Lucas 20 - NandevaBiblia

Jesús ñymbaikatu

¹ Pente arape, Jesús mboi'ẽshu kuaretare tũpao pe hareka mbeu Ñee kaviva ryheva pyrỹmondo jepeva, vãhẽ jyveru pai ruvishare hareka Moisés mbypara vekua pyrỹmboi'iheare, hãndi karai kuakuavare.

² Hãrã heishu reta: Mbeu'ore mbaiva mbaikatu rupiira rijapo kova? Maĩrã, mbavara meẽ nde hokava mbaikatu?

³ Haipe Jesús heishu reta: She apyrãndupo jyvepe pente mãĩnũnga; pymbeushe,

⁴ mbavara mboushu Juan pyrỹmyngarai'i verã, Tũpa maĩrã kuaretare?

⁵ Haire õñepyrõ ijeta ijupi retarã hei: Mãrãrapo jaishu? Tũpa jairã, heipo ñande: “Marã'ĩrãra akuarã pyrojããmbashu?”

⁶ Hãrã kuaretare jaijyshurã, ko kuaretare ẽvã rãĩmi opapo pũã ñandyrehekui hãrã itape ñandukapo retakui; shara opavare roja Juan haiva Tũpa ĩñee mbeu'iarã.

⁷ Hãrã hei reta: Kuahaany, mbavara mbou Juan pyrỹmyngarai verã.

⁸ Jesús heishu reta: Akuarã ambe'uãpo jyvepe mãrãva ñymbaikatu rupiira ajapo kova mãĩnũngare.

Ñimĩty'iare heko porãmbava

⁹ Haivi õñepyrõ ijetaheshu kuaretare kova ñee ñymyhã'ãnga rupii: Pente kuareta ñoty uva jy'yvype, haivi porykashu jokuevare ju'uvarẽnda. Hãrã heta ara mbyry oho hentaivi.

¹⁰ Hãrã vãhẽma ara, uva'ia myno'õhãvaperã, mondo pente jokuehareirea ju'uva rẽndape, ña'ãpõva uva'ia verushu verã; tẽvã hetama nũpa reta hoka jokuehareirearã, iporãĩ mondojy reta.

¹¹ Haivi koo ijarã'õ mondojy ynga jokuehareirea; tẽvã hokavape heta nũparã hareka mbaimbashuva rãĩmi japo retarã iporãĩ mondojy reta.

¹² Haivi hykuaĩ mondojy mbahapyhea; tẽvã mba'apo õre opa mbypepererã mohẽjy reta haivi.

¹³ Kõñẽmahea uva rẽnda ija hei: “Mbaivarapo ajapo? Ãmondopo shyray ahaihuva; katupo hai mba'ẽã japohe retakui”.

¹⁴ Tẽvã mba'apo iare heshama retarã, heijyre ijupe: “Kova hai koo ijarã; jajuka, typyta ñandekui kova ña'ãpõrãtẽ vekua”.

¹⁵ Hãrã nohẽ reta uva rẽndaivirã, juka reta. Mbaivarapo akuarã pimõã japohe reta koo ijarã'õva?

¹⁶ Ohorapo opa jujuka mba'apo'õva retape, hareka meẽraposhu ju'uva rẽnda yngavape. Haire henduma kovarã hei jyre: Avy kyrããva tiko!

¹⁷ Tẽvã Jesús maĩhe retarã hei: Akuarã, mbaivara he'ise Tũpa jykuatia mbyparavape ẽvã? Kyrã heiva: “Ita vasu, oo japose'iare mbijiche vekua rãnga ã'ẽ koñemahẽa ikoshi oo jypyrã”.

¹⁸ Shara ĩmerãẽã oava hokava ita ĩãrẽ, opaĩpo jejeka; hareka ĩme'ẽ oahevarã opa kavipo mungui.

Tũpa ña'ãpova hareka huvisha vasu ña'ãpova

¹⁹ Hãrã pai ruvishare hareka Moisés mbypara vekua pyrỹmboi'iheare haipevãĩ pota pysyka jyre Jesús, shara kuaa mondo he'iha ñynõihe kova ñee ñymyhã'ãngaperã; tẽvã japoã reta shara kyje jyreshi kuaretare.

²⁰ Hãrã mondoshu reta kuimbai ñemiapeĩ mãĩ verã heko kavi rã'ãngava, sapy'aĩ ityshu verãre ĩñee rehe, haivi meẽ verã huvishavasu mbory'õre.

²¹ Hãrã kuimbaire ñemiapeĩ mãĩ'iare pyrãndushu Jesús: Pyrỹmboi'ia, kuaaha rãnga rereva hareka rỹpyrỹmboiheva haikavirã, rỹmãĩmbava mãrãvara hai, koñeĩ añetevape rỹpyrỹmboihe Tũpa hape.

