Lucas 2 - NandevaBiblia

Jesús oarã

¹ Hokava arape, õhẽ kuatia huvisha Augusto Cesarvi, iko verã opaite kuaretare oho mbyparaka verã hee kuatiape hareka oa vekuape.

² Kova tyree mbyparaha verã kuatiape tynondeite japoha Cirenio huvisharã teri'ẽrã Siriape.

³ Haivi opavare ohojy henta retaipi hee ñonoka verãre kuatiape.

⁴ Hãrã José õhẽ tenta Nazaretvi, yvy Galileape'õ, oho Belenpe Judea kyty huvisha vasu David oa vekuape, heshara José hai David ñymoña hãndiare.

⁵ Hãrã jyraha ñonoka verãre hee kuatiape hãndi hyreko Maria, purua'ia.

⁶ Hãrã Belenpema ĩme ñynoĩrã, vãhẽ Maria memby verãpe.

⁷ Haipe oashu memby tynondeva, hareka tarapopy ñoma, haivi miñenopy pente mymbare karuseape shara mba'ety ẽ verã retape.

Tũpa jokuevare hareka avisha ñyngareko'iheare

⁸ Belen hyvache mbovy ĩme ñynoĩ avisha ñyngareko'iheare, ñuupe jy'avishare ñyngareko ñynoĩheva hoka pyhare pukukue.

⁹ Mondii ijeshakashu reta pente Tũpa jokueva, haivi Ñandeja hĩmbipekue sape juri reta, hãrã opa kyje reta.

¹⁰ Tẽvã Tũpa jokueva heishu reta: Avy pykyje; aru pee mãrãndu haikaviva, opavare mbyvya verã.

¹¹ Ã'ẽ oaje David hentape pente pyrỹmondo jepe'i verã, hai Cristo, Ñandeja.

¹² Kovapo hai pente mbai heshaha verã pyhesha verã: Pyheshapo pente sanjay ñomahava tarapope, hareka mĩñenohã pente mymba karusevape.

¹³ Haipe mondii ijeshaka Tũpa jokueva hareka ĩrũre hetava hãndi vate araivi, Tũpa pyrahe ñynoĩshurã hei reta:

¹⁴ Toñemombai vasu Tũpa, vatevevape, hareka yvy'ĩãrẽ kuaretare tiko kavi ijupive Tũpa haihuvare.

¹⁵ Hãrã Tũpa jokuevare jyrahajyma vate arapyrã, avisha ñyngareko'iheare hei ijupe: Jaha Belenpe ñamaĩhe ko Ñandeja ñanymbykuaaka'õva.

¹⁶ Hãrã avisha ñyngareko'iheare nare'ãite jyraharã hesha reta Maria, José hareka sanjaymi ñeno'õ mymba karusepyape.

¹⁷ Heshama retarã õñepyrõ mbeu Tũpa jokueva heishua reta rãĩmi ko sanjay rehe.

¹⁸ Opaite henduvare mbyrymaĩ avisha ñyngareko'iheare heiva.

¹⁹ Maria pyapẽĩre opaite kova mbai ñee hareka py'ãĩ mbijetarehe.

²⁰ Avisha ñyngareko'iheare jyrahajy retarã, vy'akue ryheve õmombairã pyraheshu Tũpa, shara Tũpa jokueva mbeuva rãĩmi opa hesha hareka hendu reta.

Jesús rahaha mbishakaha tũpao pe

²¹ Hãrã 8 aravape piremi chinchiashi sanjay, haivi ñonohẽ reta tyree Jesús, Tũpa jokueva heishuva rãĩmi Maria, ndeiteri puruarã.

²² Hãrã vãhẽma ara haire ñymbyhaikavi verãpe, Moisés mbypara vekua heiva rãĩmi, raha reta hokava sanjay Jerusalénpe mbishaka verãre Ñandeja hỹnonde.

²³ Kyrã japo reta shara ñee mbyparahava Ñandeja jykuatiape kyrã heirã: “Opaite sanjay tynonde oava kuimbairã, mbijichehakañoĩpo Ñandeja pevarã”.

²⁴ Hareka meẽjy reta pente me'ẽhãĩva ñee mbyparahava vekua Ñandeja jykuatiape heiva rãĩmi: Mõkue pukui, mairã mõkue pykasuray.

²⁵ Hokava arape Jerusalénpe iko'i pente kuimbai heko kaviva Simeón he'iashua. Tũpa õmombaiva hareka harõ'iva Israel mupu'ãjy verã. Espiritu Santo ẽẽ hãndi.

²⁶ Espiritu Santo kuaakashu manombateri verã Cristo Ñandeja ndeiteri hesharã.

