Marcos 10 - NandevaBiblia

Jesús pyrỹmboihe omendatẽã poijy ijuhuvivare

¹ Jesús õhẽ Capernaumvirã oho Judea kyty, hareka yvy ẽvã kuarasy õhẽãivi yy syryva Jordanpe. Haipe kuaretare jatyjyhe, hãrã hykuãi mboijyshu reta, hai japosea rãĩmi.

² Haipe ñymbojahe fariseore pya hããshu verãrã pyrãndushu reta, katura pente temẽ poishi hyreko.

³ Hai pyrãndushu reta: Marãra hei pee aryka'e Moisés?

⁴ Haire hei: Moisés mbypara vekuape rãnga hei, pente kuimbai katu poishi hyreko, meẽshu kuatia poishia ryhevarã.

⁵ Haivi Jesús heishu reta: Pyndypya tãtaivi rãnga, Moisés kyrãmba mbyparape kova ñeẽ japoa verã.

⁶ Tẽvã jypyiterãvãimba Tũpa japo “kuimbai hareka taupe”.

⁷ “Hãrã kuimbai hejapo tuu hareka ishy, iko hãndi verã hyreko,

⁸ hãrã mokue'iare pente tyro'oĩma ikoshi”; hãrã jyrekovare mokueveama'i, penteĩ'õ rãĩmima ikoshi.

⁹ Hãrã Tũpa mypentevare katuã kuareta mbypoikajy ijuhuvi.

¹⁰ Ĩmema ñynoijy hentaperã, Jesús mboireare hykuaĩ pyrãndujyshu reta hokava ryheva.

¹¹ Jesús heishu reta: Ĩme'ẽ kuimbai poishia hyrekorã yngava rekojya, mbai porãmba japohe tynondeite rekotẽ vekua.

¹² Ĩme'ẽ taupe ĩme poishia yngava kuimbai rekojya, mbai porãmba japohe tynondeite rekotẽ vẽkua.

Ñee kavikue Jesús mombohe sanjayre

¹³ Haivi Jesús veruhashu sanjayre pokohe verãre; tẽvã mboireare poshy jyreshu veru'õre.

¹⁴ Jesús hesha hokavarã poshype heishu reta: Pyma'ẽĩhe sanjayre tou shyrẽndape, avy pijocha; shara haire rãĩmivã retaĩpo ichekui Tũpa ẽvãpe.

¹⁵ Añeteĩteva hai pee, ĩme'ẽ myvãhẽmbava Tũpa ẽvãpe'õ ryheva pente sanjay rãĩmirã, icheãpo vate arape.

¹⁶ Haivi hupi sanjay retarã, ipo ñono ĩãrẽrã, heihe reta ñee kavikue.

Pente kunumi ikokatuva ijeta hãndi Jesús

¹⁷ Jesús ohojyma verã, ñani ou pente kuimbai, ĩñesu hỹnonde hareka pyrãndushu: Pyrỹmboi'ia heko kaviva, mbaivarapo ajapo apity verã tykove opambava?

¹⁸ Jesús heishu: Marã'ĩrãra rereshe heko kaviva? Mba'ety rãnga heko kaviva, koñeĩ'ẽ Tũpa.

¹⁹ Rikuaa kavi rãnga ñeẽ japoa verã: “Avy jyrekomava pokojyhe, avy puruka, avy manarõ, avy ijetareiihe ndapisha, avy ndapu; japo nderu hareka ndesy heindeva”.

²⁰ Haivi kuimbai hei: Pyrỹmboi'ia, shukunumipevãĩ rãnga opa ajapo kovare.

²¹ Jesús jyhaihukue ryheve maĩherã heishu: Pente mbai mba'etynde rijapo verã. Ekua, opa ẽvende ĩmeryreare, hãrã hepykue memeẽshu pavete'iare. Hãmerãpo ripitykui mbai hetava vate arape'õ; haivi ei shimi'ĩrũ.

²² Tẽvã hai, hokava hendurã mbypy'ã, hãrã vyamba ryheve ohojy, shara hai ikokatu.

²³ Jesús maĩhe juri'õ retarã heishu mboireare: Javaiveposhu ikokatuvare iche verã Tũpa ẽvãpe!

²⁴ Mboireare myngyje kova mbai hendu retarã; tẽvã Jesús heijyshu reta: Shyrayre, javaive rãngashu pente kuareta ikokatukueĩ jyroja'ihea iche verã Tũpa ẽvãpe.

²⁵ Javaiãve rãngashi hai kamello hasa verã ju sakuaipi, ikokatuvare pevarã, iche verã Tũpa ẽvãpe.

²⁶ Kova mbai mboireare hendu retarã kyjeitevejy reta, haipe pyrãndu ijupe reta: Akuarã, mbavatẽpo ohojepekui?

²⁷ Jesús maĩhe retarã hei: Kuaretare pevarã javaishu hai hokava; tẽvã Tũpa pevarã javaiã; shara Hai pevãrã mba'ety katumba.

²⁸ Haivi Pedro heishu: Ore rãnga opa mba'e hejaha, ouha ndipi verã.

