Lucas 18 - NandevaBiblia

Ĩme manoshia hãndi pirĩmbivachese'ia

¹ Jesús mbeushu reta pente ñee ñymyhã'ãnga mboishu verãre, ñymboiñoĩ verãre, hareka ñymykangymbape.

² Heishu reta: Ĩmemba'ẽjy pente tentape huvisha pirĩmbivachese'ia Tũpa kyjemba'ishia, hareka kuaretare.

³ Ĩmemba'ẽ jyve hokava tentape pente taupe ĩme manoshi vekua, ohoñoĩva hai ẽvãpe heishu verã: “Hekope kavi ñonojyshe aivavy hãndia shymymorãmba'iare hãndi”.

⁴ Heta ara ko huvisha pirĩmbivache'ia ñatẽy japo jurureashua, tẽvã hei pyape: “Ajema Tũpa akyjeãshi hareka mba'eãjyshe shapisha,

⁵ tẽvã ko taupe ĩme manoshi vekua shymãgãtu'ãĩte, hãrã ahepyposhu, mãhe hykũãi oujykui shymynguerepeve”.

⁶ Ñandeja heivejy: Pyhendu huvisha pirĩmbivachese'ia heko porãmba'ia heiva.

⁷ Hãmera Tũpa hepyãpojyve jyrojahea, jurureñoĩ'ishuare ara hareka pyharekue? Kỹỹrapo hãrõshu mbory verã?

⁸ She hai pee; areãpo ou mbivachekashu reta. Tẽvã ko kuareta Tay vãhẽma ara oujy verãperã, heshara teripokui ko yvy'ĩãrẽ kuareta jyrojava?

Ñymyha'ãnga fariseo hareka henta õre mbyhepyva okora'ia ryheva

⁹ Jesús mbeujyshu ko ñee ñymyhã'ãnga a'ãmore jyroja'i ijeheva pevarã, moãtẽ heko kavirã mymorã'i hapishare:

¹⁰ Mõkue kuimbai oho tũpao pe jurure verã: Pente hai fariseo, ĩrũ hai kyrypoti mbatyse'iare Roma pevarã.

¹¹ Fariseo ñymboy'õpe kyrã jurure: Tũpa, ameẽnde shy'ajetekue shara ha'ẽãshe yngavare kuaretare rãĩmi aikova: Manarõ'iva, heko porãmba, ynga pota ijya, hareka ha'ẽãshe ko kyrypoti mbatyse'iare Roma pevarã rãĩmiva.

¹² She karumba ryheva ajapoñoĩ mõkue ara pente semanape, hareka ameẽ diez'õvaivi pente opaite apityvaivi.

¹³ Tẽvã kyrypoti mbatyse'iare Roma pevarã mbyryĩ ñymboy'i, õĩmbashua vate arare mãĩ verã, koñymãi pitiape nũpa'irã hei: “Tũpa, shyparekomĩtẽ, shara she hai heko porãmba!”

¹⁴ Hãrã she hai pee ko henta'õre mbyhepyva okora'ia ohojy hentape Tũpa hejareiimashia mbai porãmba vekua. Tẽvã fariseo kyrãã hai. Hãma ĩme'ẽ ha'eii vateve iñiñono'iarã, mbaimbava rãĩmipo japoha, tẽvã õñemomishĩĩvã, vatevepo ñonõha.

Jesús hareka sanjaymire

¹⁵ Haivi veruhashu Jesús sanjaymire ipo ñonohẽ verã hareka mãi kavihe verã. Hãrã mboireare hesha hokavarã poshy ryheve ijetashu sanjay veru'õre.

¹⁶ Tẽvã Jesús hẽno sanjay retarã hei: Pyma'ẽĩhe sanjaymire tou shykoty, avy pijocha, shara haire ña'ãpova hai Tũpa ẽvãpe'õ ryheva.

¹⁷ Añeteva hai pee, Tũpa jyrojambahea pente sanjay japova rãĩmi, ha'ẽã iche verã Tũpa ẽvãpe.

Kunumi ikokatuva

¹⁸ Pente huvisha pyrãndushu Jesús: Pyrỹmboi'ia pya kaviva, mbaivarapo ajapo apity verã tykove opambava?

