Marcos 11 - NandevaBiblia

Jesús iche Jerusalenpe

¹ Jesús hareka mboireare vãhẽserima jyraha Jerusalenperã, tenta Betfage hareka Betania hyvache, Ñana Olivoty'õ hỹnonde. Jesús mondo mokue mboirea retarã,

² heishu: “Pekua pyvãhẽ tenta ñanynonde'õpe, pichemarã pyhesharavĩpokui pente mbirikaray ñapĩtĩãvã, nde'iaveteri jupiha'ĩãrẽvã; pijora hareka perukui kope”.

³ Ĩme'ẽ mbava pyrãndupe marã'ĩrãra pijora, pereshukui: “Ñandeja rãnga pota rahahashu, areãndapo verukajyndekui”.

⁴ Jyraha retarã hesha mbirika ñapĩtĩãvã katoape õchepe, hãrã haire jora.

⁵ Hãma haipe'iare pyrãndushu: Marã'ĩrãra pijorapeĩ mbirika?

⁶ Haire heishu Jesús heishuva rãĩmi; hãrã ma'ẽihe raha reta.

⁷ Haivi rahashu reta Jesús mbirika, hãrã jykasoipya ñono'ĩãrẽ retarã, Jesús jupihe.

⁸ Heta'ẽ mondeva mbipysova oho verãipi, ĩme'ẽjy yvyra hãka jasyjarã hỹnonde ñono rahava pehupi.

⁹ Haivi tynonde ohovare hareka haykue ouvare, õñepỹrõ sapuke reta: Tomomba'eha Tũpa! Toñemombaivasu ko ouva Ñandeja heepe!

¹⁰ Tũpa tymãĩkavihe David rãĩmi mburuvisharã ouva! Tymbyveteha vate arape, Tũpa vateve'õ!

¹¹ Jesús iche Jerusalenperã, oho tũpaoperã opa mãĩhupi marãra'ẽ. Haivi jyraha Betaniape 12 mboireare hãndi, shara ka'arumarã.

Jesús jahehe pente igo jypy iambava

¹² Pareemajyrã, õhẽma reta Betaniaivirã, Jesús ñandu ñymbahy.

¹³ Mbyryivi hesha pente igo jypy hoky'õ, hãrã oho maĩhe i'ãra'ẽ. Vãhẽma ohoshurã mba'ẽã heshapy, hokykuereii, shara nde'iave jy'ararã.

¹⁴ Haipe Jesús heishu igo jypy: Atẽñoĩtemaĩ mbava toukui ndi'ia! Mboireare hendu hokava.

Jesús mohẽ tũpaovi maĩnunga õvẽnde'õre

¹⁵ Hãma vãhẽjyraha Jerusalenpe, Jesús iche tũpaope, hãrã opa mohẽ tũpao hapype mba'ova hareka mavende'õre. Opa mbijaparashi kyrypoti okambia'õre ñymesare hareka pykasu õvẽnde'õre vapyhea.

¹⁶ Jesús hejãã mbava raha timbipory tũpaope poryhavare.

¹⁷ Haivi õñepyrõ mboishu kuareta retarã hei: Marãra hei Tũpa ĩñe'ẽ? “Sheru hoo, he'iaposhu oo jurureha'ẽ ipeva opaite tentare pevarã, tẽvã pijaposhi manarõ'iare ikua.

¹⁸ Hãma haipe hendu pai ruvisha hareka Moisés mbypara vekua pyrỹmboi'iheare, hãrã heka marãrapo juka reta, shara haire kyjeshi, hareka heta'ẽjy kuaretare mbyrymaĩheva pyrỹmboiva rãĩmi”.

¹⁹ Ka'arumajyrã õhẽ reta hokava tentaivi.

Igo jypy jahehahe vekua opa jipi

²⁰ Kõ'ẽĩ hasa jyraha igo ẽvãipirã, hesha reta hokava igo opa jipi hapoivive.

²¹ Pedro manduaherã heishu Jesús: Pyrỹmboi'ia maĩhe, igo jypy rijahehe vekua opamba jipi!

²² Hãrã Jesús heishu reta: Pirojahe Tũpa.

²³ Añeteĩteva hai pee, ĩme'ẽ heishuva ko yvyturusu: “Syry koivi hareka ekua'ea yyvasupe”, pyape pyhumba ryheverã, koñeĩ roja heiva ikoñõĩshu verãrã, ikoposhu hai heiva.

²⁴ Hãrã hai pee, opa mba'e pirureheva pimboimapeĩrã, pyroja ĩmemapyre verãrã, me'ẽãñoĩpope.

²⁵ Pimboipeĩrã, pyhejareiishu ĩmepyre porãmba papisha hãndirã, hãrã Ñanderu vate arapy'õ, hejareiipo jyve pyndyhevi porãmba pijapo vekua.

²⁶ Shara pyhejareiãshu papisha japo porãmba pyndyrehe vekuarã, Ñanderu vate arapy'õ hejareiãpo jyve pyndyhevi porãmba pijapo vekua.

Jesús ñymbaikatu

²⁷ Haivi oujy reta Jerusalenpe hareka Jesús vata'i tũpao jurirã, ñymbojahe reta pai ruvishare, Moisés mbypara vekua pyrỹmboi'iheare hareka tentape miñaka'õre,

²⁸ pyrãndushu reta: Mbara heja nde rijapo kova? Mbavara meẽnde mbaikatu rijapo verã kovare?

²⁹ Jesús heishu reta: She apyrãndupo jyvepe pente mbai; pymbeusherã, ambeupojyvepekui mbava ñymbaikatukuepera ajapo'ãĩ kova.

³⁰ Mbavara mbou Juan pyrỹmyngarai verã? Tũpa, maĩrã, kuareta retara? Pymbeusheno.

³¹ Haire õñepyrõ ijeta ijupirã hei: “Tũpa rãnga mbou, jairã heipojy ñandekui: Hãmera, marã'ĩrã pyrojããshu?

³² Tẽvã jaishu: Kuaretare mbouvarã...” Tẽvã ñatẽy kyrã heishu reta, shara kyjeshi kuaretare moa puãhe retarã, shara opavare roja ãñetẽĩte Juan haiva Tũpa ĩñee mbeu'ia.

³³ Hãrã heishu reta Jesús: Kuaahããny. Hãma Jesús hei jyveshu reta: Ambe'ũãpo jyvepe marãva mbaikatu rupiira ajapo'ãĩ kova mbai.