Lucas 12 - NandevaBiblia

Jesús pyrỹmboihe hapishatamba ryheva

¹ Haipe kuareta hetava ñymbatyjy, pypỹrõ vasĩ ijehe. Hãma Jesús õñepyrõ ijetashu mboireare: Pĩngareko pijeheshi fariseore imereva harina mby'ouka, hova mokueva ryheva.

² Shara mba'ety ñemiva heshahamba verã; maĩrã mba'ety ñemiape'õ kuaamba verã.

³ Hokavare, opaite pỹntuape pereva, kõĩvapepo hẽnduajy; opaite oo'ipẽĩ pere vekua papysape, oo ĩãrẽ vivepo sapukepe mbe'uhajy.

Mbavaivirapo kyjeha

⁴ Pee shi'ĩrũre ahaihuva hai pee: Avy pykyjeshi tyreteĩ jukava, shara hokava'ĩãrẽve katuã mbaivee japo pyndyrehe.

⁵ Ambeupo pee mbavaivirapo pykyje: Pykyjeshi katu hekyva pyndykove, haivi rekova mbaikatu piririty verã tata vasupe; She hai pee, pykyjeshi hokava.

⁶ Mẽ'ẽhãra kueĩpi 5 vyra mokue nikere kuemireĩ? Katynga Tũpa sareãshi reta.

⁷ Hãma pee, pãkahaave Tũpa pepenteĩ opa papa. Hãrã avy pykyje; shara pee mbai vasuveshi vyra retaivi.

Jesús hee mbeuva hareka ñomiva kuaretare hỹnonde

⁸ She hai pee, opaite shymbeuva kuaretare hỹnonde, ko kuareta Tay mbeupo jyvekui Tũpa jokuevare hỹnonde.

⁹ Tẽvã ĩme'ẽ shiñomiva kuaretare hỹnonderã, ñomihapo jyvekui Tũpa jokuevare hỹnonde.

¹⁰ Hãrã ĩme'ẽ ijeta porãmbaheva Kuareta Tay, Tũpa hejareiiposhu; tẽvã Espiritu Santo jahe'ihea ha'eã hejareiishu verã.

¹¹ Pyrahaha Judiore ñymbatyseape, karai vasure hareka mburuvishare hỹnonderã, avy pejepy'apy marãrapo hareka mbaivara perepo pymaĩ hỹnonde verã;

¹² shara haipevãĩpo Espiritu Santo pynymboihekui pere verã rãĩmi.

Jesús ijetahe iko katuva katẽỹva

¹³ Hetava mbyteivi pente kuimbai heishu Jesús: Pyrỹmboi'ia, mbeushu shichey timbijaoveshe sha'ãporã, yrerukueamy heja'ore vekua.

¹⁴ Haipe Jesús heishu: Nde shi'ĩrũ, mbavara shiñono pynymbytepe Kuareta Pirĩmbivacheka'ia maĩrã hejaha vekua mbijao'i verã?

¹⁵ Heijyshu reta: Pymãĩ hareka pirykyje, avy piko mbai pipotareivape! Shara tykove õĩãhe maĩnunga hetava kuaretare imerea.

¹⁶ Haivi Jesús mbeujyshu reta ko ñee ñymyhã'ãnga: Ĩmemba aryka'e pente kuimbai iko katuva, jy'yvype ñotyva õhẽ kavishurã, heta mỹnõõ.

¹⁷ Haipe iko katuva pya mbijetarã hei: “Mbaivara ajapopo?” Mba'ety ãnãtu verãpe añoty vekua.

¹⁸ Haivi hei: Aikuama ajapo verã: Opapo ambai oo shimĩtyre anatũseape, ajapojy verã tivishave'õ haipepo anatukui kova shimĩtyre hareka opaite ĩme areare.

¹⁹ Haipepo hai shyrykovepe: Nde shyrykove, heta mbai ĩmeryre nãtũava heta ãño pevãrã; putu'u, karu, ñymbyu, vy'a!

