyshu Cesar, Tũpa ña'ãpova pymeẽjyshu Tũpa. Mbyry opamãĩ reta kyrã heishu retarã.

Jesús ijetahe kuerajya ryheva

¹⁸ Hãrã ou Saduseore Jesús ẽvãpe. Haire rojãã manova puãjy verã; hãrã pyrãndushu reta Jesús:

¹⁹ Pyrỹmboi'ia, Moisés mbypara vekuape rãnga hei, pente kuimbai manoshi hyrekorã, mymembyãrã tyvy omendajyhe verã tichey hyrekokue mimoña verã tichey manoshi vekua.

²⁰ Hãma ikonda aryka'e 7 kuimbai pente'ovare; tynondeiteva omenda, tẽvã manoshi mymembymbape.

²¹ Haivi mokuehea omendajyhe, tẽvã hai mano jyve mymembymbape; mbahapyhea kyrãmijy.

²² Hãrã kyrã 7 õre opaĩ omendatẽhe taupe, tẽvã mbavẽã haire penteva heja hĩjapo. Koñemahea mano jyve taupe.

²³ Haivi manovare kuerajymarã, marãvarapo hyrekorãĩtekui kova taupe? Shara 7 õre opapavẽĩmba omendatẽhẽ.

²⁴ Jesús heishu reta: Pijavy rãnga, shara pikuãã Tũpa ĩñee hareka ñymbaikatukue.

²⁵ Manovare kuerajymarã, kuimbai hareka taupe omendaveamapokui. Shara ikoposhi Tũpa jokuevare rãĩmi vate arapy.

²⁶ Manovare kuerajya ryheva, pimbijetãmba Moisés mbypara vekua heiva, marãra Tũpa ijetashu Moisés vycheri hãka hẽndy'õĩvirã hei: “She hai Abraham, Isaac hareka Jacob ñu Tũpa”.

²⁷ Tũpa rãnga ha'ẽã manovare ñu Tũpa, hykove'iare ñu Tũpa rãnga hai! Mbyry rãnga pijavy!

Tũpa ĩñee haikaviveva

²⁸ Heshama Jesús haikavite heishu retarã, ñymbojahe pente Moisés mbypara vekua pyrỹmboi'ihea hai opa hendu ijeta ñynoĩrã, hãrã pyrãndushu: Opaite ñeẽ japoha verã mbyparahava, marãvara hai haikaviveva?

²⁹ Jesús heishu: Haikaviveva ñee rãnga hai kova: “Hendu Israel, Ñandeja ñanu Tũpa rãnga hai Ñandeja koñeĩ'õ”.

³⁰ Haihu Ñandeja nu Tũpa ndypyaivive, ndykove ryheve, mbai kuaakue ryheve, hareka opaite nypyrãtakue ryheve. Kova hai mbyparahava japoa verã haikaviveva.

³¹ Tẽvã ĩme'ẽjy mokuehea: “Haihu ndapisha nde rijyhaihuva rãĩmi”. Mba'ety haikaviveva kova ñeẽ japoa verã mokue'õ retaivi.

³² Hãma Moisés mbypara vekua pyrỹmboi'ihea heishu: Haikavite, pyrỹmboi'ia, ãñeteĩte ko rereva: Penteĩ'ẽ Tũpa, mba'etyjy yngava ha'ẽĩ ẽẽ.

³³ Jahaihu Tũpa ñandypyaivi, opa mbai kuaakue ryheve, ñandyrykove ryheve, ñanypyrãtãkue ryheve hareka jahaihu ñandapisha jaijyhaihuva rãĩmi, haikavive mymba jajuka hareka jahapyvaivi Tũpa heepe.

³⁴ Jesús, hendu ijeta kavitẽrã, heishu: Mbyryã rẽĩshi Tũpa ẽvãpe'õ ryheva. Hãrã mba'ẽã mbava pyrãndujyshu.

Marãva tayra Cristo?

³⁵ Jesús pyrỹmboi'ẽ tũpaoperã pyrãndu: Marã'ĩrãra Moisés mbypara vekua pyrỹmboi'iheare hei reta, Cristo David tayva?

³⁶ David teiva rãnga hei Espiritu Santo rupii: Ñandeja heishu Sheja: “Vapy shakata kyty, añonopeve ndyreshatamba'iare ndepy'ipe”.

³⁷ David teiva hẽnoshu “Sheja”, Marãrapo akuarã Cristo, David tayjy? Heta'ẽ haipe kuaretare, vy'ape hendu ñynoĩ Jesús ĩñee.

Jesús ijetahe Moisés mbypara vekua pyrỹmboi'iheare

³⁸ Jesús pyrỹmboirã heishu reta: “Pimoãshi Moisés mbypara vekua pyrỹmboi'iheare, haireta rãnga haikavishu iko mondeva pukuherã, hareka pota marãnduha reta vatahava retaipi karai vasure rãĩmi.

³⁹ Haire heka haikavivevape vapy verã Judiore ñymbatyseape, hareka ñymyhenda kavi karuvasu ikova retaipi.

⁴⁰ Hareka ĩme manovare hoo hekyjyreshi, ñemipy verãre pupuku ñymboi reta. Haire hasyitevepo nupãhãkui”.

Ĩme manoshia pavete'ia meẽva

⁴¹ Pente arape Jesús vapy'ẽ kyrypoti Tũpa pevãrã mbatyha'õ hyvache, mãĩ'ẽhe marãra kuaretare ñono ñynoĩpy kyrypoti; iko katuvare heheta ñonopy.

⁴² Haipe vãhẽ oujyve ĩme manoshi vekua pavete'ia, mokue nikere sa'i ovale vekuami ñonovepy.

⁴³ Hãrã Jesús hẽnoshu mboirea retarã heishu: Añeteĩteva hai pee, ko ĩme manoshia pavetetẽva kyrypoti hyrupe hetave ñono opava retaivi.

⁴⁴ Opava reta rãnga hembyshu vekuaĩ veru meẽ, tẽvã ko pavetetẽva opa veru meẽ ĩmerea, karutẽhe verã.