Marcos 1 - NandevaBiblia

Juan Bautista ñimiñee'i yvy ikoambaipi

¹ Ñee kaviva õñepyrõhea Jesucristo ryheva, Tũpa tay.

² Heiva rãĩmi, Tũpa ĩñee mbeu'ia Isaias jykuatiape: “Ko ãmondo ajokueva shiñee mbeu verã nynonderã, myhẽvã verã ndyraperã”.

³ Ñyhendu pente ñee sapuke'ia yvy ikoambaipi: “Pymyhẽvã Ñandeja haperã, pypeashu pente tape symyĩ'ova”.

⁴ Kyrã Juan ou ñimiñee yvy ikoambaipi, hareka heishu kuaretare: Pimyngarai hareka peijy Tũpa kyty hejareii pyndyhevi verã mbai porãmba pijapo vekua.

⁵ Hãma opaite Judeavare hareka Jerusalenpe'õre, jyraha Juan ẽvãpe jasakahe verãre. Mbeuma reta mbai porãmba japo vekuarã, Juan myngaraishu reta yy syryva Jordanpe.

⁶ Juan mondeva hai kamello haakueivi japohava, hareka pirekue jykuakuajypy, koñeĩ hou'i tuku hareka ei tyy kaahupi'õ.

⁷ Ñimiñeerã hei: “Shaykue ou pente ñymbaikatuve shyheviva, katumba she airoa ajorashi verã jypasa ĩsha.

⁸ Ãñete she apyrỹmyngarai yype; tẽvã haipo pynymyngaraikui Espiritu Santope”.

Jesús ñymyngaraikarã vẽkua

⁹ Hãma hoka arape Jesús ou tenta Nazaretvi ẽvã yvy Galileape, hãrã Juan myngaraishu Jordan yy syryvape.

¹⁰ Hãma Jesús õhẽjy yyvirã hesha jypeashu vate arapy, hãrã pykasu rãĩmi Espiritu Santo vejyhe.

¹¹ Hãma iñyhendu pente ñee ouva vate araivi heiva: “Nde hai Shyray ahaihuva, nde rupii shypya hory'ẽ”.

Jesús oho yvy ikoambaipi

¹² Haivi Espiritu Santo raha Jesús yvy ikoambaipi.

¹³ Haipe pyta 40 ara, hai iko mymba ñarõvare mbyteipi, hareka Satanas pyahããshu, hãma Tũpa jokuevare ou mboryshu.

Jesús õñepyrõ mba'apo Galileape

¹⁴ Juan Bautista mbyperesohamarã, Jesús oho Galilea kyty mbeu verã Ñee Kaviva Tũpa ẽvãpe'õ ryheva.

¹⁵ Jesús hei: “Vãhẽma ara, Tũpa ẽvãpe'õ ryheva vãhẽserima, peijy Tũpa jykoty hareka pyroja Ñee Kaviva”.

Jesús hẽno urũndy pira nohẽ'iare mboi verã

¹⁶ Hasa oho yyvasu hymbeypi Galileaperã, Jesús hesha Simón hareka tyvy Andres, ity ñynõĩva pysa yype; shara pira nohẽ'ia retai jyve.

¹⁷ Jesús heishu reta: Pei shipive, apyrỹmboipohe marãrapo iko pyndyhevi kuareta nohẽ'iare mbai porãmbavaivi.

¹⁸ Haipevãĩ opa heja jypysa retarã jyraha hipi.

¹⁹ Jesús ohomijyrã heshajy Zebedeo tayre, Jacobo hareka tyvy Juan, ñykanoape ñono kavi ñynõĩ jypysare.

²⁰ Haipevãĩ hẽnoshurã, heja reta tuu Zebedeo hareka mboryreare ñykanoape, haivi oho hãndi reta Jesús.

Pente kuimbai mbaiposhy ĩmerea

²¹ Jesús hareka mboireare vãhẽ jyraha Capernaunpe, putu'uava jy'arape Jesús iche Judiore ñymbatyseape pyrỹmboi.

