Lucas 9 - NandevaBiblia

Jesús mondo 12 mboireare

¹ Jesús mbaty 12 mboireare, meẽshu reta mbaikatu, hareka ñonoshu mbaiposhy mohẽ verãre hãndi mynguera verãre mbairasy.

² Hãrã mondoshu reta mbeu verãre Tũpa ẽvãpe'õ ryheva, hareka mynguera verã ñymbairasyvare.

³ Jesús heishu reta: Avy pyraha mãĩnũnga pehupi pevarã, yvyra, vosa, pãhã, maĩrã, kyrypoti. Avy mõkue pyraha pymondeva, penteĩpo.

⁴ Ĩmerãẽã oope piche pỹvãhẽrã, pypyta haipe pehojypeve haivi.

⁵ Hãma ĩme'ẽ potamba pymyvãhẽvarã, pẽhẽ hoka tentaivi hareka pymytymoshi pepy ryheva yvy tĩmbo, mbe'uha verãre hẽndusembava Tũpa ĩñee.

⁶ Haivi õhẽ retarã jyraha tentamirehupi, mbeu Ñee haikaviva hareka opa rupi pyrỹmynguera reta.

Herodess kuãã mbaara Jesús

⁷ Mburuvisha Herodes mbe'uashu heta mbai Jesús japovarã, kuãã mbaivara hokava, hareka kuãã mbaivarapo japo, shara ĩme'ẽ heiva Juan kuerajya manovare mbyteivi.

⁸ Yngavare hei Elías ijeshakajya; ĩrũre heijy pente Tũpa ĩñee mbeu'iare arykaiva kuerajya.

⁹ Tẽvã Herodes hei: “Sheteiva rãnga Juan ñãka ajasyjakashi. Mbavante akuarã kova, heta mbaima ãhẽndushi”? Hãrã Herodess heka, marãrapo hesha Jesús.

Jesús myngaru 5.000 kuimbaire

¹⁰ Apostolre opajymã ourã, mbeushu reta Jesús, opa mbai haire japova. Haivi Jesús rahashu reta hã'ẽi'õpe, õĩãmbaipi tenta Betsaida he'iashuape.

¹¹ Hãrã kuaretare kuaamajy retarã, opa ohohipi reta, Jesús mỹvãheshu retarã mbeujyshu reta Tũpa ẽvãpe'õ ryheva, hareka mynguera ñymbairasyva.

¹² Tẽvã ka'aruma'irã, ñymboja Jesús ẽvape 12 mboirea retarã heishu: Mondojymĩtẽ ko kuaretare tohojy tuputuu hareka tyheka reta hou verãre tenta hareka ñũũ mbyrymba'õĩpi, shara koipi mba'ety mãĩnũnga.

¹³ Tẽvã Jesús heishu reta: Pymeẽshu hou verã reta. Haire hei: Mba'ẽã rãnga ĩme rekoha, koñeĩ 5 pãhã hareka mokue pira, opa ñamyngaru verã hetavare ohoañõĩpo ovahajy.

¹⁴ Shara haipe'ẽẽ 5.000 mil kuareta. Tẽvã Jesús heishu mboireare: Pymbeushu tĩmbaty tyvapy reta, pentevape 50 yngaty 50.

¹⁵ Kyrã japo retarã, opa kavi mbyvapyka reta.

¹⁶ Hãma Jesús heky pãhã 5 ia hareka mokue pira, hãrã vate ararerã mãirã, ohovasa, pysẽãra mẽshu mboireare, mẽmeẽshu verã kuaretare.

¹⁷ Opaiteva karu hareka opa hỹvãta reta. Haivi 12 kanãta mynyhẽjy reta pysẽve hembyvekua.

Pedro hei Jesús haiva Mesia

¹⁸ Pente arape Jesús hã'ẽĩ õpe jurure, mboireare haipe'ñynõi jyve hãndi, hãrã pyrãndushu reta: Mbaivara kuaretare hei shyrehe, mbavara she?

¹⁹ Haire heishu: Ĩme'ẽ hei ndyreheva Juan Bautista; ynga heijy Elías, hãma ĩrũre heijy ndyrehe Tũpa ĩñee mbeu'ia arykaiva, kuerajy vekua.

²⁰ Haipe Jesús pyrãndu jyveshu reta: Pee jyveka, marãra perejyve shyrehe, mbavara she? Pedro heishu: Nde hai Cristo Tũpa mbouva.

