Lucas 24 - NandevaBiblia

Jesús kuerajy

¹ Tynonde semana õñepyrõãpe, kõ'ẽĩ, taupere jyverujy reta tã'õvẽ ñonoãvape, raha reta mbai pisheka kaviva; myhẽvãjyre vekua; mi'ĩrũ jyveshu reta yngava taupere.

² Vãhẽ jyraharã, hesha reta mbysyryamashi ita jo'oa vekua juru mbotyhapya;

³ iche reta, tẽvã heshãã Ñandeja Jesús hetekue.

⁴ Opa kyje retarã kuaã mbaivarapo japo reta, hãrã haipe ijeshakashu reta mokue kuimbai mondea opa hĩmbipeva;

⁵ kyjeite retarã opa ĩñesu reta, tẽvã haire heishu: Marã'ĩrãra pyhekapi manovare mbytepe hykovejya?

⁶ Mba'ety kope, kuerajyma! Pymanduahe heipe vekua, Galileape teri'irã;

⁷ heiva: Ko kuareta Tay me'ẽãñoĩ verã kuimbai heko porãmba'iare ipope hareka mbysavavaha kurusure tẽvã mbahapy arapepo kuerajykui.

⁸ Haipe taupere manduahe Jesús hei vekua,

⁹ jyrahajyma reta tã'õvere õĩvirã, mbeushu reta 11 mboire vekuare hareka opaite yngavare.

¹⁰ Kova apostol mbeu vekua mboire vekua retape hai Maria Magdalena, Juana, Maria Jacobo ishy hareka taupere oho hãndivare.

¹¹ Tẽvã mbo'eare vekuare rojãã reta haire mbeuva, shara hãĩny heheitẽ'iare.

¹² Katy Pedro õhẽrã ñani oho, ita jo'oa vekua kyty, maĩ'i hapyperã tarapo tĩva ñomahapy vekuaĩ hesha, hãrã ohojy hentape mbyrymaĩ ryheve ko iko vekua rehe.

Emaus hape kyty

¹³ Hoka arape mokue mboireare oho pente tenta Emaus he'iashuape, pytava 11 kilometro Jerusalénvi.

¹⁴ Ijeta jyrahahe opaite iko vekuare;

¹⁵ kyrã ijeta hareka pyrãndu jyraha ijupevapeĩ, Jesús teiva hesharã vata oho hãndi reta.

¹⁶ Hesapetẽ'ẽvãre, kuãã reta shara ĩme'ẽ jochashiare.

¹⁷ Jesús pyrãndushu reta: Mbaivara pijetapeihe pehupi? Mbo'eareare opa ñymbou reta yvy kytyĩ maĩ jyre.

¹⁸ Hãrã penteva Cleofas he'iashua heishu: Haira neiiri Jerusalénpe ryvatava rikuaamba ko ara iko'õva?

¹⁹ Jesús pyrãndushu reta: Mbaivara iko? Haire heishu: Jesús Nazareno ryheva, hai rãnga Tũpa ĩñee mbeu'ia, mbaikatupy japo'ia hareka ñeepy Tũpa hỹnonde hareka opaiteva henta'õre;

²⁰ hareka marãra pai ruvishare hareka mburuvishare meẽ reta jukaha verã, hãndi kurusure mbysavavaha verã.

²¹ Tẽvã ore hãrõãteshi tenta Israel opa jorajy verã; tẽvã ã'ẽ mbahapy aramajy kova mbai ikova.

²² Katy ã'ãmo taupere ikoha'i hãndiare opa mbyry ỹrỹmymaĩje, kõ'ĩmba jyraha reta ita jo'oavaperã,

²³ tẽvã heshããmba reta Jesús hetekue, hãma oujy retarã mbeu'ore reta Tũpa jokuevare ijeshakashuare, heishuare Jesús kuerajymava.

²⁴ A'ãmo ĩrĩ'ĩrũre jyraha ita jo'oa vekuape, haipe hesha taupere heiva rãĩmitei; tẽvã heshãã reta Jesús.

²⁵ Hãma Jesús heishu reta: Pee mbaimba pikuaava! Marã'ĩrãra pyndypya tantaĩte pyroja verã Tũpa ĩñee mbeu'iare hei vekua?

²⁶ Katuãra Cristo hasa'asyrãni mbai hasyva iche verã hĩmbipeape Tuu ẽvãpe?

