Lucas 16 - NandevaBiblia

Mbai ñyngareko'ihea heko kavimbaa

¹ Jesús heishu mboireare: Ĩmemba'ẽ pente kuimbai iko katuva, ĩmerejy pente jokuerea mbai ñyngareko'iheshua. Mbe'uashu porãã opa pory mbai hetava ñyngareko'ẽhea.

² Hãma hẽnokarã heishu: “Mbaivarajy ko ahendu he'ia ndyreheva? Opa ñono she kuatiape rijapo vekua, shara katuveamapo rĩngarekohe shã'ãpovare”.

³ Haivi mbai ñyngareko'ihea pyape hei: “Mbaivara ajapopo? Shokue'ia rãnga shymohẽ amba'apoaivi. Shy yvype amba'apo verã ãĩmburuãshu; airurure'ai verã, ãnotijy.

⁴ Aikuama mbaivarapo ajapo, ĩme'are verã mbava retarapo shymyvãhẽ hentape, amba'apoveamarã”.

⁵ Hamã pepenteĩ hẽno jokuerea jipia'ẽshuare. Hãrã tynonde'õ pyrãndushu: “Mbovyra ndipiarẽĩshu shokue'ia?”

⁶ Hokava kuimbai heishu: “100 hyru asaite rãngapo ameẽjyshukui”. Hãrã mbai ñyngareko'ihea heishu: “Kõ'ẽ ndykuatia, narẽ'ãĩte vapy, 50 pevẽĩ ñono”.

⁷ Haivi pyrãndujyshu ĩrũ: “Ndejyveno mbovyra ndipiarẽĩve?” Hai hei: “100 trigo hyru ryheve”. Hãrã heishu: “Kõ'ẽ ndykuatia 80 pevẽĩ ñono”.

⁸ Pyrokue'õ kuaama mbai ñyngareko porãmba'ihea katu'i jyve mbai japo verãrã, ijeta kavihe. Shara ko yvy'ĩãrẽ'õ japo'iare ha'eve jyve mbai japo verã hapishare hai rãĩmi'iare pevarã, Tũpa potava japo'ia retaivi.

⁹ Hãrã hai pee: Pory kyrypoti ko hekopembaa ĩmeryreva rymbyheta verã rĩmi'ĩrũ verã. Haivi, kyrã opama pyhevi hokava kyrypotirã, Tũpa hareka jokuereare nymyvãhẽpo pente oo vate arape'õ opa ara pevarã.

¹⁰ Ko heko kaviva mbai mishĩvãpe, heko kavi jyve mbai hetavape; hãrã mishĩvape heko porãmba, kyrã jyve mbai hetavape.

¹¹ Hãma mbai hetava porãmba ko yvy'ĩãrẽ'õ hekope kaviãã piporyrã, mbavarapo pyndyroja mbai añetevape?

¹² Hãrã haimba pã'ãpovare pyndyrojahããrã, mbavara meẽpope peii pa'ãpova?

¹³ Pente jokueharea katuã mokuere jokue'õ, shara heshatãpo pente, ĩrũĩpo haihushu; penteĩpo japoshu heiva, ĩrũpo japoãshu heiva. Kyrã jyve pee katuã Tũpare pẽĩva seveivãĩ pẽĩjyhe kyrypoti.

¹⁴ Hãma fariseore, haireta hai kyrypoti haihuvare, opa hendu ñynoĩ kova hãrã ñymbyhoryhe reta Jesús.

¹⁵ Hãrã Jesús heishu reta: Pee rãnga pere pindijehe heko kaviva kuaretare hỹnonde, tẽvã Tũpa kuaa'ẽ pyndypya; hareka kuimbaire mbytepe mbai vasuva rãĩmi rekohava, hokava hai mbai porãmba'eiteve vekua Tũpa hỹnonde.

Moisés mbypara vekua hareka Tũpa ẽvãpe

¹⁶ Moisés mbypara vekua, hareka Tũpa ĩñee mbeu'iare hei vekua japoa verã vãhẽ Juan arapeve; haivive mbe'uhajy Tũpa ẽvãpe'õ ryheva ñee kavi, hãrã opaite õñehãã pota pyrãtakuepe ichepyrã.

¹⁷ Javaĩãvepo opa ara vate'õ hareka yvy, Moisés mbypara vekua ikomba verãĩvi.

Jesús mbeu omendateã poijy ijuhuviare

¹⁸ Ĩme'ẽ pente kuimbai hyreko poishia omendajyhe yngava tauperã, ynga jyrekomava pokojyhe, shara haimba hyrekova iko'i hãndi; hareka taupe poiashia rekojya, ynga jyrekomava pokojyhe, shara haimba hyrekova iko'i hãndi.

Kuimbai iko katuva hareka Lázaro

¹⁹ Ĩmemba'ẽ pente kuimbai iko katuva, mondeava hepyva monde'ia hareka opa'ara japova karu vasu.

²⁰ Ĩmemba'ẽ jyve pente pavete'ia Lázaro he'iashua, opa kuruva. Ou vapy'i yvype iko katuva hõchepe;

²¹ ko pavete'ia potavasĩ ñymyhỹvãtatẽpy ho'uava ku'ikuemi oava iko katuva ñy mesaivi hareka ñaũmba retaave ou hereshi kuru.

²² Pente arape mano ko pavete'ia, hãrã Tũpa jokuevare ou rahashu Abraham ẽvãpe. Haivi iko katuva mano jyve, hãrã ñotỹha.

²³ Hãma manovare ẽvãpe iko katuva õĩ asymarã mãĩ vate, mbyryivi hesha Abraham hareka Lázaro hãndi;

²⁴ hãrã sapukerã hei: “Sheru Abraham, shyparekomĩtẽ, mbou Lázaro tymaky ipo ĩtimi yype vỹry'ỹsã verã shẽku; porã'ãĩte rãnga ãĩ ko tata hẽndype”.

²⁵ Tẽvã Abraham heishu: “Shyray, manduahe rĩmẽteririrã mbai heta ryrerã rikokavi, kyrãite rãnga Lázaro heta hasa'asy jyve. Hãrã ã'ẽ hai vy'a ẽẽ kope, ndehaitema ryhasa'asyiterẽĩ jyve.

²⁶ Hãma koivi, ĩme'ẽ ñanymbytepe mbai kype'õ hareka tivishava; hãrã ĩme'ẽ koivi pota hasava pẽĩvãperã, katuãpo hasa, hãndi hokaivi katu'ãĩpo hasa jyve kope”.

²⁷ Haipe iko katuva hei: “Akuarã, sheru Abraham, airurende rỹmondo verã Lázaro sheru hentape,

²⁸ ĩme'are 5 shyryvyre, tymbeuveshu reta mahẽ haire oujyvekui ko hasaha'asy'õpe”.

²⁹ Tẽvã Abraham heishu: “Haire ĩmere Moisés mbypara vekua hareka Tũpa ĩñee mbeu'iare hei vekua; haire tyhendushu”.

³⁰ Iko katu katuvekua heijy: “Kyrãtẽvara sheru Abraham; ĩme'ẽ ohova haire ẽvãpe mano vekua pãũvirã, hejapo retakui mbai porãmba japo vekua”.

³¹ Abraham heishu: “Henduseã Moisés, hareka Tũpa ĩñee mbeu'ia retarã, rojã'ãĩpo jyve reta ĩmetẽ'ẽ pũãjyva manovare pãũvi”.