¹⁹ Jesús heishu: Marã'ĩrãra rereshe pya kaviva? Mba'ety rãnga pya kaviva, koñeĩ'ẽ Tũpa.

²⁰ Nde rikuaa ñeẽ japoa verã: “Avy ynga jyrekomava pokojyhe, avy puruka, avy manarõ; avy ijeta porãhe ndapishare; japoshu nderu hareka ndesy heiva”.

²¹ Hokava kunumi hei: Opaite rãnga kovare ajapo shyndei airãvãĩ.

²² Jesús hendu hokavarã heishu: Pente mbai, mba'etyteri nde; opa evende ĩmeryreare haivi hepykue memeẽshu pavete'iare, hãmerãpo ripitykui rikokatu verãpe vate arapy. Haivi ei shimĩ'ĩrũ.

²³ Tẽvã ko kunumi kyrã hendurã mbasy'i, shara ikokatuvamba hai.

²⁴ Jesús heshama marãra mbasy'irã hei: Javaiveeposhu hai ikokatuvare iche verã Tũpa ẽvãpe.

²⁵ Javaĩãposhu hai kamello hasa verã juu sakuaipi, ikokatuva ichetẽ verãivi Tũpa ẽvãpe.

²⁶ Henduvare, pyrãndu reta: Mbavarapo akuarã ohojepekui?

²⁷ Jesús mbyhovaishu reta: Kuaretare javaishuva Tũpa pevarã javaĩãshu hai.

²⁸ Pedro heishu: Sheja, ore rãnga opa hejaha yrã'ãpovare oua ndipi verã.

²⁹ Jesús heishu: Añetevape hai pee, ĩme'ẽ hejava hoo, maĩrã tuu, tyvyre, hyreko, hareka tayyre Tũpa ẽvãpe'õ reherã;

³⁰ hetavepo mẽ'ẽajyshukui opa heja vekuaivi ko yvy'ĩãrẽ, hareka ara ouverãpe mẽ'ẽaposhu tykove opamba verã.

Jesús hykuaĩ mbeujy mano verã

³¹ Jesús hẽno hã'ẽĩ'õpe 12 mboirea retarã heishu: Ã'ẽ jahapo Jerusalén kyty, haipepo opa iko Tũpa ĩñee mbeu'iare heihe vekuare Kuareta Tay,

³² shara ñonoapo kuareta jyrojambare ipope; haivi ñymbyhorypohe reta, heta mbaipo heihe reta hareka myndyvypohe reta;

³³ nupapo hareka jukapo reta; tẽvã mbahapy arapepo kuerajy.

³⁴ Tẽvã haire kuãã mbaivara he'ise kova ñee, shara kova mbai ñemi'ẽshi reta, hãrã kuãã reta heishuvare.

Jesús mynguera pente kũvãipi heshamba Jericope

³⁵ Jesús vãhẽserima oho Jericoperã, pente kũvãĩpi heshamba vapy'i pee hỹmbeype jurure'ẽ kyrypotirã.

³⁶ Hãma hendu kuareta hetava hasa haipirã, pyrãndu mbaivara iko.

³⁷ Mbeushu reta Jesús Nazareno hasa ohova haipi.

³⁸ Haipe sapukerã hei: Jesús, David tay; shyparekomitẽve!

³⁹ Hãma tynonde ohovare poshy ryheve heishu reta jasaka'ẽ verã; tẽvã hai hỹnatuve sapukejy: David tay, shyparekomitẽvẽ!

⁴⁰ Haipe Jesús ñymbourã, jurure veruashu verã hai ẽvãpe. Vãhẽ ourã pyrãndushu:

⁴¹ Mbaivara ripota ajapo ndyrehe? Haipe kũvãĩpi heshamba hei: Sheja, pota rãnga aheshajy.

⁴² Jesús heishu: Heshajyteño, rirojarã rykuerama.

⁴³ Haipevãĩ heshajy kũvãipi, hãrã oho hipii Jesús hareka õmombaivasushu Tũpa. Hãrã opaite heshavare kova, õmombaivasu jyve reta Tũpa.