²² Mbeu ore: Õĩñoira mbyhepyashu verã mburuvishavasu Cesar, maĩrã mba'ety?

²³ Jesús kuaaĩ'ẽ pota ityrea kyrã hei ñynoĩshurã. Hãrã heishu reta: Marã'ĩrãra pota shiñonovaipi?

²⁴ Shymbyheshakapi pente nikere. Mbava ha'ãngara hareka mbava heera ẽhe? Haire heishu: Mburuvisha vasu Cesar.

²⁵ Jesús heishu reta: Pymeẽshu huvisha vasu Cesar ña'ãpova; hareka Tũpa pymeẽshu Tũpa ña'ãpova.

²⁶ Hãrã vãhẽãshu reta ñee ityshu verã kuaretare hỹnonde; koñeĩ mbyrymaĩhe reta Jesús heiva, hãrã jasakaĩ reta.

Jesús ijeta hãndi Saduseore

²⁷ Haivi Saduseore vãhẽ jyveru Jesús ẽvape haireta rãnga hei: “Mba'ety manova mbyteivi puãjy verã”. Hãrã heishu reta Jesús:

²⁸ Pyrỹmboi'ia, Moisés rãnga mbypara heja ore kuatiape: Ĩme'ẽ pente kuimbai manorã, hyreko mymembyã hejarã, tyvyĩpo omendajyhe, mimoñashu verã tichey mano vekua.

²⁹ “Shara ĩmemba'ẽ 7 kuimbai pente'ovare; tynõndeva omendarã, tẽvã manomba hĩjapombateriva.

³⁰ Haivi tyryvy mokuehea omendajyhe taupe ĩme manoshia, hãrã hokava mano jyve hĩjapomba ryheve.

³¹ Haivi mbahapyhea tyryvy kyrãmĩjy; hãrã 7 õva kuimbaire opa mano hĩjapomba vekuare.

³² Hãrã kõñemahea taupe mano jyve”.

³³ Hãma manovare kuerajyva arape, mbava hyrekorãrapokui ko taupe, shara 7 ia kuimbaire opaĩmba rekotẽ?

³⁴ Hãrã Jesús heishu reta: Yvy'ĩãrẽ kuimbaire hareka taupere omenda.

³⁵ Tẽvã Tũpa kuaapo mbava retarapo mbyhykovejykui; kova jehurã mbaveãmapo kuimbai hareka taupe omenda ijehekui

³⁶ shara hykove japyvẽãmapo, Tũpa jokuevare rãĩmimapo hareka Tũpa tay hareka tajy rãĩmimapo, shara Tũpa opa mynguerajyshu reta.

³⁷ Moisés teiva rãnga kuatia ñeepe ohohe heiva rãĩmi vycheri hãkã hendy õĩvi, kuaaka ñande manovare kuerajy verã. Haipe rãnga hei: Ñandeja; Abraham, Isaac hareka Jacob ñu Tũpa.

³⁸ Tũpa ha'ẽã manova ñu Tũpa, koñeĩ hykove'iare ñu Tũpa; hai pevarã opavare hykoveshu verã.

³⁹ Haipe a'ãmo Moisés mbypara vekua pyrỹmboi'iheare heishu: Pyrỹmboi'ia, haikaviny rereva rãĩmi.

⁴⁰ Haipe mbaiveama kyrẽy pyrãndushu reta.

Mbava tayra Krito?

⁴¹ Hãrã Jesús heishu reta: Mbaiva rupiira he'iahe Cristo, David tayva?

⁴² Shara David teiva hei kuatia Salmope: Hei Tũpa, Shejape: “Vapy shakata kyty,

⁴³ añonopeve ndyvaishorã'iare ndepy ẽvãpe”.

⁴⁴ Marãrapo Cristo David tay, ko David teiva heishu “Sheja”?

Jesús mbeu mãrãva retara Moisés mbypara vekua pyrỹmboi'iheare

⁴⁵ Hãma opava kuaretare hendu ñynoĩrã, Jesús heishu mboireare:

⁴⁶ Pingareko pindijeheshi Moisés mbypara vekua pyrỹmboi'ihea retaivi, haire pya'ohe mondeva puku ryheve, pota vataha õĩpi marãnduhashu karai vasure rãĩmi; haire heka vapyhapya tynonde'õ Judiore ñymbatyseape hareka karuvasu õĩpi.

⁴⁷ Hãma ĩme manoshi vekua hoore heky jyreshi, hãrã ñemipy verãre puku rã'ãnga ñymboi reta. Kovare hetaveepo nupãhãkui.