Lucas 19 - NandevaBiblia

Jesús hareka Zakeo

¹ Jesús iche oho Jericoperã hasa oho tenta mbyteipi,

² haipe ĩme'ẽ pente kuimbai Zakeo he'iashuva iko katuva, tenta mbyhepyre meẽva okora'ia juhuvisha.

³ Õñehã'ãpaite'i potaite hesharã mbara Jesús, tẽvã kuareta hetaiterã katuã hesha hareka puku'ãĩterã.

⁴ Hãrã ñani tynonderã, jupipy pente yvyra sicomoro he'iashuare hesha verã, shara Jesús haipipo hasa oho.

⁵ Jesús vãhẽma haiperã, hesharã heishu: Zakeo, nyrẽ'ãĩte vejy, shara ã'ẽ nyrẽtapepo aha apytakui.

⁶ Zakeo vejyravĩ hãrã horype myvãhẽshu Jesús.

⁷ Hokava heshama retarã opaiteva ijeta porãã jyrehe, hei reta kuareta heko porãmbava hentape oho pytava.

⁸ Tẽvã Zakeo ñymboyrã, heishu Ñandeja: Ã'ẽ kope, Sheja, ambijaopo ĩme'arevare mbyteipi ameẽposhu pavete'iare, hareka ĩme'ẽ mbava ahekyreiishi vekuarã, urũndypo ĩãrẽve ameẽjyshukui.

⁹ Jesús heishu: Ko arape vãhẽ ohojepeva ryheva kova oope, shara ko kuimbai hai jyve Abraham ñymõña hãndia.

¹⁰ Shara Kuareta Tay ou heka hareka mondojepe verã kañy vekuare.

Ñymyhã'ãnga kyrypoti ryheva

¹¹ Haire hendu reta kovarã, Jesús mbeujyshu reta pente ñee ñymyhã'ãnga, shara mbyryvẽãma'ẽshi Jerusalén, hareka haire pya mbijetajyrehe Tũpa ẽvãpe'õ ryheva aremba heshaha verã.

¹² Hãma hei: Ĩmemba'ẽ pente kuimbai mbai vasuva mbyry ohova ynga tenta kyty, mbyheaa verã huvisha vasurã, hãrã oujypo.

¹³ Hãrã ohoserimarã, hẽno 10 jokuehareirea hareka meẽshu 10 kyrypoti, mymba'apoka verã, hãrã heishu: “Pymymba'apokakui kova kyrypoti aijypeve”.

¹⁴ Tẽvã henta ĩrũre heshatãã, hãrã mondo reta hai haykue heihe verãre: “Potahãã kova ururuvisharã”.

¹⁵ Tẽvã mbyheaha huvisha vasurã. Vãhẽjyma ourã hẽnoka jokuehareirea kyrypoti meẽshu vekuare, kuaashi verãre pepenteĩ mbovyra mimoña reta mymba'apo vekuare.

¹⁶ Tynonde ouva heishu: “Sheja, ndykyrypoti amimoña 10 ĩãrẽve”.

¹⁷ Mburuvisha vasu heishu: “Haikavite, mishĩtẽvãra hai nde jokuehareirea heko kaviva, arỹmbyhepokui huvisharã 10 õ tenta vasu ndepope'ẽ verã”.

¹⁸ Mokuehea ourã, hei: “Sheja, ndykyrypoti amimoña 5 ĩãrẽve”.

¹⁹ Mburuvisha vasu heishu: “Ndepope añonopo jyve 5 tentare”.

²⁰ Yngava oujyrã hei: “Sheja, kope'ẽ ndykyrypoti. Ãnãtuĩ rãnga are pente tarapomipy,

²¹ akyje ndyhevirã, shara nde hai kuimbai mbai potañoĩ japohashua, ryhekyjyva riñonombatẽva; hareka rỹmỹnõõjy rĩñotymbatẽva”.

²² Haipema huvisha vasu heishu: “Nde hai jokuehareirea heko porãmbava, niñẽ'ẽkue rupiiĩpo arĩmbivacheka. Rikuambatẽ she hai kuimbai mbai potañoĩ japoashuarã, ahekyjyva añonombatẽva, hareka ãmỹnõõjyva añotymbatẽva;

²³ mãrã'ĩrãra akuarã ryrahããmba shykyrypoti natũhãseape, aijymarã aijetahe verã mimoñahã vekua?”

