Lucas 15 - NandevaBiblia

Ñymyha'ãnga avisha kañyva ryheva

¹ Ñymbojahe reta Jesús opaiteva kyrypoti mbatyse'iare Roma pevarã hareka heko porãmba'iare hendushu verãre.

² Hãrã fariseo hareka Moisés mbypara vekua pyrỹmboi'iheare õñepyrõ ijeta porãã jyrehe hãrã hei reta: Ko kuimbai myvãhẽ heko porãmba'iare hareka karu hãndi.

³ Haipe Jesús mbeushu reta ko ñee ñymyhã'ãnga:

⁴ Ĩme'ẽ pynymbytepe ĩmerea 100 avisharã pente kañyshirã, hejaãra ñuũpe 99, oho heka verã kañyva heshajy peve?

⁵ Haivi heshajymarã vy'ape hupi ñyvãpenkare;

⁶ vãhẽjyma oho hentaperã, mbaty ñi'ĩrũre hareka henta juri'õre, hãrã heishu reta: “Pyvyaminte shendie, shara aheshajyma shy avisha kañy vekua”.

⁷ Kyrã hai pee hetaveva vyapo vate arapy ẽẽ pente heko porãmba oujy Tũpa jykotyrã, 99 heko kavi'ia retaivi ikotẽvẽmba ẽẽ ñymbeujyhaivare.

Ñymyha'ãnga nikere kañyva ryheva

⁸ Ñañonojyshu, pente taupe ĩmerea 10 nikere, kañyshi penterã. Myhendyãra mbai sapeka, typei oo ipe hareka kapyry heka vãhẽjyshupeve?

⁹ Hãrã vãhẽjymashurã, mbaty ñi'ĩrũ taupe hãndiare hareka hoo hyvache'õ taupe retarã heishu: “Pyvy'a shendie, aheshajyma nikere kãñy shyhevi vekua”.

¹⁰ Kyrã vya jyve Tũpa jokuevare pente heko porãmba'ia heja mbai porãmba vekuarã.

Teru pyryraihuva

¹¹ Jesús heijyshu reta: Pente kuimbai ĩmere mokue tayre;

¹² haipe ndeiveva heishu tuu: “Sheru, meẽshe, mbai ĩme ryrevare sha'ãporãre”, hãrã tuu memeẽshu reta hai ĩmereva.

¹³ Mbovy aramajyrã tay ndeiveva opa mbaty ĩmerearã mbyry oho, ynga yvype; haipe oho iko'i kuaã japoite verã japo'i porãmba ijyjokombape opa pory hai imere vekuami.

¹⁴ Opama jyvarehe ĩmerearã, ou pente ñymbahy vasu hoka tentape, haipe õñepyrõ hai hasa'asy.

¹⁵ Hãma heka mba'apo verãĩpi hãrã vãhẽshu japo verã pente karai haipe'õ rupii, hokava mondoshu ñuupe kushire ñyngarekohe verã.

¹⁶ Hãrã potatẽ ñymyhỹvantapy yvope kushire hou'õvapy, tẽvã mba'ety meẽshua.

¹⁷ Hãma haipe pya mbijetahe japo vekuare: “Mbovy jokuearea retara sheru hentape'ẽẽ hembypashu hou verãre, sheny kope ãmanomapo ñymbahyivi!

¹⁸ Ãpũãpo aha sheru ẽvãpe haiposhukui: Sheru, porãmba rãnga ajapo nynonde hareka Tũpa hỹnonde;

¹⁹ katuveama ndyra'ype shyrẽnõha; shiñonoĩ rijokueryrea rãĩmi”.

²⁰ Hãrã haipe pũã ohojy tuu ẽvãpe. Hãrã mbyryteri ouva hesha tuurã parekoshu, hãrã ñani oho hỹnonde hỹvãĩtimarã kũãva jajuipi, marãndurã hovape pyteshu.

²¹ Hãrã tay heishu: “Sheru porãmba rãnga ajapo nynonde hareka Tũpa hỹnonde; katuveama shyrenohã ndyra'yrã”.

²² Maĩrã tuu heishu jokuehareireare: “Ãrẽ'ãĩte pynohẽ mondeava mashyãva, pymymondeka; piñonohẽ kuairõ ipore, hareka pymymondeka jypasarã!

²³ Hareka peru toro ray kyraveva, pijuka, jakaru hareka javy'a!

²⁴ Shara ko shyray manoma vekua, ã'ẽ hykovejy; kañytẽ vekua, ñavãhẽjyshu”. Hãrã õñepyrõ vy'a reta.

²⁵ Hãrã tay tynondeva ĩme'ẽ ñuupe; hãrã vãhẽjyma ou henta hyvacherã, hendu mbi'ipuha'õ hareka jyroky'õre;

²⁶ haivi hẽno pente jokuerearã pyrãndu'ishu mbaivara hokava.

²⁷ Jokuevare heishu: “Ndyryvy oujyrã rãnga nderu jukaka pente toro kyraveva mamba'ẽãte oujyrã”.

²⁸ Hãma poshyite'irã ñatẽy iche. Haipe tuu õhẽ jurure'asyshu iche verã.

²⁹ Hai heishu tuu: “Heta ãñoma ãrỹmbory, ajapo ñoĩnde ñeẽ japoa verã, tẽvã mapemba rỹmetẽveshea pente kavara ray, avya verã shi'ĩrũre hãndi.

³⁰ Tẽvã kova ndyray opa jyvarereihe vekua ndykyrypoti taupe heko porãmbare hãndiva, rijukashu hai pevarã toro ray kyrava”.

³¹ Hãma hai heishu: “Shyray, nde rãnga rikoñoĩri shendie, opaitea sha'ãpovare hai na'ãpova.

³² Haikavi rãnga javya pãveĩterã hareka ñandyrory, shara ko ndyryvy manomatẽ vekua, tẽvã hykovejy; kañytẽ vekua, hareka ã'ẽ heshahajy”.