Lucas 5 - NandevaBiblia

Pira heta nohẽava ryheva

¹ Pente arape Jesús ẽẽ yyvasu Genesaret hymbeype, kuareta jahe vekua jasoi, hendu verãre Tũpa ĩñee.

² Jesús hesha mokue kanoa mbaimba'ẽpya hareka pira nohẽ'iare opama vejyshia, johe verã jypysare.

³ Jesús jupi penteva kanoape Simón ña'ãpoapy, haivi jurureshu mbyry katu ñono verã yy hymbeivi. Haipe Jesús vapy kanoaperã, haivive õñepyrõ ñimiñeeshu kuaretare.

⁴ Opama ñimiñeerã heishu Simón: Raha nycanoa yy typyve õpe, haipe pymombo pyndypysare pynohẽ verã pira.

⁵ Simón heishu: Pyrỹmboi'ia, jypyhahare rãnga mba'apoha, tẽvã mba'ẽa nohẽha. Katynga nde reresheva rupiipo araha amombojy pysa.

⁶ Hãrã kyrã japo reta, itymapy reta pysarã heta mboa reta pira, hãma jypysare ajete opaite myndoroshi reta.

⁷ Hãrã õñepyrõ hẽno reta ñi'ĩrũre ĩme ñynoĩva ĩrũ kanoape, ou mboryshu verãre. Hãrã jyverurã, opa mynyhe reta mokue'õ kanoa, ajejetei ñapyvyĩshi reta ñykanoare.

⁸ Simón Pedro, heshama kovarã, iñesu Jesús hỹnonde hãrã heishu: Syry shyhevi, Sheja; she rãnga hai heko porãmba.

⁹ Shara hai hareka ñi'irũre opa mbypy'ãã reta pira nohẽvare rehe.

¹⁰ Kyrãĩ jyve Jacobo hareka Juan Zebedeo tayre, Simón ñi'irure. Tẽvã Jesús heishu Simón: Avy kyje; ã'e haimapondekui kuaretare nohẽ'ia.

¹¹ Haivi verujyma kanoa yy hymbey perã. Opa heja reta jyraha hipi Jesús.

Jesús mynguera pente kuru porãmbava

¹² Iko Jesús imeteri'ẽ pente tentaperã, vãhe oushu pente kuimbai kuru porãmbava, hãrã heshama Jesús perã, iñesu hỹnonde hova yvyre ñono hareka jurure asyshurã heishu: Sheja, ripotarã, shymynguerapo.

¹³ Haipema, Jesús ipo mondoshurã, pokohe, hãrã hei: Aipota rãnga! Arỹmynguera! Hokava opa heirã kuru porãmbava opa kañyshi.

¹⁴ Hãma Jesús heishu: Avy mbavape mbeukui. Koñeĩpo reho rijeshakashu pai, hareka raha meẽ opama ndoheava Moisés hei vekua rãĩmi, opavare hesha verã rykueramava.

¹⁵ Tẽvã haipe Jesús kuaahave raha opa rupi, hareka heta kuareta ñymbaty jasakahe verãre ĩñee, hareka ñymyngueraka verã mbairasykueivi.

¹⁶ Tẽvã Jesús ohoshi reta mbamba'ẽẽvaipi, haipima ñymboi.

Jesús mynguera pente vatamba

¹⁷ Pente arajyape Jesús pyrỹmboi evãpe, vapy ñynõi haipe fariseore hareka Moisés mbypara vekua pyrỹmboi'iheare ouva opaite tenta Galilea, Judea hareka Jerusalénvi. Hãrã Ñandeja ñymbaikatu ẽẽ hãndi pyrỹnguera verã.

¹⁸ Haivi õhe ou kuimbaire veruva hupa ryheve pente kuimbai vatamba, hãrã õñehãtẽ minjejyre oo'ipe, ñono hỹnonde verãre Jesús.

¹⁹ Tẽvã vãheãshu reta mãivi rapo minje shara kuaretare hetaiterã; hãrã jupi reta oo'iãrẽrã heky reta teha, haivima mbyvejy reta ñymbairasyva hupa ryheve haire mbytepe Jesús hỹnonde.