²⁴ Hãrã heishu haipe'õre: “Pyhekyshi hokava kyrypoti, hãrã pymeẽposhu 10 kavi ĩmerevape”.

²⁵ Hãrã haire heishu: “Sheja, 10 iarẽvema rãnga ĩmerehai”.

²⁶ Mburuvisha vasu hei: “She hai pee, ĩmereva ĩãrẽvepo mẽ'ẽhajyshu; tẽvã mba'etyreva, mĩshĩĩ ĩmetereva hekyajyposhi.

²⁷ Katynga shyresha tamba'iare, potamba huvisharã shiñono vekuare, peru kope hareka shynondetei pijasyjashi reta ñaka”.

Jesús iche Jerusalénpe

²⁸ Jesús opama hei kovarã, oho Jerusalén kyty.

²⁹ Vãhẽserima Betfage hareka Betaniaperã, yvyturusu Olivo he'iashuva jykoty, mondo mokue mboireare,

³⁰ heishu reta: Pekua hoka tenta ñanynonde'õpe; pyvãhẽmarã pyheshapo pente mbirika ray ñapĩtĩhava. Mbavamba teri opoheva, pijora perukui.

³¹ Ĩme'ẽ pyrãndupearã: Marã'ĩrãra pijora? Pereshukui: “Ñandeja rãnga ikotẽvẽhe”.

³² Jyraha retarã, hãrã vãhẽshu reta Jesús heishua rãĩmi.

³³ Hãrã jorama ñynoĩ mbirikamirã, ijare pyrãndu jyreshu: Marã'ĩrãra pijorapeĩ mbirika ray?

³⁴ Haire heishu: Ñandeja rãnga ikotẽvẽhe.

³⁵ Haivi rahashu reta Jesús; hãrã mombohe reta mondeva'ĩãrẽ'õ pukuva mbirika rayrerã, mbijupihe reta Jesús.

³⁶ Hasama oho'irã, kuaretare mbipyso reta oho verãipi mondevare.

³⁷ Kõõma oho vejy'ova yvyturusu Olivo kytyrã, opaite mboireare vy'ape sapuke hareka pyraheshu reta Tũpa, opava mbaikavi heshaha verã japo'i vekua rehe,

³⁸ hei reta: Tyma'ẽãkavihe Mburuvisha vasu Ñandeja heepe ouva! Pyavapy tõĩ vate arapy hareka tõmomba'eha vatevevape!

³⁹ A'ãmo fariseore, kuaretare mbytepe ẽvãre heishu Jesús: Pyrỹmboi'ia, jochami rymboiryreare!

⁴⁰ Tẽvã Jesús heishu: Haipo nde kovare jasakarã, ita retaavepo sapukekui.

⁴¹ Haivi vãhẽma jyraha Jerusalen hyvacherã, Jesús hesha hokava tenta, hãrã jaheo,

⁴² hei: “Aipotanytẽ ã'ẽ rikuaa, mbaivara verunde pyavapy! Tẽvã ã'ẽ ndyresare katuã ryhesha.

⁴³ Vãhẽpondekui ara opaite ndyvaishorã'iare, mũpũã verã ijojahapya ndijerekue, nymangora hareka opaivi ndopy verã;

⁴⁴ haivi opa nehũndi verã. Juka verã opaiteva iko'ipyare; hejããpondekui pente ita jyvohy'õva; shara rikuãã Tũpa outẽ nymondojepeva”.

Jesús hareka tũpao pe mavẽnde'õre

⁴⁵ Jesús iche tũpao perã, õñepyrõ mohẽ haipe mavẽnde hareka mba'ova õre,

⁴⁶ hãrã heishu reta: Kuatia mbyparavape rãnga Tũpa hei: “Shero hai oo ñymbo'eha ipe verãĩ”. Tẽvã pee pijaposhi manarõ'iare ikua!

⁴⁷ Hãma opa arape Jesús pyrỹmboi tũpao pe; haivi pai juhuvishare hareka Moisés mbypara vekua pyrỹmboi'iheare, hareka karaire hokava tenta huvishare, hekajyre marãrapo juka reta.

⁴⁸ Tẽvã katuã mbaiva japohe reta, shara kuaretare jasaka kavi ñynoĩhe.