Lucas 21 - NandevaBiblia

Taupe paveteva ĩme manoshia meẽva

¹ Jesús tũpao pe'ẽrã mãĩ'ẽhe iko katuvare meẽ ñynoĩ ofrenda Tũpaope me'ẽãvare hyrupe.

² Hesha jyve taupe pavete'ia ĩme manoshia veru ñonojyve mokue nikeremi,

³ hãrã hei: Añeteĩteva hai pee, ko taupe ĩme manoshia pavete'ia, hetavee meẽ opava retaivi.

⁴ Shara opaiteva hembyshuvare veru meẽñynoĩ, tẽvã kova pavetete'ia opaĩ meẽ karutẽhe verã.

Jesús mbeu tũpao opa ñymbai verã

⁵ Hãrã a'ãmore ijetahe tũpao ita mashỹãva reta mbijevahapya hareka maĩnunga mymashỹ'ãhava Tũpa pevarã me'ẽãva hyrupe, hãrã Jesús hei:

⁶ “Kova mbai pymãĩ pẽĩheva hai pee, vãhẽpokui ara opa ñymbai verãpe, pente ita jyvohy'õmba ñymbou'ẽ verã”.

Mbai heshaha verã ara japyserimãrã

⁷ Hãrã pyrãndushu reta heireta: “Pyrỹmboi'ia, mbaiperapo ikokui kovare? Hãrãra mbaiva mbai heshaha verã ẽpokui kova mãĩnũnga ikoma potãrã?”

⁸ Hãma hai heishu reta: Pymãĩ avy piñymbytavyka; shara hetapo'ẽ shyreepe ou heiva: “She hai Cristo, hãrã: Ko hai ara vãhẽpotamãrã”. Tẽvã avypo peho hipi.

⁹ Pyhendupo ñyrãrõ vasu iko hareka pũã ijehevarã; avy pykyje. Shara kova reta hai tynonde iko verã, tẽvã vahẽateripo japy verãpe.

¹⁰ Haipe heivejyshu reta: Opapo tenta vasure pũã ijehe, hareka huvisha vasure opapo ñyrãrõ ijupi;

¹¹ õĩpo yvyryry vasu, ñymbahy hareka mbairasy opa rupi, hãrã mbai ñanyngyjeva hareka mbai heshaha verã jykuaapo vate arare.

¹² Tẽvã ndei kova ikorã pypysyapo, hareka pynymoñahãpo, pynymbyperesoa verã hareka pinimĩjeha verã Judiore ñymbatyseape huvisha vasure hareka huvisha vasu mbory'õre hỹnonde, shyree rehe.

¹³ Kyrãrã pyrekoñoipokui pymbeushu verãre.

¹⁴ Avypo pejepy'apy pypya pimbijetarã marãrapo pijeta pijochashi verã.

¹⁵ Shara sheepo ameẽpekui ñee hareka mbaikuaa, katumba pyndyvaishore jepy pyndyrehe verã.

¹⁶ Hãrã peru retaavepo pũã pyndyrehe, pyndyryvyre, pynyrẽtãre hareka pini'ĩrũre: Ĩmepo'ẽjy a'ãmore peeva pindijukava.

¹⁷ Opaite yvy jerekueipi pyndyreshatããpo shimimboiperã rehe.

¹⁸ Tẽvã penteãpo pãkahaa oñehundi pyndyhevikui.

¹⁹ Tãtãkatu peĩrã, peojepepokui.

²⁰ Pyheshama Jerusalén opa mangora ñyrãrõse'ia retarã, hãma pikuaapo vãhẽma ara opa õñehũndi verã.

²¹ Hãma Judeape'õre tĩvãhe yvyturusure; hãrã Jerusalénpe'õre tõhẽ haivi, hãma ñuuhupi õvare avy toujy tiche hokava tentape.

²² Shara jahehahe verãre jy'arapo, iko verã hekope kavi Tũpa ĩñeepe heiva rãĩmi.

²³ Tengapokui taupere purua'ia hoka arape, hareka memby kambu'iare! Shara ẽẽpo jyhasa'asy vasu yvy'ĩãrẽ hareka ñunũpa pohyva kova tentare.

²⁴ Ĩme'ẽ mano verã kyse pukuva hãĩmbepe, hãrã ĩrũre rahahapo pokuahavape yngavare tentaipi, hareka kuareta jyrojambare opapo mambai Jerusalén, vãhẽpeve Tũpa heishuvape hareka mby'opa verãre.

Kuareta tay oujymarã

²⁵ Hãma ẽẽpokui mbai heshaha verã kuarasyre, jasyre, hareka jasytatare, hareka yvy'ĩãrẽ kuaretare opapo vy'ãã reta hareka opapo kuããpy reta yyvasu hy'apua porãmba ñupũãva rehe.

²⁶ Kuaretare opapo pyamano kyjekueivi, pya mbijeta ñynoĩ kova mbai yvy'ĩãrẽ ou verã; shara ara vatepy'õre imbaretekue opapo õmỹ.

²⁷ Haipe heshapo reta kuareta Tay oujyma ãvãpỹtupyrã mbaikatukuepy hareka tivisha hĩmbipekue ryheve.

²⁸ Hãma kova mbai õñepyrõma ikorã, pimykyrẽỹ hareka pãka pumũpũ'ã, shara kõõima ou mbyhepya pyndyrehe pynynohẽajy verã.

²⁹ Mbeujyshu reta pente ñee ñymyhã'ãnga: Pymaĩhe yvyra igo hareka opaite ynga yvyrare.

³⁰ Pyheshama hokymapo'ẽrã, pikuaama vãhẽserima ara haku'i verãpe.

³¹ Kyrãipo jyve pee pyhesha kova opa mbai ikorã, pikuaapo Tũpa ẽvãpe'õ ryheva vãhẽserimarã.

³² Añetevape hai pee, opañõĩpo iko kova mbai ndeiteri kuareta ã'ẽvare opa manorã.

³³ Ara vate'õre hareka yvy opañoĩpo hasa, tẽvã shiñee hasããpohai opa arape.

³⁴ Pĩngareko pindijehe, avy pyheja pyndypya pymytãntahe tykove porãmbavapẽĩ, kauva hareka jepy'apy ko yvy'ĩãrẽ'õre, mahẽ sapy'ãĩ vãhẽ pearẽkui hokava ara,

³⁵ shara mbai pyrỹmbo'apya rãĩmipo oukui hokava ara, opaiteva kuaretare yvy'ĩãrẽ ẽva retape.

³⁶ Pingareko pindijehe, hareka pimbo'e opa ara, peojepeshi verã ko mbai iko verã, hareka haikavi pẽĩverã kuareta Tay hỹnonde.

³⁷ Jesús arapeave pyrỹmboi tũpao pe; tẽvã pynturã õhẽ oho yvyturusu Olivo he'iashuape.

³⁸ Hãrã opaiteva kuaretare ko'ẽĩ jyverumajy hai ẽvãpe, hendushu verãre tũpao pe.