²⁰ Jesús heshama haire jyrojakuerã, hei ñymbairasyvape: Kuimba'e, mbai porãmba rijapo vekua hejareima ndyhevi.

²¹ Hãrã Moisés mbypara vekua pyrỹmboi'iheare hareka fariseore pyapei hei jyre: “Mbavarajy ko Tũpare ijeta porãmba'ia? Mbavara katu hejareii mbai porãmba vekua? Koñẽĩi ranga'ẽ Tũpa”.

²² Tẽvã Jesús opaĩ kua ẽẽ haire pyape hei õrã pyrãndushu reta: Marã'irãra kyrã pypya pimbijetapi?

²³ Mbaivara javaiã jai: “Mbai porãmba rijapo vekua hejareima ndyhevi”, maĩrã “Puã, vata”?

²⁴ Aheshakapo pee kuareta Tay, ime'are mbaikatu ko yvy'iãre, hejareii verã mbai porãmba. Haivi Jesús heishu kuimbai vatamba: Pũ'ã, hupi ndurupa hareka ekuajy nyrẽtape.

²⁵ Haipevãi vatambaa puã hỹnonde reta, heky hupa ñeno'ipyarã ohojy hentape õmombaijy oho Tũpa.

²⁶ Opaite mbyry mãi reta, hãrã õmombaivasu reta Tũpa, haivi kyje ryheve hei jyre: Ã'ẽ mbai haikaviteveva jahesha.

Leví henoharã vekua

²⁷ Kova mbai oparã Jesús ohojy. Haivi hesha pente kyrypoti mbatyse'iare Roma pevarã, Leví he'iashua, vapy ẽẽ mesape okorase'õpe. Jesús heishu: Eive shaykue.

²⁸ Leví puãrã opa heja, hãrã oho hipi.

²⁹ Haivi Leví japo karuvasu hentape Jesús pevãrã, heta'ẽjyve kyrypoti mbatyse'iare Roma pevarã, hareka ynga kuaretare vapy ñynoĩ hãndi mesape.

³⁰ Tẽvã Moisés mbypara vekua pyrỹmboi'iheare hareka fariseore ĩñee mombo jyrehe Jesús mboireare hãrã heishu reta: Mãrã'irãra pykaru hareka piñymbyu hãndi kyrypoti mbatyse'iare Roma pevarã, hareka mbai porãmba japo'iare hãndi?

³¹ Jesús mbyhovaishu reta: Mambaimba'ia ikoteveãhe pyrỹpyhãno'iare, koñeĩ ñymbairasy'ivãi.

³² She aiã aheno heko kavivape, heko porãmba'ia retapei, oujy verãre Tũpa kyty.

Jesús pyrãndushu reta karumbaa ryheva

³³ Heishu reta Jesús: Juan Bautista mboireare hareka fariseore poiã karumbape jyre hareka ñymbo'e reta, tẽvã rymboiryreare poiã karu hareka poiã ñymbyu hai reta.

³⁴ Jesús heishu reta: Katurapo pee pymyngaruã henohakavare omendava ẽvape, temerã imeteri ñynoĩ hãndirã?

³⁵ Tẽvã vãhe pokui ara temerã rahahajyshi verãre, hãmerãpo hoka arape karumbape ñynoĩkui.

³⁶ Jesús heijyshu reta kova ñee ñymyhã'ãnga: Mba'ety chĩchiva pente mondeava py'ahuva pyseve mbojahe verã mondeava tujava. Kyrã japorã myporãã mondeava py'ahuva; hareka py'ahuva porãã'ẽẽjy tuja vekuare.

³⁷ Kyraijy mba'ety ñonova vino py'ahuva vakapi tujavekuapy, shara vino py'ahuva myndoropo vakapi tujavekua, haivi jyvarereipo ijehe vino hareka vakapi.

³⁸ Shara vino py'ahuva mbyhyruañõipo vakapi py'ahuvapy.

³⁹ Mba'ety vino tuja'õ houmava, kyrẽy houjy verã vino py'ahuva, shara heiñoĩpo: “Tujava kapyryvehai”.