²² Hãrã kuaretare mbyry opa mymãĩ reta hai pyrỹmboiheva, shara mboishu reta mbaikatu ryheve, hareka Moisés mbypara vekua pyrỹmboi'iheare rãĩmiã pyrỹmboi hai.

²³ Hãma ĩme'ẽ Judiore ñymbatyseape pente kuimbai mbaiposhy ĩmerea sapuke'irã hei:

²⁴ “Mbaivara ripota yryhevi, Jesús Nasareno? Reira opa irijuka verã? She arykuaa mbavara nde, nde hai Tũpa mbouva, heko Kyamba!”

²⁵ Jesús poshy ryheve heishu mbaiposhyrã hei: Jasaka, ẽhẽshi ko kuimbai!

²⁶ Hãma mbaiposhy hỹnatu mbyvava kuimbai, hareka hỹnatu sapukerã õhẽshi.

²⁷ Opaiteva haipe'iare kyje, õñepyrõ pyrãndu ijupe reta: Mbaivarajy kova? Marã pyrỹmboi py'ahuvarajy? Ko kuimbai rãnga, mbaiposhy retave japoshu hai heiva!

²⁸ Oparupiravĩ Galilea juri'õvã retaipi Jesús kuaaha.

Jesús mynguera Pedro haisho

²⁹ Õhẽjy Judiore ñymbatyseaivirã Jesús oho Simón hareka Andres hentape, hãndi Jacobo hareka Juan.

³⁰ Hãrã Simón haisho ĩme'ẽ hupare hakukue ryheve; hãrã narẽ'ãĩte mbeushu reta Jesús.

³¹ Haivi Jesús ñymbojahe Simón haisho, pysyshu ipoperã mupũã, hãrã haipevãi opashi hakukue, hãma hai õñepyrõ ñyngarekohe.

Jesús mynguera heta ñymbairasyvare

³² Ka'aruiterã kuarasy ichemarã, kuaretare heta veru ñymbairasyvare Jesús ẽvãpe, hareka mbaiposhy ĩmereare;

³³ hãrã opaite tenta ijare ñymbaty Simón hõchepe.

³⁴ Haipe Jesús heta mynguera opaĩ marãrãngãtu ñymbairasy vekua, hareka mbaiposhy ĩmereare opa mohẽshi, Jesús me'ẽãshu mbaiposhy ijeta verã, shara haire kuaa mbavara hai.

Jesús ñimiñee Galileape

³⁵ Kõ'eĩ pỹntuteri vekua Jesús õhẽ tentaivirã, oho yvy ikoambaipi haipe ñymboi verã.

³⁶ Simón hareka ñi'ĩrũre hãndi jyraha heka reta,

³⁷ Heshama retarã heishu: Opavare ndyreka jyre.

³⁸ Tẽvã Jesús heishu reta: Jaha tentamire mbyrymba'õĩpi haipi ambeu verã Ñee kaviva, shara ha'ẽrã ai.

³⁹ Kyrã Jesús vata'i opaite Galileaipi, ñimiñee'i Judiore ñymbatyseape hareka mohẽ mbaiposhyre.

Jesús mynguera pente kuru porãmba vekua

⁴⁰ Pente kuimbai kuru porãmba'ia ou Jesús ẽvãpe, ĩñesu hỹnonderã heishu: Nde pota shymynguerarã, shymynguerapo.

⁴¹ Jesús parekoiterã, ipo mondoshu, pokoherã heishu: Aipota rãnga, kuera!

⁴² Haipevãĩ opashi kuru vekua, hãrã kuera.

⁴³ Jesús narẽ'ãĩte mondojyrã, hei jyvyĩshu:

⁴⁴ Avytei mbeukui mbavape; ekuaĩ ijeshakashu pai, hareka meẽ rỹmeẽ verã Moisés mbypara vekua heiva rãĩmi, heshaha ndyrehe verã rykueramava.

⁴⁵ Tẽvã ko kuimbai ohojymarã, mbeu raha mbaivara ikohe; hãrã hai rehe Jesús katuvẽã iche ijeshakajy tenta retaipi, koñeĩ yvy ikoambaipi iko. Haipe opaivi ohovare oho hai ẽvãpe.