²⁹ Jesús heishu: Añeteĩteva hai pee, ĩme'ẽ shyrehevape hareka Ñee kaviva rehe hejava hoo, tyvy, hiindy, tuu, ishy, hyreko, tayre maĩrã jy'yvy.

³⁰ Heja vekua hendakuepe, 100 vepo hipityjy hasa'asykue ryheve ã'ẽvãĩ ko yvy'ĩãrẽ; hoorã, tyvy, hiindy, ishy, ta'y, hareka yvy, tẽvã manomarã hipitypo tykove opambava.

³¹ Hãrã heta ã'ẽ ñytynononde'iare, taykuepo'ẽjy. Heta taykue'iare, tynondepo'ẽjykui.

Jesús hykuãĩ mbeujy mano verã

³² Oho reta Jerusalen kyty, hareka Jesús mboireare tynonde ohoshu retarã, opa mỹngyje, hareka haykue ohovare kyje ryheve jyraha. Jesús hykuãĩ hẽnojy hã'ẽĩ ẽvãpe 12 mboireare, mbeujyshu verãre mbaivarapo ikohe:

³³ Jaha rãnga jai Jerusalen kyty, haipe kuareta Tay ñonoãpokui pai ruvisha, hareka Moisés mbypara vekua pyrỹmboi'iheare ipope, haire jururepokui jukaha verã, hareka meẽpojyshukui kuareta tenta yngaivi ouva retape.

³⁴ Ñymbyhorypohe retakui hareka myndyvypohe, nupa hareka jukapo reta. Tẽvã mbahapy arapepo pũãjykui manovare pãũvi.

Santiago hareka Juan jurureva

³⁵ Santiago hareka Juan, Zebedeo tayre, ñymboja Jesús ẽvãperã heishu reta: Pyrỹmboi'ia, pota rãnga rijapo'ore, pente mbai jururehande verã.

³⁶ Jesús pyrãndushu reta: Mbaivara pipota ajapo pyndyrehe?

³⁷ Haire hei: Ryvapymarẽĩ mburuvisha vasu hĩmbipevaperã, ma'ẽĩhe tyvapyha nendiekui, pente ndakata kyty hareka ĩrũ ndasu kyty.

³⁸ Jesús heishu reta: Pikuãã rãnga ko pirureva; peera pẽĩjyve pyhasa'asy verã, she ahasa'asy verã rãĩmi? Katurapo peuvekui irova she hau verã?

³⁹ Haire hei: Õĩha rãnga hasaha verã. Jesús heishu reta: Ãñete rãnga peupokui irova hareka pyhasa'asypokui she ahasa verã rãĩmi,

⁴⁰ tẽvã pyvapy verã shakata hareka shasu kyty sheeãpo ameẽpe, hokava Sheruĩpo meẽshukui opaite õĩ kavi'õ retape.

⁴¹ Hãrã ĩrũ 10 ia mboireare hendurã, poshy jyreshu Santiago hareka Juan.

⁴² Jesús hẽnoshu retarã hei: Pee rãnga pikuaakuei mburuvishare, marãra henta ĩrũre reko ipope, hãrã haire mbytepe'ẽjy vateve'õre, reko'asyshu reta.

⁴³ Pynymbytepe kyrããpo hai: Pota vateve'ia pynymbytepe, tymbory opaitevape.

⁴⁴ Ĩme'ẽ pota tynonde'ivarã, tiko jokuehareirea opava retape.

⁴⁵ Shara Kuareta Tay oũã pyrokue'i verã, koñeĩ jokueha verã rãnga hareka meẽ verã hykove, hetavape mondojepe verã mbai porãmbaivi.

Jesús mynguera Bartimeo heshamba kũvãipia

⁴⁶ Haivi vãhẽ jyraha Jericope. Jesús õhẽjyma oho hoka tentaivi mboireare hãndi hareka kuareta hetavarã, pente heshamba kũvãipia Bartimeo he'iashua Timeo tay, pe hỹmbeype vapy'i jururete'ẽrã.

⁴⁷ Hendu Jesús Nasareno hasa ohovarã, õñepyrõ sapukerã hei: Jesús, David Tay, shyparekomitẽvẽ!

⁴⁸ Heta'ẽ poshy ryheve ijetashuva pota jasaka'ẽshu retarã, tẽvã hai hỹnatuve sapukejy: David Tay, shyparekomitẽvẽ!

⁴⁹ Haipe Jesús oho ñymbourã hei: Pỹhẽno. Hẽno reta heshamba kũvãipiarã heishu: Narẽã pũ'ã, nyrẽno'i.

⁵⁰ Haipe heshamba kũvãipia mombo jasoirearã, oporã ñymbou, hãma ñymboja Jesús ẽvãpe.

⁵¹ Haipe Jesús pyrãndushu: Mbaivara ripota ajapo ndyrehe? Hãma heshamba kũvãipia heishu: Pyrỹmboi'ia, pota rãnga aheshatẽvẽ kuvãipi.

⁵² Jesús heishu: Ekuajyvy, rirojarã rykuerama. Haipevãi heshashamba kũvãipi vekua heshajyrã, oho Jesús haykue.