Jesús mbeu mano verã

²¹ Jesús hei jyvyĩshu reta potamba kova mbavape mbeuvare.

²² Hãrã heishu reta: “Kuareta Tay hetapo hasa'asykui”, mbijicheposhu karai kuakuavare, pai ruvishare hareka Moisés mbypara vekua pyrỹmboi'iheare. Hãma jukapo retakui, tẽvã mbahapy arapepo kuerajykui.

²³ Haivi hei opava retape: Ĩme'ẽ pota ou shimĩ'ĩrũvarã, tĩmbysare ijuhuvi, tuhupi jukurusu opa ara, hareka tou shaykue.

²⁴ Tẽvã hykove potamba meẽva, jyvarepohe; shara opaite shyreepe hykove jyvarehea, ohojepepo.

²⁵ Mbaivara mbijehupo kuimbai opaĩ yvy'ĩãrẽ'õ ña'ãporãrã, oparei mãirã manoshirã?

²⁶ Ĩme'ẽ shynõti'ia hareka shiñee, ãnotipo jyvekui, kuareta Tay oujyma hĩmbipevapyrã, Sheru hĩmbipekuepy hareka opaite jokuevare heko kyambare hãndi.

²⁷ Añetevape hai pee, a'ãmo kope ĩme'õre, manoãpokui ndeiteri hesha Tũpa ẽvãpe'õ ryhevarã.

Jesús hete opa yngai'ẽrã vẽkua

²⁸ Hasama 8 ara kyrã heivarã, Jesús jupi yvyturusure jurure verã, mĩ'ĩrũshu Pedro, Jacobo hareka Juan.

²⁹ Haipe jururerã mondii hova opa yngai'ẽ, mondeva tĩĩrai hareka hĩmbipekue sãnka.

³⁰ Hãrã mokue kuimbai ijeshakajyshu, ijeta hãndi reta Jesús, hokavare hai Elías hareka Moisés;

³¹ opa hĩmbipe juri reta, haipe ijeta ñynoĩhe marãrapo Jesús ohojy vate arape, hokava mbai ikopo Jerusalénpe.

³² Pedro hareka ñi'ĩrũre hypehytẽvare, ocheã reta, hãrã hesha reta Jesús hĩmbiperã hareka mõkue kuimbai ẽẽ hãndiva.

³³ Haivi Moisés hareka Elías Jesús syrymashi retarã, Pedro heishu: “Pyrỹmboi'ia, ajeteiarãngambaje kope ĩmehã'ẽrã! Tijapoha mbahapy oo rãĩmi: Pentepo na'ãporãkui, ĩrũpo Moisés pevarã hareka ĩrũpo jyveshukui Elías”. Tẽvã Pedro kuãã hokava hei'õ.

³⁴ Ijetateri'õ, vejyhe reta pente ãvãpỹntu opa jasoi retarã; mbo'earea mbahapy'õre opa kyje reta.

³⁵ Haivi ou pente ñee ãvapyntuivi, heiva: “Kova hai Shyray ahaihuva, pijaposhu hai heiva”.

³⁶ Haivi ñee opamarã hesha reta Jesús hã'ẽĩ'ẽ; hãrã heta ara haire jasakaĩ, mba'ety mbeushuare hoka heshava.

Jesús mynguera pente kunumi mbaiposhy ĩmerea

³⁷ Hãrã parejyrã, vejyjyma reta yvyturusuivirã, kuareta hetava ou hỹnonde Jesús.

³⁸ Hãrã pente kuimbai kuareta hetava mbyteivi hỹnatu ĩñee mbourã hei: Pyrỹmboi'ia, airure nde rỹmaĩhe verã shyray, koñeĩ areva;

³⁹ pente mbaiposhy ichepy, hareka sapy'ãĩ mbysapukerã, hỹnatu mbyryry hareka juru mbytyryju japo. Hetama jyvavareherãmẽĩ poijyshi

⁴⁰ Airurematẽshu rỹmboivare mohẽshi verã, tẽvã katuã mohẽshi reta.

⁴¹ Jesús heishu iko'ihipivare: Pee jyrojambaa hareka heko kyava ryhevare! Mbaipeverapo ãĩme'ãĩ pynymbytepe hareka aiko'ai pyndyrehe? Eru kope ndyray.

