Lucas 4 - NandevaBiblia

Ãña pyahãshu Jesús

¹ Jesús Espiritu Santo tynyhe ryheve, oujy ysyryva Jordanvi hãrã Espiritu Santo rahashu yvy ikoambaipi.

² Haipe pyta 40 ara kavi, hãrã Ãña pyarããshu. Mbaimba houva hokava arape, hasamarã ñymbahy ñandu.

³ Ãña heishu: Nde ãñete hai Tũpa Tayrã, ereshu ko ita tikoshi pãhã.

⁴ Jesús heishu: Mbyparahavape rãnga hei: “Ha'eã rãnga pãhãreĩ kuareta hykove'i verã, opaite Tũpa ĩñeere rãngapo jyve”.

⁵ Haivi ãña rahajyshu pente yvyturusu'ĩãrẽ, hãrã mbyheshaka sapy'aite opaite tenta huvisharã yvy'iãrẽ'õre.

⁶ Hãrã Ãña heishu: She ameẽpo ndekui ko mbaikatu hareka hĩmbipe. Shara opa me'ẽãshe kovare, hãrã pota ameẽvapepo ameẽ.

⁷ Opapo na'ãporãkui rĩñesu shynonderã, hareka shemombairã.

⁸ Jesús heijyshu: Syry shyhevi, Aña, shara kuatia mbyparahavape hei: “Ñandeja nu Tũpapepo rĩñesu rẽmombai, hareka haireñõĩpo reĩ”.

⁹ Haivi Ãña rahajyshu Jerusalénpe, haipe hupishu tũpao 'iãre vateve'õpe, hãrã heishu: Nde hai Tũpa Tayrã, epo koivi!

¹⁰ Shara kuatia mbyparahavape hei: Tũpa mboupo jokuevare ñyngareko ndyrehe verã.

¹¹ Ipope ndypysypo reta potãã ita ndepy ryrokuaherã.

¹² Tẽvã Jesús heishu: Kuatia mbyparahavape heijy: “Avy pya hããshu Ñandeja nu Tũpa”.

¹³ Hãma Ãña vãhẽveãmashu marãraporejy Jesús pya hã'ãveshurã, oho poshyjyshi.

Jesús õñepyrõ mba'apo Galileape

¹⁴ Hãma Jesús oujy Galileape Espiritu Santo ñymbaikatu tynyhekuepy ryheve, hãrã opa rupi kuaaha hokava yvyipi.

¹⁵ Pyrỹmboi Judiore ñymbatyseape, hareka opavare õmombaishu.

Jesús Nazaretpe

¹⁶ Jesús oho Nazaretpe, mbykuakuaa vekuape, hareka putu'uava jy'arape iche Judiore ñymbatyseape hai jypykuava rãĩmi, hãrã ñymboyrã mbijeta mbypara vekua.

¹⁷ Hãrã meẽshu reta Tũpa ĩñee mbeu'ia Isaias mbypara vekua, haivi pearã vãheshu heiva:

¹⁸ Ñandeja je Espiritu ẽẽ shearẽ, hai shymbyheko kavi ãmbeuverã Ñee Kaviva pavete'ia retape. Shymbou amynguera verã ojepy'apy'iare; amohẽjy verã mbypereso vekuare, hareka heshajy verã kũvaĩpi heshambare; apoikajyshi verã jopya porãmba'õre;

¹⁹ ãmbeu verã Ñandeja pyakavi ñy'ãño.

²⁰ Hãrã Jesús mbotyjy kuatia, meẽjyshu pyrỹmbory'ia Judiore ñymbatyseape'õrã vapyjy; hãrã opaite Judiore ñymbatyseape ẽvãre maĩtei jyrehe.

²¹ Jesús õñepyrõ heishu reta: Ã'ẽ ikoma kova mbyparaha vekua pynynonde.

²² Opaiteva ijeta kavihe Jesús, hãrã mbyrymaĩhe reta mbai kavikuere heiva rehe hareka hei reta. Ha'eãra kova José tay?

²³ Jesús heishu reta: Ĩmerã pereposhe pente ñee ñymyhã'ãnga heiva: “Pyrypyhano'ia, ndeii ñymynguera”; “Heta mbai henduha rijapo vekua Capernaumpe, japo jyve ko ndy'yvype”.

