Lucas 22 - NandevaBiblia

Pai ruvishare pota jukajyre Jesús

¹ Vãhẽserima arete pãhã jihiambaa mbai mby'oukavaperã, “Pascua” he'iashua,

² hãrã pai ruvishare hareka Moisés mbypara vekua pyrỹmboi'iheare, heka marãrapo ñemiãpẽĩ juka reta Jesús, shara henta'õre kyjeshi reta.

³ Hãma Satanas iche Judas Iscariote pyape, hai jyve penteva 12 Jesús mboireare,

⁴ hãrã oho ijeta hãndi pai juhuvishare hareka tũpao ñyngareko'ẽheare, haivi marãrapo meẽ Jesús haire ipope.

⁵ Haire vy'a jyre, hareka pente ñeepẽĩ ñynoĩ, meẽshu verãre kyrypoti;

⁶ hai rojaĩma, hãrã hekaima marãrapo meẽ Jesús haire ipope, kuaretare mba'ety'ẽrã.

Ñandeja pynturã karurã

⁷ Vãhẽma pãhã jihiamba mbai mby'ouka ara mby'areteavaperã, ikoatevẽheape juka verã pente avisha ray Pascua pevarã.

⁸ Hãrã Jesús mondo Pedro hareka Juan, heishureta: Pekua, opa pymyhẽvã ñande Pascuape jau verã.

⁹ Haire pyrãndushu: Mãperapo ripota myhẽvãhã?

¹⁰ Jesús heishu reta: Pichema tentaperã, pĩvãĩtĩ hãndi pente kuimbai yy rahava kambushipy. Pekua hipikui, oo icheapeve.

¹¹ Hãrã pereshukui oo ija: “Pyrỹmboi'ia rãnga pyrãnduka nde: Mapera'ẽ oo ñymbatyhaseape Pascuape akaru hãndi verã amboi'areare?”

¹² Hãrã oo ija pynymbyheshakapo pente oo vate'õ ñyvỹ tivishava opama'ẽvã. Haipe pymyhẽva ñande pynturã jau verã.

¹³ Haire ohorã, Jesús heishua reta rãĩmi katĩ hesha reta. Hãma haipe myhẽva reta Pascuape hou verãre.

¹⁴ Vãhẽma orarã, Jesús hareka jy'apostolre vapy hãndi reta mesape.

¹⁵ Hãrã heishu reta: Hetama rãnga pota hau penendie kova jykaru pynturã ho'uava Pascua ryheva, ndeiteri ãmanorã.

¹⁶ Haipope akaruveãmapokui kova jykaru pynturã ryheva, opa iko peve Tũpa ẽvãpe'õ ryheva.

¹⁷ Haipe heky vaso vino ẽẽpyarã, jurure'ĩãrẽrã hei: Kõ'ẽ vino peupy, hareka pymbyhahasa pijupe;

¹⁸ hãrã haijy pee, ãmbusururu vẽamapokui ko uva tyy oujypeve Tũpa ẽvãpe'õ ryheva.

¹⁹ Haivi hekyjy pãhã; opama jururejy'ĩãrã, pyseã meẽshu retarã hei: Kova hai shyrete, me'ẽã pyndyrehe verã. Pynymanduajy shyrehe verã, pijapo kova.

²⁰ Kyrãĩ japojy opa karurã, heky vaso vino ẽpyarã hei: Ko vaso hai ñee me'ẽã py'ahuva shuruvype, ñohẽhã pyndyrehe verã.

²¹ Tẽvã shymeẽ verã, kope vapy'ẽjyve shendie mesape.

²² Ãñete kuareta Tay manoñõĩpo ñonoãshuva rãĩmi. Tẽvã, tengapokui meẽ vẽkua!

²³ Haipe õñepyrõ pyrãndujyre ijupe, mbavarapokui Jesús pysyka verã.

Mbavara hai vateve'õ

²⁴ Jesús mboireare õñepyrõ heheimi jyre ijupe, mbavarapo haire mbytepe vateve'ẽkui.

²⁵ Jesús heishu reta: Opaite tentape'õre juhuvisha haire ipope ĩmere, hareka huvishare hei'ijehe reta heta mboryva kuaretare.