⁴² Hãrã kunumi ray ou'ia ryheveĩ, mbaiposhy mombojy yvype hãrã hỹnatu opa mbyryry. Tẽvã Jesús poshy ryheve heishu mbaiposhy, mynguera kunumi ray, haivi meẽjyshu tuu.

⁴³ Hãrã kuaretare opa mbyrymaĩ heshama reta Tũpa ñymbaikatukuerã. Hãma opavare mbyrymaĩ Tũpa ñymbai katukue hesharã, Jesús heishu mboireare:

Jesús hykuaĩ mbeujy mano verã

⁴⁴ “Pyhendu kavi kova hareka avy pyndysarehekui; kuareta Tay mẽ'ẽhapokui kuaretare ipope”.

⁴⁵ Tẽvã Jesús mboireare kũãã mbaivara hei ñynoĩshu reta, shara ñomĩhateri ñynoĩshi reta potã kuaarã, hãrã kyje pyrãndushu reta Jesús.

Mbavara hai mbaivasuveva?

⁴⁶ Hãrã mboireare õñepyrõ ijeta porãã ijupi reta, mbavara haire mbytepe mbaivasuvepokui.

⁴⁷ Tẽvã Jesús opa kuaa pyape hei ñynoĩva. Haipe pente sanjaymi henorã hyvache ñono.

⁴⁸ Jesús heishu reta: “Shyreepe myvãhẽva ko sanjaymi, she shymyvãhẽ. Hãrã she shymyvãhẽva, myvãhẽ jyve Sheru shymbou vekua. Hãma kuareta sanjaymi rãĩmi'ia pynymbytepe, hokava hai mbai vasuveva”.

Ñymbyvaishomba ñandyreheva ñandykoty ñynoĩ reta

⁴⁹ Hãma Juan heishu Jesús: Pyrỹmboi'ia, heshaha rãnga pente kuimbai ndyreepe mohẽva mbaiposhy. Tẽvã ore jochahaje shara ha'ẽã jaikojai hãndivarã.

⁵⁰ Tẽvã Jesús hei: Avy pijocha; shara kuareta ñymbyvaishombaa ñandyreheva ñandykoty ñynoĩ reta.

Jesús heheishu'ishu Jacobo hareka Juan

⁵¹ Hãma vãhẽserima vate arapy hupiajy verãrã, Jesús hei oho verã Jerusalénpe.

⁵² Hãma mondo jokuevare hỹnonderã oho mbeuvare, pente tenta Samariape, myhẽvãshu verã pyta verãpe;

⁵³ tẽvã Samariape'õre potãã mỹvãhẽshu, shara kuaa reta Jesús oho'ia Jerusalén kyty.

⁵⁴ Hãrã mboireare Jacobo hareka Juan hesha hokavarã, heishu reta Jesús: Yreja, ripotara jurureha ou verã vate araivi tata, opa hapy verãre Elías japo vekua rãĩmi?

⁵⁵ Tẽvã Jesús mãĩ jykotyrã hareka poshy ryheve heishu reta: Pee pikũãã mãrãva espiritu ryhevara pee.

⁵⁶ She, Kuareta tay rãĩmi ai vekua yvy'ĩãrẽ, aiã aivarehe verã kuaretare, ai ãmondojepe verãĩ rãnga. Haivi jyraha reta ynga tentape.

Jesús pota mi'ĩrũshu vekuare

⁵⁷ Hãma jyrahama retarã, pente kuimbai heishu Jesús: Sheja, pota rãnga ahave ndipii rehovaipi.

⁵⁸ Jesús heishu: Avarare ĩmere hai ikua, hareka vyrare ĩmere jyve haity; kuareta Tay mba'etyre ñenorã ñãkã mbuputuu verãpe.

⁵⁹ Jesús heijyshu yngava: Ei shimĩ'ĩrũ. Tẽvã hai hei: Sheja, mã'ẽĩshyre taha tañoty sheru hetekueani.

⁶⁰ Jesús heishu: Ma'ẽĩhe manovare tiñoty hoka manova; tẽvã nde ekua mbeu ñee Tũpa ẽvãpe'õ ryheva.

⁶¹ Haipe ĩrũ heishu: Sheja, pota rãnga ahave ndipii, tẽvã mã'ẽĩshyre taharãni tambeushu ãĩmoña hãndiare.

⁶² Jesús heishu: Pente kuimbai arao ipope ñonorã, haykue mãiva, ĩkõãpo Tũpa ẽvãpe'õ ryhevarã.