²⁷ Hãma õñepyrõ Moisésvi hareka Tũpa ĩñee mbeu'iare hei vekuaivi, kuaakashu reta opaite kova mbai kuatia mbyparaa vekua heiva.

²⁸ Vãhẽserima oho reta tentape haire jyrahavaperã, Jesús japo mbyryve oho verã rãĩmi.

²⁹ Tẽvã haire jochajyreshu: Pyta orẽndie kope, ka'aruitema rãnga hareka pyntumapo'i. Hãma iche pyta hãndi verãre.

³⁰ Vapyma ñynoĩ hãndi mesaperã, heky pãhã, ohovasarã pysẽã meẽshu reta.

³¹ Haipe hesare opa jypeajy hãrã kuajy reta Jesús, tẽvã hai maĩ ñynoĩheapeĩ opa kañy.

³² Hãrã heijyre ijupe: Hendỹarambaje ñandypyape hai ijeta ou ñande pehupirã vekua hareka kuaaka ñande mbyparaha vekua?

³³ Haipevãĩmba pũã retarã ohojy reta Jerusalén kyty, haipe hesha 11 õre ñymbaty'ẽrã, hareka ñi'ĩrũre,

³⁴ haire heishu reta: Ãñete ñoĩ rãnga hykovejymba Ñandeja, hareka Simón ijeshakambashuje.

³⁵ Hãrã haire mbeu mbaivara jehushu reta pehupi, hãndi marãra haire kuaajyshu reta Jesús pãhã pysẽãrã.

Jesús ijeshakashu mboireare

³⁶ Haire kova ijetateri ñynoĩheva, Jesús ñymboyshu reta mbyteperã hei: Pyndypyavapyĩño.

³⁷ Haire opa kyje moã hesha reta tẽ'ãkuerã.

³⁸ Tẽvã Jesús heishu reta: Marã'ĩrãra opa pykyje? Marã'ĩrãra kyrã pimoã pyndypyape?

³⁹ Pymaĩ shepo hareka shepyre, sheñoĩ rãnga. Pypoko shyrehe hãrã shyreshapiko, espiritu rãnga ha'eã hai tyroo hareka kãvẽã pyheshava rãĩmi she arekova.

⁴⁰ Hoka opa heirã, mbyheshaka reta ipo hareka ipy.

⁴¹ Tẽvã rojanungamba reta, vy'aite hareka mbyrymaĩ retarã; Jesús heishu reta: Ĩmera pyree kope jau verã?

⁴² Haipe haire meẽshu pira mykã'ẽãva pysevẽ hareka hẽẽva,

⁴³ hãma hekyrã hou hỹnonde reta.

⁴⁴ Haivi heijyshu reta: Kova rãnga hai ãmbeupe vekua, ãĩmeteri'ãĩ pynymbyteperã, ikoñoĩ shyre verã Moisés mbypara vekuapy'õ hei shyreva hãndi Tũpa ĩñee mbeu'iare jy kuatiape hareka Salmo py'õ.

⁴⁵ Hãma peajyshu reta pyare kuaa verãre mbyparaha vekua,

⁴⁶ heishu reta: Kyrã rãnga mbyparaha Cristo mano verã hareka puãjy verã manovare mbyteivi mbahapy arape;

⁴⁷ hareka ñimiñe'ẽha verã hai heepe opa tenta retaipi, oujy verãre Tũpa kyty hai hejareishi verã mbai porãmba japo vekuare. Peñepỹrõhe Jerusalénvi.

⁴⁸ Pee rãnga hai pyheshava kova.

⁴⁹ Hãrã She amboupo pẽãrẽkui Sheru ĩñee meẽ vekua; tẽvã pypytakui ko tenta Jerusalénpe ou peve pẽãrẽ mbaikatu ouva vate araivi.

Jesús hupiajy

⁵⁰ Haivi Jesús rahashu reta Betania peve, haipe ipo hupirã ohovasashu reta.

⁵¹ Ohovasa teri'ẽshua retapeĩ syry ohoshi retarã rahaha vate arape.

⁵² Haire opama õmombaishu retarã, vy'ape oujy reta Jerusalénpe,

⁵³ hãrã haire tũpaopeĩ jyre pyrahe hareka ohovasashu verã Tũpa. Amén.