²⁶ Tẽvã pee ha'ẽã kyrãpi verã; hãrã vateve'õ pynymbytepe taykueva rãĩmi tiko, hãrã mbai miñaka'õ tiko pyrỹmbory'ia rãĩmi.

²⁷ Mbavara hai vateve'õ, mesape vapy'õra, maĩrã pyrỹmbory'ia? Ha'ẽãrapo mesape vapy'õ? Tẽvã she aikojyve pynymbytepe pyrỹmboryĩ'ia rãĩmi.

²⁸ Pee rãnga shimi'ĩrũ ñoĩtepi jyve jyhasa'asy retape.

²⁹ Hãrã sheteivapo apirĩñono huvisha vasurã, Sheru shiñonova rãĩmi,

³⁰ pykaru verã hareka pimbyu verã jyve shymesape avapyape. Haivi pyvapypo mburuvisha vasu vapypyape, pimbivachekashu verã 12 kavi'õ tenta Israelvare.

Jesús mbeu Pedro ñomire verã

³¹ Heijy Ñandeja: Pedrope: Simón, Simón, Satanas jururema pyndyrehe opa pynymomohẽ verã, trigo mbovaharã mbyvavaha'õ rãĩmi.

³² Tẽvã airureshuje Tũpa, potãã nykangy rirojakueperã. Hãrã opama hasa mbai pohyvarã, mykyrẽyjyshukui ni'ĩrũre jyrojanõĩ shyrehe verãre.

³³ Simón heishu: Sheja, ãĩ rãnga jyve ha'ẽã shymbyperesoa verãĩ, ãmano rãngapo jyve nendiekui.

³⁴ Jesús heishu: Pedro, haiponde ã'ẽvãĩ ndeiteri uru ñyrãã'ẽrã, mbahajypo rerekui shykuamba.

Pyarã'ã hora vãhẽserimarã

³⁵ Haivi Jesús pyrãndushu reta: Apyrỹmondo kyrypoti hyrumbape, ho'uava hareka pepy ryhevambaperã. Pymbeushe, mbaivajyra mba'etype? Haire hei: “Mba'ety”

³⁶ Hãma heishu reta: Ã'ẽ haipojy pee, vosa ĩmereva tyraha hareka jyve kyrypoti hyru; kyse pukuva mba'etyrea hepyre tovende mondeva, hãrã tova ijupe pente.

³⁷ Hai rãnga pee potanõĩ opa iko shyrehe hekope kavi kuatia mbyparaha vekuapy: “Heko porãmbava rãĩmi rekoha”. Shara opaite he'ia shyrehe vekua, opa iko oho'i.

³⁸ Haire hei: Yreja, kõ'ẽ mokue kyse pukuva. Hai heishu reta: Haima!

Jesús ñymboi Getsemanipe

³⁹ Haivi Jesús õhẽ oho yvyturusu Olivo he'iashuape hai ohoñõĩ'õpe, hãrã mboireare jyraha jyve hipi.

⁴⁰ Vãhẽma jyraha haiperã heishu reta: “Pirure katu, mahẽ peakui pya hã'ãhãva ouperã”.

⁴¹ Mbyry katu ohoshi reta pente ita vasu momboava rãĩmi. Hãrã haipe ĩñesu hareka ñymboirã,

⁴² hei: Sheru, nde ripotarã, mbyhasa shyhevi kova kopa irova. Tẽvã avy tiko she aipotava, koñeĩ tiko nde ripotava.

⁴³ Haipe ijeshakashu pente Tũpa jokueva vate araivi ouva, mỹpyrãntashu verã.

⁴⁴ Hãrã Jesús vyamba japyraha'õpe, ñymyrõĩteve jurure; haivi tykyshi pirie yvype turuvy tivisha rãĩmi.

⁴⁵ Pũãjyma jurure õĩvirã, ohojy mboireare ẽvãpe haipe hesha opa oche, vyamba japyraha retarã,

⁴⁶ hãrã heishu reta: Marã'ĩrãra pechepẽĩ? Pupũã hareka pirure rãngapo, potãã pypya hã'ãrã.

Jesús pysyha

⁴⁷ Jesús ijetateri'ẽ vekua, vãhẽ ou kuareta hetava. Haipe penteva 12 Jesús mboireare Judas he'iashua hỹnonde oushu reta; ñymboja Jesús ẽvãperã hovape pyteshu.

