Lucas 14 - NandevaBiblia

Jesús mynguera pente kuimbai opa ruru vekua

¹ Pente putu'uava jy'arape, Jesús oho pente fariseore juhuvisha hentape karu verã, hãrã opaite haipe õĩvare ma'ẽĩ ñynoĩhe.

² Haipe pente kuimbai hete oparuruva ẽẽ hỹnonde.

³ Hãrã Jesús pyrãndushu Moisés mbypara vekua pyrỹmboi'ihea hareka fariseore: Katura ñamynguera ñymbairasyva putu'uava arape maĩrã katũãra?

⁴ Tẽvã haire jasasakãĩ jyre. Haipema Jesús pysy kuimbai ñymbairasyva hãrã myngueramarã, mondojy.

⁵ Hãrã Jesús heishu fariseore: Pynysanjay maĩrã punũrũmba guei pente yvykuape oarã, ỹrẽ'ãrapo pynohẽjy putu'uava jy'arate'õva?

⁶ Hamã haire katuvẽã mbai mbyhovaishu.

Omendavape henohakavare

⁷ Jesús hesha marãra hẽnõhaka haivare pyhỹrõ vapyhapya tynonde'õ hoka mesape, hãrã mbeushu reta kova ñee ñymyhã'ãnga:

⁸ Hãma mbava nyrẽnokave jykaru vasuva omendaha'õperã, avy vapy vapyhapya tynonde'õpy, shara katupo oujy yngava hẽnõhãkaiteve ndyheviva;

⁹ hãma ouma ko nyrẽnokavarã, heipo nde: “Meeshu ryvapypya”, nymarã ryhevẽĩpo reho ryvapy vapyhapya japype'õ.

¹⁰ Hãrã nyrẽnohakarã, vapyhapya japype'õpẽĩpo ryvapy, nyrẽnokava ourã heipo nde: “Shi'ĩrũ, tynonde ekua vapy”; kyrãrã nymbyveteitevepo hỹnonde mesape vapy'õre.

¹¹ Hãma ha'ẽĩ vateve iñiñono'ia, mimishĩãpokui; hãrã oñemomishĩĩ'iapo, vateve ñonohakui.

¹² Hei jyve kuimbai hẽnohakavekuape: “Rijapo karu vasu, arape maĩrã pyharerã, avy hẽnoka ni'ĩrũ retape, maĩrã ndyryvyre, nyrẽtãrãre, maĩrã ndyvache'õre iko katuva mahẽ haire nyrẽnokarã, hareka kyrã mbyhepyjypy nde verã.

¹³ Haikavive rãngapo, karu vasu rijaporã, rỹhẽnokave pavete'iare, jyvambava, vatambavare, hareka heshamba kuvãĩpiare;

¹⁴ hãrã ryvy'apo, shara haire mba'etyre mbyhekoviajypy nde verãre; shara opapo mbyhekoviajy ndekui heko kaviva puãjyma retarã”.

Ñymyhã'ãnga karu vasu pynturã ryheva

¹⁵ Hendu hokavarã, pente mesape vapy'õ, heishu Jesús: Vy'apo karuva Tũpa ẽvãpe!

¹⁶ Hãma Jesús heishu: Pente kuimbai japoka karu vasu pynturã, haivi kuareta hetava hẽnoka jyve.

¹⁷ Vãhẽma karu verã retaperã, mondo jokuehareirea hei verã hẽnohãkava retape, “Pei shara opama ẽẽ”.

¹⁸ Tẽvã haire õñepyrõ pepenteĩ heishu reta katumba ohovare. Penteva hei: “Ava rãngaje pente shekorã, hãrã ahapo ãmaĩhe; ambe'uĩnde mahẽ ajetẽã'ẽ ndekui”.

¹⁹ Ĩrũ heijy: “Kuri rãnga avaje 5 ijovea guei, hãrã ahapo ãhãhã aĩ; ambe'uĩnde mahẽ ajetẽã'ẽ ndekui”.

²⁰ Hãrã ĩrũ heijy: “Katuãnypo aha shara kurite ãmenda”.

²¹ Hãma oujy jokuehareirea, opa mbeushu jokue'õ. Hãma oo ija poshy hãrã mondo jokuereirea: “Narẽ'ãĩte ekua ko tentahupi, vataha õĩpi hareka pehupi, hareka eru kope pavete'iare, mba'erãveama'iare, porãmba vatavare, hareka kũvãĩpi heshaveamavare”.

²² Hãrã jokuehareirea oujymarã heijyshu: “Sheja, ajapoma nde reresheva, tẽvã hendateveteri'ẽ”.

²³ Hãma pyrokue'õ heishu jokuehareirea: “Ekua vataha'õĩpi hareka pehupi tenta ñahẽmashia kyty hãrã ryheshavare miñerã tiche tynyhẽ'ẽ verã shero.

²⁴ Hãrã hai pee mbavẽãpo tynõnde hẽnõhakavare, houkui pynturã she hau verã”.

Mbaivara tekotẽvẽ Jesús ñami'ĩrũ verã

²⁵ Kuareta hetava Jesús oho hãndi; jere jykotyrã heishu reta:

²⁶ Ĩme'ẽ ou shykotyvarã, tẽvã haihuveva tuu, ishy, hyreko, tayre, tyvyre, hiindyre hareka ha'ei hykovetei, katuãpo ikoshi amboi'area.

²⁷ Hãrã jukurusu hupimbava hareka oumba shaykueva katuãpo ikoshi amboi'area.

²⁸ Ñañonoshu mbava pynymbytepe pota mupuã oo vate'õrã, vapy rãniãrapo papa mbovyrapo hipityshu, hareka hesha verã ĩmerare kyrypoti maĩrã opa japoka verã?

²⁹ Shara opama ñono hẽndarãperã, haivi opãã japorã, opavare heshava õñepyrõ ñymbyhoryhe,

³⁰ hãrã heipo reta: “Ko kuimbai õñepyrõma rãnga japo hoorã, tẽvã katuã opa japo”.

³¹ Maĩrã ñañonojyshu, pente huvisha vasu ohoserima ñyrãrõ hãndia ynga huvisha vasu, vapy rãniãrapo pya mbijeta verã, katurapo 10 mil kuimbai ñyrãrõ hãndi 20 mil hyvaishorã oushu verã?

³² Jepyãpoherã, mbyryteri'ẽshi ynga huvisharã, mondoposhu hai ẽvãpe jokuerea, jurureshu verã ikokavijy hãndi verã.

³³ Kyrã, ĩme'ẽ peeva opa kavimba heja opava maĩnunga ĩmerevarã, katuãpo ikoshi amboi'area.

Juky hymboshyvearã

³⁴ Haikavi rãnga juky; tẽvã hymboshyveamarã, marãrapo mymboshyhajy hykuaĩ?

³⁵ Porãvẽama yvy pevarãĩmba, kyrãijy yty pevarã; momboha verãĩma. Ĩme'ẽ japysavarã, tyhendu.