Lucas 17 - NandevaBiblia

Mbai porãmbape jaa potarã

¹ Jesús heishu mboireare: Ĩmeñoĩpo'ẽ mbai porãmba japokashua kuaretare; tẽvã, tengapokui mbai porãmba japoka'ishua yngavare!

² Haikavivepo jajure ñapĩtihã ita mungu'iapyarã mombohaseve yyvasupe, mahẽ penteva jyrojatẽ'i shyrevare ityjykui mbai porãmbape.

³ Pingareko pindijehe. Ndyryvy mbai porãmba japo ndyreherã, ijetashu; hãrã mbai porãmba hejamarã ryhejareijyveshu;

⁴ timeĩpo pente arapeĩ 7 kavi mbai porãmba japo ndyrehe, hareka 7 kavi ou hei nde: “Ajapoveamapo”, hejareiishu.

Meẽve ore jyrojakue

⁵ Apostolre heishu Ñandeja: Meẽve ore jyrojakue.

⁶ Ñandeja heishu reta: Ajemaĩpo mostaza hãỹ rãĩmi mishĩĩ pirojakue, katupo pereshu ko yvyra: “Syry koivi, yyvasupe ekua iñotyjy”; hãma yvyra katupo japo pereshuva.

Jokueharea japo verã

⁷ Pynymbytepe mbava ĩmere jokuehareirea mby'arao'ia maĩrã hymba ñyngareko'iheshua, oujy ñũũvirã, heirashukuei: “Ei, vapy karu”.

⁸ Mba'ety, koñeĩ heiposhu: “Myhẽvãshe hau verã, hareka ẽĩkavi ñyngareko shyrehekui opa akarupeve, haivi opama rijaporã katu nde rykaru hareka rimbyuvekui”.

⁹ Hãma jokuehareirea opama japoshurã heiraposhu, ajetema? Mba'ety.

¹⁰ Kyrãpo jyve pee, opa pijapo Tũpa japokapevarã, perepo: “Jokuehareirea mba'erãmba'ia rãnga ore; shara japoa verãĩ japoha”.

Jesús mynguerashu 10 opa kuru vekua

¹¹ Hãma Jesús oho Jerusalén kytyrã hasa Samaria hareka Galileaipi;

¹² hãrã ichema oho pente tentamĩperã ou hỹvãitishu 10 kuimbai kuru põrãmbare, tẽvã mbyrykatuĩ ou ñymboushi reta;

¹³ haivi sapuke jyrerã hei: Jesús, Pyrỹmboi'ia, yryparekomitẽvei!

¹⁴ Jesús heshamãrã heishu reta: Pekua pijeshakashu paire. Haivi jyraha retarã opa kuera.

¹⁵ Hãrã pente hai retava hesha kueramãrã, oujy sapuke ryheve õmombaishu Tũpa.

¹⁶ Haipe ĩñeesu hova yvyre mbojapeve Jesús hỹnonde, meẽshu verã jy'ajetekue. Ko kuimbai hai Samariava.

¹⁷ Haipe Jesús hei: “Ha'ẽãraje 10 iare opa kueravare? 9 ia retara mape ĩme'ẽ?

¹⁸ Koñyra tenta yngaivi ouvaĩ oujy õmombaishu Tũpa?”

¹⁹ Haivi Jesús heishu kuimbai: “Pũ'ã, ekuajy; shara rirojarã rykuera”.

Tũpa huvisha vasu ara vateivi ouva ryheva

²⁰ Fariseore pyrãndushu Jesús: Mbaiperapo vãhẽkui Tũpa ẽvãpe'õ ryheva? Hãrã heishu reta: Tũpa ẽvãpe'õ ryheva ha'ẽã maĩnunga jahesha verã.

²¹ He'iãpope: “Pymaĩhe kope'ẽ” maĩrã “Pymaĩhe kuty'ẽ”; pikuaapo Tũpa ẽvãpe'õ ryheva ĩmema'ẽ pynymbytepe.

²² Haivi Jesús heishu mboireare: Vãhẽpokui ara pota pyheshajy verã pente arape Kuareta Tay, tẽvã pyheshãpo.

²³ Ĩmepo'ẽ heipeva: “Kõõ ẽẽ, maĩrã hoka'ẽ” tẽvã, avy pekua hipii reta.

²⁴ Shara kueĩpi vera ouva saperã opa mykõĩ arare, kyrã katĩĩpo jyve Kuareta Tay vãhẽma ara oujy verãperã.

²⁵ Tẽvã, tynondepo heta hasa'asy, hareka ã'ẽva kuaretare mymorããpo.

²⁶ Noe arape jehushuva rãĩmi katĩĩpo, jehujykui Kuareta Tay oujymarã.

²⁷ Kuaretare karu, ñymbyu reta hareka omendajyre, ara vãhẽpeve Noe iche verã varko vasupe; hãma ãma vãsu yvy opa tynyhẽvã oumarã, opaiteva hykove'iare mano.

²⁸ Kyrãmi jehujy Lot arape; karu jyre, ñymbyu reta, mba'ova jyre, mavẽnde, ñimĩty hareka hoorã japo jyre;

²⁹ tẽvã Lot õhẽma Sodomaivirã, vate araivi ou ãma tata rãĩmi hareka “azufre” he'iashuva ryheverã, opaite haipe'iare juka.

³⁰ Kyrã katĩĩpo jehujykui Kuareta Tay ijeshakamarã.

³¹ Hoka arape, ĩme'ẽ oo'iarẽ iarã, ĩmere ña'ãpovare oo iperã, avy tyvejy raha verã. Kyrã jyve ñũũhupi mba'apo'ia, avy toujy hentape.

³² Pynymanduahe Lot hyrekokue.

³³ Ĩme'ẽ hykove pota mondojepevarã mondojepeãpo; tẽvã ma'ẽĩhe kañyshia, hipitypo tykove opambava.

³⁴ She hai pee hoka pyhare aijymarã ĩmepo'ẽ mõkue oche'õre turupape: Pentevapo rahahashi, ĩrũpo hejahakui.

³⁵ Mõkue taupe penteapeĩ mangui'õre; pentepo rahaha, ĩrũpo hejahakui.

³⁶ Ĩmepo mõkue mba'apo'õ ñũũpe; pentepo rahahashi, ĩrũpo hejahakui.

³⁷ Mboireare hendu kovarã pyrãndushu reta: Yreja, maperapo ikokui hokava? Jesús heishu reta: Mãipi tyretekue ẽvãpe, haipepo jaty vyrachevasure hou verã.