⁴⁸ Jesús heishu: Judas, pente jypytevapera rymeẽ kuareta Tay?

⁴⁹ Jesús ẽẽ hãndiare, heshama mbaivara iko'ẽrã pỹrãndu jyreshu: Yreja, hỹpeñahãrapo reta kyse pukuvapy?

⁵⁰ Haipe pente hairetava, pai ruvisha jokuereirea jasyjashi nambi hyvaisho, jakata kyty'õ.

⁵¹ Jesús hei: Pyma'ẽĩhese, haima. Hãma kuimbai nambi pokoherã, mynguera.

⁵² Haivi Jesús heijyshu reta pai ruvisha hareka tũpao ñyngareko'ihea juhuvishare, hãndi kuakuavare; ou hekavare: Haira she mbai porãmba japo'iva peishe verã kyse pukuva hareka yvyra ryheve?

⁵³ Opa ara rãnga tũpao pe aiko'ai pynymbyteipi, mba'ẽã pijapo shyrehe. Tẽvã kova hai'ora pee pã'ãpova, ora mbaikatu timimbipyva.

Pedro hei Jesús kuambaa

⁵⁴ Hãrã pysyma retarã raha reta pai ruvisha hentape; Pedro mbyryĩ oho'i jyve haykue.

⁵⁵ Haipe oo hỹnonde mbytepetei jatapy retarã vapy juri reta; Pedro vapy'ẽ jyve haire mbytepe.

⁵⁶ Haipe pente taupe jokueharea hesha Pedro vapy'ẽjyve tata hyvacherã, mãĩkavi'ẽherã hei: Koo'ia, hai rãnga iko'i jyve hãndi ka'ãĩ.

⁵⁷ Tẽvã Pedro ñomirerã hei: Taupe, aikuãã rãnga jyveshu.

⁵⁸ Kỹyma'ẽrã yngava heshajyrã, heijy: Nde rãnga haijyve hai ryhevare. Pedro hei: Kuimbai, mba'ety, ha'ẽã rãnga she.

⁵⁹ Pente ora rupima hasarã, yngaa heijyshu: Ãñete rãnga koo'ia iko'i jyve hãndije, hai rãnga jyve Galileava.

⁶⁰ Pedro katy hei: Kuimbai, aikuãnyshe rijetaheva. Haipe Pedro ijeta teri'õ ryheve, uru ñỹrãã.

⁶¹ Hãma Jesús jererã maĩhe Pedro. Haivi Pedro manduahe Ñandeja heishu vekua: “Ndeiteri uru ñyrããrã, mbahapyjypo rerekui shykuamba”.

⁶² Hãma Pedro õhẽ katoaperã, jypavete jaheo'i.

Ñymbyhoryhe reta Jesús

⁶³ Hãrã kuimbaire Jesús ñyngareko'ẽheare, ñymbyhory jyrehe hareka nũpa jyre;

⁶⁴ hesa jokuashi retarã, nũpa jyre hovaipi, pyrãndu jyreshurã hei: “Mbeuno, mbavara ndyrovaipi nũpa?”

⁶⁵ Haipe heta ijeta porããshu reta.

Jesús huvishare hỹnonde

⁶⁶ Kõĩmajyrã, ñymbaty reta karai kuakuavare, hoka tentape'õre, pai ruvishare hareka Moisés mbypara vekua pyrỹmboi'iheare. Haivi raha reta Jesús ñymbatyha'õperã, haipe pyrãndushu reta:

⁶⁷ Mbeu ore, ndera hai Cristo? Jesús heishu reta: Hai rãnga haiperã, shyrojããpopi.

⁶⁸ Mbai apyrãnduperã, pymbe'uãposhe hareka pypoiãvãĩpojy shyhevi.

⁶⁹ Tẽvã, ã'ẽvãĩpo ko kuareta Tay vapykui Tũpa ñymbaikatuva jakata kyty.

⁷⁰ Haivi opaiteva pyrãndushu reta: Akuarã ndera hai Tũpa Tay? Jesús heishu reta: Hai rãnga, pee pereva rãĩmi.

⁷¹ Haipe haire hei: Mbaveama katu heshavare mbeuvejy ñande. Ñandeteiva rãnga ñahendu juruivi heiva.