²⁰ Tẽvã Tũpa heishu: Nde tykove kuamba'ia! Ko pyharepo rỹmano; rỹnãtuvare, mbava pevarãrapokui?

²¹ Kyrã rãnga jehushu hai pevarãĩ heta mbai mbaty'ia, tẽvã mba'ẽã ĩmere Tũpa hỹnonde.

Tũpa ñyngarekohe jyrojaheare

²² Haivi Jesús heishu mboireare: Hãrã hai pee: Avy pejepy'apyhe pyndyrykove, peu verãre, maĩrã pyndyrete monde verãre;

²³ pyndyrykove mbai vasuveshi ho'uava, hareka tyrete mbai vasuveshi mondeava.

²⁴ Pymaĩhe vyrapuare, haire ñotỹa hareka mỹno'õã; mba'ety houva nãtu verãpe, tẽvã Tũpa myngarushu. Pee rãnga mbai vasuveshi vyrare!

²⁵ Mbavara pynymbytepe ojepy'apy rupii mbupukuavepojyshu hykovepe?

²⁶ Hãma katuã pijapo mbai mishĩĩvãrã, mãrã'ĩrãra pejepy'apypihe yngava retare?

²⁷ Pymaĩhe marãra yvotyre syry, mba'apoã hareka mbavyvyimba; katynga She hai pee Salomon opaite hĩmbipekuepy ñimimondeã penteva haire rãĩmi.

²⁸ Hãma Tũpa kyrã mimonde yvyramire ñanaipi'õ hãndi ñũũhupi ã'ẽvãre, haivi kõĩjyrã opa momboha hornope, marãĩrapo pynymymondekaã kuareta sai jyrojava!

²⁹ Hãme rãnga avy pejepy'apyhe mbaivarapo peukui hareka pimbyu verãre.

³⁰ Shara opaite kova mbai ojepy'apyhe kuareta ko yvy'ĩãrẽ'õre; tẽvã pee ĩmepyre Peru vate arapy'õ, opa kuava mbaivara pikotẽvẽhe.

³¹ Tẽvã pee pyheka jyve Tũpa ẽvãpe'õ, hãrã opaite kova mbai me'ẽãpo jyvepe.

Mbai heta ara vate'õ

³² Avy pykyje, mbovyĩ pĩmbayyva, heshara Peru pota meẽpe hai ẽẽvape'õ ryheva.

³³ Pevende opaite ĩmepyreva, hãrã pymeẽ mãĩnũnga mba'etyreape; peñehããhẽ vosa soro mbava, jaishu, mbai hetava ara vate'õpe, manarõ'ia ichemba verãpe, hareka kupii houmba verãpe.

³⁴ Shara pynymbaikavi heta'ẽvãpe, haipepo ẽẽ jyve pyndypya.

Ñande ñãhãrõ kavipo

³⁵ Pẽĩkavi pymba'apo verã hareka pymyhendy mbai sapeka.

³⁶ Hãma jokueharea oo ija hãrõ'õ rãĩmi omendaivi oujy verã, pyrỹrẽnoma õchepe vãhẽjyma ourã ỹrẽ'ãĩte pype'a.

³⁷ Vy'apo jokuehareireare oo ija oujymarã, hesha ocheã'ẽrã. Ãñeteĩte hai pee, oo ija mondepo jokueharea mondeva hãrã mbyvapypo mesape, hareka oupo ijokueka jyveshu.

³⁸ Ajemaĩpo pyhare mbytepe vãhẽ oujy, hareka kõĩserima ourã, hãma hesha ocheã ñynoĩrã, vy'apo jyre jokuehareare.

³⁹ Hãma pikuaa kavi kova: Oo ija kuaa mbaiperapo ou manarõ'iarã, ochẽãpo'ẽ hãrã ma'ẽĩãpohe iche ho'ipe manarõshu verã.

⁴⁰ Pee jyve pẽĩkavipo pẽĩve; pimoãmba pẽĩvape kuareta Tay oujypokui.