²⁴ Jesús heijy: Ãñete hai pee, mba'etypo Tũpa ĩñee mbeu'ia haihuhava hentaipi.

²⁵ Ãñete hai pee, heta taupe ĩme manoshia ẽẽ arykai Israelpe Tũpa ĩñee mbeu'ia Elías jy'arape, 3 ãño hareka ova jasy kavi haiviã'irã, hareka ñymbahy vasu ẽẽ opaite yvy retaipi;

²⁶ katynga, Tũpa mondoã Elías taupe ĩme manoshiare ẽvape, koñeĩ pente taupe ime manoshia Sareptape'ia õpe, Sidón hyvache'õ.

²⁷ Heta'ẽjy kuru porãmbava Israelpe Tũpa ĩñee mbeu'ia Eliseo jy'arape; tẽvã mba'ety haire mbytepe'õ mynguerahava, koñeĩmba Naamán Siriape'õ.

²⁸ Kova hendu retarã, Judiore ñymbatyseape'iare opa poshy reta.

²⁹ Opa puã retarã mõhe reta Jesús tentaivi, hãrã raha reta yvyturusu'iãre mupuãva hai hentare, haivi mombo verãre yvy kyty.

³⁰ Tẽvã Jesús haire mbyteipi hasarã, hãrã ohoshi reta.

Pente kuimbai mbaiposhy ĩmere vekua

³¹ Haivi Jesús oho Capernaumpe, tenta Galileape'õ, hãrã mboishu kuaretare pente putu'uava jy'arape.

³² Hãrã mbyrymãihe reta hai pyrỹmboiva rãĩmi, shara mbaikatu ryheve ijetashu retarã.

³³ Hãma Judiore ñymbatyseape ĩme'ẽ pente kuimbai mbaiposhy ĩmerea, hỹnatu sapuke'iva.

³⁴ Mã'ẽi yryrehe! Marã'irãra rỹmai yryrehe Jesús Nazareno? Reirapo opa õrẽhũndi? She arykuaa mbavara nde: Nde hai heko kyambava Tũpa mbouva!

³⁵ Jesús poshy ryheve heishu mbaiposhy: Jasaka, ẽhẽshi ko kuimbai! Haivi mbaiposhy mombo yvype kuimbai, hetavare mbytepe, hãrã õheshi mbaimba japoheape.

³⁶ Opa kyje retarã hei jyre ijupe: Mãrãva ñeerajy kova, hỹnaãtu ijetashuva hareka mbaikatu ryheve mbaiposhy retape, hãrã haire õhe!

³⁷ Hãrã opa rupi mbe'uha rahaha hai japova, hokava yvy retaipi.

Jesús mynguera Simón haisho

³⁸ Hãrã Jesús õhe Judiore ñymbatyseavirã oho Simón hentape, haisho ñymbairasy'õpe hareka haku japyrahava. Jurure jyreshu Jesús mbory verãre.

³⁹ Jesús jyroa'ĩãrẽrã poshy ryheve heishu takukue, hãrã hakukue opashi. Haivi hai puãravi hareka ñyngarekohe reta.

Jesús mynguera heta ñymbairasyva

⁴⁰ Kuarasy ichema'ia, opaite ñymbairasyvare hareka mbairasy opaisharei vekua rahashu reta; hãrã hai pepenteĩ ipo ñono'iãrẽrã, opa mynguera.

⁴¹ Heta ñymbairasy vekuaivi õhe jyve mbaiposhy sapuke jyrerã hei reta: Nde hai Tũpa Tay. Tẽvã Jesús poshy ryheve ijetashu reta hareka mã'eĩahe ijeta reta, shara haire kuaa Cristorã.

Jesús ñimiñee Judiore ñymbatyseape

⁴² Kõĩma ourã Jesús õhe oho tentaivi hãrã oho hã'ĩ ẽẽ verãpe. Tẽvã kuaretare heka jyre vãheshu peve. Pota jochajyre, potã ohoshi retarã,

⁴³ tẽvã Jesús heishu reta: Ambeu ñoĩrãngapo jyve tenta yngaty'õ retape Ñee Kaviva Tũpa ẽvãpe'õ ryheva, shara ha'erã shymbouha.

⁴⁴ Kyrã Jesús ñimiñee'i Judiore ñymbatyseapi.