²⁷ Hãma Simeón oho tũpao pe Espiritu Santo kyrã heishurã. Hãrã sanjay Jesús tuu hareka ishy raha reta tũpao pe japo verã Moisés mbypara vekua heiva rãĩmi.

²⁸ Simeón hupi sanjay hãrã ohovasa Tũpaperã hei:

²⁹ “Ã'ẽ, Sheja, ma'ẽĩhe kapyryĩ tamano, shara rijapoma rijokuerei ryreape rerevekua.

³⁰ Aheshama shyresa petei pyrỹmondojepe verã,

³¹ ndee rymbouva hareka opaite tentare heshapo.

³² Sape mykõĩhe verã haimba Judiore, hareka nyrẽta Israel mihimbipe verã”.

³³ José hareka Jesús ishy mbyrymaĩ reta Simeón heiheva sanjay.

³⁴ Simeón meẽshu reta jyhovasa, hãrã heishu Maria, Jesús ishy: Tũpa mbou ko sanjay heta Israelpe'õre ohojepe verã, hareka yngavare jaheahe verã. Haipokui pente heshaha verã hareka hetapo'ẽkui ñymbyvaishoheva.

³⁵ Ãñete kyrãpo kuaahakui pepenteĩ pya mbijeta'iva. Hãrã nde Maria, kova ndyreko asypo kyse pukuva ndypyape kutuava rãĩmipokui.

³⁶ Haipe ẽẽ jyve pente taupe kuakuamava Tũpa ĩñee mbeu'ia Ana he'iashua, Penuel tajy, Aser ñymoña hãndiare. Kuakuamava; Kuñataĩ ray ryheve omendava, 7 ãño ĩme iko'i hãndiva,

³⁷ tẽvã japoma 84 ãño ĩme manoshia. Õhẽmbava tũpao vi, ara hareka pyhare karumbava, ñymbo'e Tũpape õmombairã.

³⁸ Hãma akuapevaĩ Ana oujyve hãrã õñepyrõ meẽ gracia Tũpape hareka ijetahe sanjayre, opaite harõ'õva retape mupu'ãjy verã Jerusalén.

Sanjay Jesús Nazaretpe rahahajyrã vekua

³⁹ Hãma opama japo ñee mbyparahava Ñandeja heivarã jyrahajy Galileape, hentare Nazaretpe.

⁴⁰ Hãma sanjay syry oho hareka pyrãta, mbai kuaave oho seve, hareka Tũpa maĩkavihea ryheve.

Sanjay Jesús Tũpaope

⁴¹ Japoare jyrahañõi ãñomajyrã areterã Pascuape, Jerusalénpe.

⁴² Hãrã Jesús 12 ãñomã mbotyrã, opa jyraha reta Jerusalénpe jypykuaava rãĩmi hoka aretepe.

⁴³ Tẽvã arete opamarã haire ohojyma henta kytyrã, mõndimba sanjay Jesús pyta hai Jerusalénpe japoare kuaambape.

⁴⁴ Moãte Jesús oho'ive hetavare mbyteipirã, tuu hareka ishy pente ara kavi vata reta; haivi heka hentarãre hareka kuaavare mbyteipi;

⁴⁵ tẽvã heshajyvyã reta. Hãma jyraha hekajy reta Jerusalénpe.

⁴⁶ Haivi mbahapy aravape vãijyshu reta Jesús, tũpao pe vapy'ẽ Moisés mbypara vekua pyrỹmboi'iheare mbytepe, Jesús jasaka ñynoĩhe reta hareka pyrãndu ñynoĩshu.

⁴⁷ Opaite hendushuare mbyrymaĩ reta, mbai kuaakue ĩmerea rehe hareka mbyhovai kaviterã.

⁴⁸ Japoare heshamarã mbyrymaĩ reta; hãrã ishy heishu: Shymemby, marã'ĩrãra kyrãri yryhevi? Nderu hãndi hetama ndyrekaha vy'ambaa ryheve.

⁴⁹ Jesús heishu reta: Marã'ĩrãra shyrekapi? Pikuããra aiñoĩ verã Sheru ña'ãpovare ẽvape?

⁵⁰ Tẽvã haire kuãã mondo mbaivara he'ise hokava hei'ẽshuvare.

⁵¹ Haivi Jesús oujy hãndi reta Nazaret kyty, iko'iape japoshu reta hai heishuare. Tẽvã ishy pyape opa nãtu kova ñee.

⁵² Jesús syry oho'i mbai kuaakuepy hareka puku oho'iseve hareka Tũpa maĩkavihea ryheve hareka kuaretare jyvy'akue ryheve.