Jokuearea jyrojahaheva hareka jyrojahambaheva

⁴¹ Hãrã Pedro pyrãndushu Jesús: Yreja, ko ñee ñymyhã'ãnga ore pevarãĩra rereje, maĩrã opavare pevãrãra?

⁴² Ñandeja heishu: Mbavara hai ñyngareko'ihea japumbaa kua kaviva hareka hekope kavi he'iashuva japova, kyrãva oo ija hejaposhu hoo ipe ñyngareko verã, hareka myngaru verãre jy'arape kavi?

⁴³ Vy'apo'i ko jokuehareirea oo ija vãĩjyma ourã, hesha he'iashuva opa kavi kyrã japorã.

⁴⁴ Ãñẽtẽite hai pee, opava mãĩnũnga oo ija ĩmereare opapo ñono ipope.

⁴⁵ Tẽvã ko jokuehareirea pyape hei; “oo ija nãrẽãnungaãpo oujy”, õñepyrõ jyvavarehe ĩrũre jokuehareireare, kuimbaiva hareka taupeva hãrã ĩñono karu hareka ñymyngau,

⁴⁶ haivi oujypo jokuehareirea jokue'õ, hãrõhãmba'õ arape hareka jy'ora mõãmba'õpe, jyvareapohe hareka jyrojambaa retapo ñono hãndikui.

⁴⁷ Hãma ko jokuehareirea kuaa kavi mbaivara oo ija pota, tẽvã õĩkaviã hareka japoãshu ĩñe'ẽrã, hetapo nupãhã.

⁴⁸ Jokueareva kuambavape mbai porãmba japova nupãha verã, saivepo nupãhã. Hãma hetave me'ẽãshuva, hetavepo jurureajyshu: Hareka hetave jyrojahahea, hetavepo jurureashu.

Jesús rehe veru ñimbijaova

⁴⁹ Jesús hei: She ai aru aity tata ko yvy'ĩãrẽ, hãrã aipotama hendy ẽẽ.

⁵⁰ Tẽvã ahasapo jyhasa'asy rupii, ñymyngaraiva rãĩmi; hareka ajepy'apytẽ hãrã aipotama hokava iko!

⁵¹ Pimõãra she aĩrã arupo pyavapy ko yvy'ĩãrẽ? Mba'ety! She aru jyve papishare piko porãmba hãndi verã.

⁵² Hãma ã'ẽ pente oope 5 iare ijupĩĩpo ñyrãrõ, mbahapy õre pũãpo mõkue iare, hãrã mõkue õre mbahapy ia rehepo.

⁵³ Hãma teru pũãpohe tay, tyray pũãpohe tuu, tesy pũãpo memby kuña; tymemby kuña pũãpohe ishy; teme ishy pũãpohe memby hyreko, tymemby hyreko pũãpohe ĩme ishy.

Mbai kavi heshaha verã arare

⁵⁴ Heijyveshu Jesús kuaretare: Pyhesha ãvã pỹntu pũã kuarasy ichea kytyrã, hãma pere kueĩ: “Haivipo”, hãrã haivi.

⁵⁵ Hãma yvytu peju rovaivirã perekuei: “Hakupojy” hãrã kyrã jehu.

⁵⁶ Pee tykove hova mokue'iare! Pee pikua kavi arare hareka yvy'ĩãrẽ pymaĩrã mbaivara ikopo. Hãmera mãrãĩ pikũãã iko'ẽvã ã'ẽ arape?

Eñehãã iko kavi hãndi ndyreshatãmbare

⁵⁷ Mãrãĩra peeteiva piñanduãã pijapo verã hekope kaviva?

⁵⁸ Ĩme'ẽ ndyreshatamba'ia reho hãndi huvisha ẽvãperã, ẽñehãã iko kavijy hãndi ndei ndyraha pirĩmbivacheka'ia hỹnonderã hareka hai nymeẽpo syndaro retape hareka syndarore ndyrahapo nymbypereso.

⁵⁹ Hãma she hai ndee rẽhẽveamapo haivi opa rymbyhepypeve ndipiahevare.