Lucas 13 - NandevaBiblia

Ñymbeujymba, manopo

¹ Akua arape ã'ãmo ouvare mbeushu reta Jesús marãra Pilato mondo jukaka ã'ãmo galileovare mymba jukahava hapy ñynoĩvape.

² Hãma Jesús heishu reta: Pimoãra pee ko kuimbai galileovare manova haire hetave mbai porãmba japo yngava galileo retaivi?

³ Kyrãã rãnga! Hãma pee peijyvyã Tũpa jykotyrã, pymanoñoĩpo jyve.

⁴ Pimoãra 18 mano vekua Siloeivi mimbo'yhava jopy vekuare, heko porã'ãĩteveva yngare Jerusalénpe'ia retaivi?

⁵ Kyrãã rãnga! Hãma pee peijyvyã Tũpa jykotyrã, pymanoñoĩpo jyve.

Higo iamba

⁶ Heijy ko ñee ñymyhã'ãnga: Pente kuimbai ĩmere pente jypy igo ju'uva rẽndape. Hãrã oho maĩpy'iarã tẽvã mba'ẽã heshããpy.

⁷ Hãma heishu ñyngareko'iheshua: Mbahapy ãñohearema ai aheka ia, tẽvã aheshããpy. Jasyja! mba'erãra ẽẽreipo ko yvype?

⁸ Tẽvã hai mbyhovairã heishu: “Sheja, ma'ẽĩterihe ko ãñope, tamungui jurikui hareka tambykavevoshu yvy.

⁹ Katuara koivi'iakui, hãma i'ããjyrã, katumapo jajasyja”.

Jesús mynguera pente taupe putu'uava jy'arape

¹⁰ Pente putu'uava jy'arape Jesús pyrỹmboi Judiore ñymbatyseape;

¹¹ hãma haipe ẽẽ pente taupe 18 ãñoma mbai poshy mymbairasyva hareka japava hareka marãmba katu mysymyĩhajya.

¹² Jesús heshamarã, hẽno hareka heishu: “Taupe, poima ndyhevi nymbairasykue”.

¹³ Hãrã ipo ñono ĩãrẽ. Haivi taupe ñysymyĩjyrã, õñepyrõ õmombaivasushu Tũpa.

¹⁴ Tẽvã huvisha Judiore ñymbatyseape'õ poshy'i shara Jesús mynguerajy putu'uava jy'arape. Haivi heishu kuaretare: 6 ara ẽẽ katu ñamba'apo verã; hãrã hoka arape rãngapo peii piñymyngueraka verã, tẽvã avypo putu'uava jy'arape.

¹⁵ Ñandeja heishu: Pee tykove hova mokue'iare! Peera pijoraã kueĩpi punurũmba buey, maĩrã mbirika putu'uava jy'arape pyraha pymbyu verã?

¹⁶ Tẽvã ko taupe Abraham ñymoñashia, Satanás pokua ñonoshu vekua 18 ãñoma mbairasykue ryheve. Hãmera õĩã poihakashi verã kova mbairasykue putu'uava jy'arape?

¹⁷ Hãma Jesús kova heirã ñymymarãka hyvaishore; tẽvã kuaretare vya reta mbai vasu Jesús japovare.

Ñymyhã'ãnga mostaza hãỹ ryheva

¹⁸ Jesús hei jyve: Mbaivara ova Tũpa ẽvãpe'õ ryheva, hareka mbaivara ambivachepohe?

¹⁹ Hãĩ rãnga mostaza hãỹ pente kuimbai heky hareka ñoty vẽkua ikope. Syry oho'i ikoshi peve yvyra hãrã vyrare ñymbyhaity hãkãre.

Ñymyhã'ãnga levadura ryheva

²⁰ Jesús hei jyve: Mbaivara katu amyhã'ãngahe Tũpa ẽvãpe'õ ryheva?

²¹ Ova harina mby'ouka, pente taupe ñomi mbihiava harina tivisha'õ, opa jy'ou kavipeve.

Õche mishĩva

²² Jesús hasa oho tenta retaipi hareka tentami retaipi, pyrỹmboi hareka hasavaipi Jerusalén kyty.

²³ Hãma mbava pyrãndushu: Sheja, mbovyirapo'i ohojepeva? Jesús heishu:

²⁴ Piñyhãã katu piche õche mishĩ'õĩpi. She hai pee hetapo ẽẽ potate icheva, tẽvã katuãpo.

²⁵ Haivi oo ija pũãma mboty õcherã, katuape pee pimepẽĩva, punupapo hoka õche, hãrã perepo: “Sheja, pea ore”. Tẽvã hai heipope: “Apyrykuãã hareka aikuãã maivi peivara”.

²⁶ Haipe peñepỹrõpo pere: “Karuha hareka ñymby'uha rãnga'i nendie, hareka vataha'õĩpi yrymboiri”.

²⁷ Tẽvã hai heipo pee: “Haima rãnga pee, she aikuamba maĩvi peivara pee. Pysyry shyhevi pee porãmba japo'iare!”

²⁸ Haipe ẽẽpo jaheova, hareka tyrãĩ mbupupuruva pyheshama Abraham, Isaac, hareka Jacob perã, hai hoka Tũpa ĩñee mbeu'ia arykaivare Tũpa ẽvãpe'õ ryheva tẽvã pee pymohẽãpo katuape.

²⁹ Shara ĩmepo ẽẽ ouva kuaretare kuarasy õhẽaivi hareka kuarasy icheaivi, yvytu kytyivi hareka rovaivi, vapy karu verã Tũpa ẽvãpe'õ ryheva mesape.

³⁰ Hãma ã'ẽ taykue'õ mytynondehapokui, hareka ã'ẽ tynonde'õ mbytaykuehapokui.

Jesús hãpĩrõ Jerusalén

³¹ Hoka arape fariseore vãhẽ jyveru Jesús ẽvãperã heishu reta: Ekua koivi, shara Herodes pota nduka'ẽ.

³² Jesús heishu: Pekua, hãrã pereshu hoka avara: “Ã'ẽ ãmohẽ mbaiposhy hareka apyrỹmynguera ko arape, hãma kõĩjyape, hareka mbahapy arajyapepo ajapo verã opama ajapokui”.

³³ Tẽvã, avatateripo ko arape, pareejyrã, hareka ĩrũ arajyape; shara katuãpo Tũpa ĩñee mbeu'ia manoshi Jerusalénvi katuape.

³⁴ Jerusalén, Jerusalén, rijukariva Tũpa ĩñee mbeu'iare, hareka itape rijapireiva Tũpa mondotendevare! Mbovyjyra shykyrẽỹte ambaty nymembyre, uru memby mbatyva rãĩmi hỹpãpõka'ipe, tẽvã ndee ripotãã!

³⁵ Ã'ẽ ndero hejahapo, yvy ikohambaipi, hã'ẽĩma ẽẽ hãrã hai pee shyreshaveama verã, vãhẽpeve hoka ara pere verã: “Tojehovasa ouva Ñandeja heepe”.